VOV4.Xơ Đăng - Pơtối tơdroăng roh hôp má 9, kơxo lơ 15/3, Vi ƀan pơkuâ Kuô̆k hô̆i môi tuăn tơ’nôm kơxô̆ liăn ngân tơnêi têa tŏng kum ôh tá xo tơvêh dêi kong têa ê hơnăm 2020; tơ’nôm kơxô̆ liăn tơnêi têa tŏng kum ôh tá xo tơvêh hơnăm 2021 vâ tơniăn tŭm vâ chêh tung mơ-éa mơ’no hrê liăn, chêh tơbleăng kơxô̆ liăn ngân mơ’no hrê mơ’nui hơnăm.

A roh hôp, pôa Vương Đình Huệ, Kăn xiâm hnê ngăn Kuô̆k hô̆i tối ăm ‘nâi, tiô Luât liăn ngân Tơnêi têa, rêm kơxô̆ liăn tŏng kum ôh tá xo tơvêh tâng ai châ lo pakong, mơ’nhê tê kơtê cho hnoăng dêi kơ koan pơkuâ tơnêi têa. Kăn xiâm hnê ngăn Kuô̆k hô̆i tối rơdêi kơxô̆ liăn tŏng kum ôh tá xo tơvêh chêh tung mơ-éa tâi tâng vâ tơbleăng tối mơ’nui hơnăm ƀă hnoăng ối tung Kuô̆k hô̆i. Kăn xiâm hnê ngăn Kuô̆k hô̆i xuân pơkâ thế klâ krê vaccine lo ing kơxô̆ liăn tŏng kum ƀă mot tung tơdroăng pêi dêi khu xêo tơmeăm khoăng tơnêi têa.

Hâi kố, lơ 16/3, Vi ƀan pơkuâ Kuô̆k hô̆i mơdoh môi hâi vâ tơkŭm po kơ-êng ƀă tiâ rơkong kơ-êng dêi kăn teăng mâ Kuô̆k hô̆i ƀă 2 ngế kăn xiâm tung Chin phuh. Pôa Nguyễn Hồng Diên, Ngế xiâm pơkuâ kơmăi kơmok – tê mơdró ƀă pôa Trần Hồng Hà, Ngế xiâm pơkuâ loăng pơlái kong kế ƀă kong prâi kô tiâ rơkong kơ-êng apoăng dêi Vi ƀan pơkuâ Kuô̆k hô̆i hneăng má 15.

A Sa Ly tơplôu ƀă tơbleăng