Mâu tơdroăng tơbleăng tơdjuôm mê cho: Tơbleăng tơdjuôm pro athế thăm plĕng trâu tâ tung tơrŭm hên kơvâ cheăng pơla Việt Nam ƀă  Australia; Tơbleăng tơdjuôm ‘na mơdêk ki kâi trâng, ki hmâ ƀă ‘mâi mơnhông cheăng kâ Việt Nam - Australia; tơbleăng tơdjuôm ‘na mơdêk tơdjêp khoa hok kŏng ngê̆  ƀă pơ’lêh nếo hriĕn plĕng ki nếo pơla Việt Nam ƀă Australia. Mâu hlá mơ-éa chêh tơrŭm cheăng tá tâi tâng hên kơvâ cheăng, mê cho mâu hlá mơ-éa chôu pâ ‘na tơrŭm tung mâu kơvâ chiâk deăng ƀă mơnhông thôn pơlê krá ton, pêi pro tro luât a têa kơxĭ, tơrŭm  kơjo kum dêi rơpó tung kơvâ cheăng lêng kring tơniăn, tơrŭm ‘na hnê cheăng pêi, kơvâ pơkeăng khăm pơlât, kơvâ cheăng kâ kơxô̆ ƀă tơrŭm ‘na chơ tơmeăm ƀă troăng tơƀai.

Hneăng pôa Tô Lăm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă mâu kăn kăn xiâm Tơnêi têa Việt Nam lăm pôu kng têa Australia hiăng pơtối mơnhông mơdêk hiâm tuăn loi nhoăm kal kí a râ ki kân má môi, pro xiâm ki nếo a hnoăng tơbleăng pêi tơƀrê hôm tâ tơrŭm tung tŭm kơvâ cheăng, hlối pơkâ troăng kơjo pêi hdrối tơrŭm cheăng tung mâu hơnăm la ngiâ; pro rôh tơ’lêi vâ mâu kăn xiâm péa tơnêi têa tơpui trâu rơdâ tâ ‘na tơdroăng cheăng ki kal tung kơpong ƀă lâp plâi tơnêi ki péa kâ kal tơmâng, tí tăng ‘nâi plĕng, mơdêk tơrŭm a mâu luât pơkâ dêi hên troăng, ing mê tối tơhrâ tơdjuôm ƀă rak hơniâp lĕm, tơniăn, tơrŭm cheăng ƀă mơnhông krá tơniăn ton a kơpong ƀă tung lâp plâi tơnêi.