Péa pâ mơnhên tối khât tơdroăng ki mơnhông tơƀrê dêi tơrŭm cheăng pơla péa pâ tung pơla hdrối nah ƀă môi tuăn mơdêk tâk troh kong têa tơrŭm cheăng tung la ngiâ. Ƀă tơdroăng pơkâ kố, Bulgaria chiâng kong têa ki apoăng a kơpong Balkan mơjiâng tơrŭm cheăng kong têa tơrŭm tung la ngiâ ƀă Việt Nam. Péa ngế kăn pơkuâ môi tuăn po rơdâ tơrŭm cheăng ai pơxúa tung mâu kơvâ cheăng ki péa pâ ai rơdêi ƀă rơhêng vâ khoa hok – kong ngê̆, pơkeăng, y sinh hok, pơhlêh kơxô̆, on tơhrik ngiât.

Péa pâ xuân hiăng môi tuăn mơjiâng ƀă tơbleăng pêi túa pơkâ pêi pro kong têa tơrŭm cheăng tung la ngiâ, ăm tơrŭm cheăng khoa hok - kong ngê̆ chiâng tơdroăng ki kal tung tơrŭm cheăng pơla péa pâ, veăng gum mơdêk tơrŭm tŭm tơdroăng, tơƀrê ƀă krá ton tung hneăng ki nếo.