VOV4.Xơ Đăng - Kơxê lơ 9/2, pôa Khuất Việt Hùng, Kăn phŏ hnê ngăn pơkuâ Vi ƀan rak tơniăn troăng klông Tơnêi têa rơtế khu râ kăn pêi cheăng mot a Gia Lai vâ séa ngăn tơdroăng, tơrŭm khu râ kăn pơkuâ kong pơlê hnê mơhno kum tơkâ hluâ pá puât tung tơdroăng tơklâm rơxế ki râ ó pro 6 ngế hlâ, 3 ngế tro rong a kơxo rơtế môi hâi. Klêi kơ’nâi ai tơdroăng tơklâm rơxế, kăn teăng mâ Khu rak tơniăn troăng klông kong pơlê Gia Lai hiăng troh lăm kơ-êng, hơlêm ƀă tŏng kum 3 rơtuh liăn/môi ngế tro rong, rêm rơpŏng ai ngế hlâ cho 5 rơtuh liăn.

Vi ƀan rak tơniăn troăng klông Tơnêi têa pêi cheăng a kong pơlê Gia Lai

Tơring Đăk Đoa xuân tŏng kum 3 rơtuh liăn/môi ngế tro rong ƀă 5 rơtuh liăn ăm rơpŏng ai ngế hlâ. Klêi kơ’nâi roh pêi cheăng, Khu râ kăn pêi cheăng dêi Vi ƀan Rak tơniăn troăng klông Tơnêi têa hiăng troh kơ-êng, mơhnhôk mâu rơpŏng ai ngế hlâ tung roh tơklâm rơxế râ ó tơkâ hluâ tơdroăng châi khéa, pơtối mơ-eăm tung tơdroăng rêh ối.

A Sa Ly tơplôu ƀă tơbleăng