VOV4.Xơ Đăng - Pơtối tơdroăng roh hôp tơdroăng ‘na luât khế 9, kơxo lơ 22/9, Vi ƀan pơkuâ Kuô̆k hô̆i tơpui Tơdroăng tơkêa bro luât (‘mâi rơnêu). Kố cho môi tơdroăng tơkêa bro luât kân, kơnâ, kal tung tơdroăng cheăng kâ – rêh ối pơlê pơla dêi tơnêi têa, ai tơdjâk trâu hơngế troh hên tơdroăng cheăng kâ – rêh ối pơlê pơla dêi tơnêi têa. Tiô tối hdrối, tơdroăng tơkêa bro Luât kố kô châ Kuô̆k hô̆i tơpui tơno, tơpui roh apoăng a hneăng hôp má 4, Kuô̆k hô̆i hneăng má 15.

Vi ƀan pơkuâ Kuô̆k hô̆i tơpui tơno tơdroăng tơkêa bro Luât tơnêi tơníu (‘mâi rơnêu)

Cho kơ koan pêi pro tơdroăng cheăng pơkuâ tơnêi têa ‘na kơvâ tơnêi tơníu, pôa Trần Hồng Hà, Ngế xiâm pơkuâ loăng pơlái kong kế ƀă kong prâi tối ăm ‘nâi: Tơdroăng tơkêa bro Luât tơnêi tơníu (‘mâi rơnêu) tơmiât troh pơkâ rak tơniăn mơnhên yă tơnêi tơbleăng, tơdrăng ƀă tơtro ƀă yă kơchơ tê mơdró vâ kuăn pơlê ƀă khu tê mơdró pơrá châ pơxúa. Pôa Trần Hồng Hà xuân tối nhên, tơdroăng tah lôi khu yă tơnêi cho kal khât ƀă xúa yă tơnêi tơtro ƀă kơchơ tê mơdró tâ.

            A Sa Ly tơplôu ƀă tơbleăng