Vâ tơdroăng ki kơnía mot tung tơdroăng ron ton mê nah cho mâu hâi pêi cheăng ôh tá ai pơtê dêi mâu khu kăn ƀô̆, drêng tung kơpeăng kŏng ôh tá ai ki klâi pakĭng hiêm mơno ki pêi tâi ivá ƀă tơmiêt pêi rơkê. Môi kơbong pêi cheăng 30 met karê, môi to micro, to lâi to tăng âm pơhlêh lĕm tâ hdrối ƀă xúa mâu pơkhom ƀă prế kâng tât tâ tá hiăng chiâng kơbong thâu hrik apoăng dêi Rơ’jíu Việt Nam.

Hâi lơ 2/9/1945, drêng Pôa Hồ pơchuât Tơbleăng châ tơniăn krê, mâu kih thuât viên hiăng tơdrêng thâu hrik idrâp chuât ing Plông kân Ba Đình troh rơtuh plâi nuih, mơhé kơmăi kơmok tơ’lêi hlâu tê ƀă tơmeăm vâ pêi cheăng cho ôh tá ai tŭm pro pá puât ‘nâng.

Sap mơ’nui hơnăm 1946, drêng lâp tơnêi têa xông tơplâ xâ Pơhlăng, Rơ’jíu Việt Nam mot a mâu khế ki lĕm má môi: prôk u tâi utá vâ rak kơmăi kơmok, rak hyôh. Bu krê 9 hơnăm tơplâ xâ Pơhlăng, Rơ’jíu hiăng 14 xôh prôk lăm utâi utá , sap ing Bạch Mai troh hngêi chuô Trầm, klêi mê Bó Lù – Ba Bể, Hát Môn ƀă hiá hé.

Klêi kơ’nâi 1975, tơnêi têa tơmot chiâng môi, Rơ’jíu Việt Nam mot a hneăng pro tơniăn ƀă po rơdâ. Sap hơnăm 2009, pêi pro mơ’no hyô Biển Đông mơ’no hyôh 3 kơpong têa kơxĭ hơhngế cho kơpong Hoàng Sa, Trường Sa ƀă kung king têa kơxĭ Siam. Hơnăm 2020, Rơ’jíu Việt Nam mơjiâng Rơ’jíu mơ’no hyôh kơpong Nam Trung bô̆ vâ mơ’no hyôh ƀâng VOV1, VOV5 (nâl Ăng-glê ƀă nâl Sinuâ) mơ’no hyôh a kơpong têa kơxĭ rơlố Trường Sa ƀă hyôh trung (MW) kum pơtâng tối, tơniăn gâk kring kal kí ƀă mơnhên hnoăng pơkuâ tơnêi têa a têa kơxĭ.

80 hơnăm hiăng hluâ, ing micro kŭn troh tơdroăng mơ’no hyôh lâp tơnêi têa, Rơkong tơpui Việt Nam chuât hơhngế, tơdjêp mâu kông hyôh tơdjêp rơtuh plâi nuih. Pôa Phạm Mạnh Hùng – Phŏ Kăn xiâm pơkuâ Rơ’jíu Việt Nam tối nhên: Rơ’jíu Việt Nam đi đo hâk tơngăm cho kơ koan chêh hlá tơbeăng apoăng xua Pôa Hồ mơjiâng klêi kơ’nâi Kăch măng Khế tơheăm, tơrŭm ƀă tơdroăng roh ton nah mơnhông dêi tơnêi têa ƀă ai veăng kum kal khât plâ 80 hơnăm hiăng hluâ:

‘’Tơdroăng roh nah mơnhông 80 hơnăm hiăng hluâ dêi Rơ’jíu Việt Nam, ing roh mơ’no apoăng hâi lơ 7/9 hơnăm 1945 troh hneăng pơhlêh nếo nôkố. Drêng mê nah Rơ’jíu cho kơ koan chêh hlá tơbeăng apoăng châ Pôa Hồ mơjiâng tung rơxông nếo. Kơ’nâi mê cho Rơ’jíu tơrŭm tơdrêng ƀă hên tơdroăng ki kal dêi tơnêi têa, môi tiah roh tơplâ xâ Pơhlăng, chiâng ai tơdroăng ki ƀlêi trâng hơnăm 1954, klêi mê roh tơplâ xâ Mih tŏng gum tơnêi têa troh ƀlêi trâng rơnó hơngưi 1975. Klêi mê mâu hneăng pơhlêh nếo mê tơdroăng ki veăng dêi khu ngế chêh hlá tơbeăng, rah chêh hlá tơbeăng dêi Rơ’jíu ƀă tơdroăng mơhynhôk ăm mâu troăng pêi nếo ‘na mơnhông cheăng kâ vâ kum rơtế hlá tơbeăng lâp tơnêi têa, rơtế kuăn pơlê tối, rơtế Đảng ƀă Tơnêi têa prôk troh môi tơdroăng pơhlêh nếo tâi tâng tơnêi têa ƀă tá tung chal vâ po roh tơ’lêi mot tơrŭm lâp plâi tơnêi ƀă pơxiâm hbrâ ăm chal xông mơ-eăm xêh’’.

Mot a hneăng nếo, Rơ’jíu Việt Nam tơtrŏng pêi pro hnoăng cheăng pơtâng tối tơdroăng kal, pơtâng tối mâu tơdroăng, veăng kum gâk kring Tơnêi têa ƀă mơnhông tơnêi têa, tơmiêt troh mâu hdró 100 hơnăm mơjiâng Đảng Kŏng san Việt Nam ƀă 100 hơnăm mơjiâng tơnêi têa Kŏng hoa xah hô̆i chưh ngiah Việt Nam. Nôkố Rơ’jíu mơnhông tơdrêng hlá tơbeăng in, hlá tơbeăng điên tưh, rơ’jíu, tơdroăng xiâm xúa kŏng ngê̆; mơnhông tơdroăng ki rơdêi vâ chiâng kơ koan hlá tơbeăng ki xiâm, chêh mâu tơdroăng ki xiâm, loi tơngah, rơkê, ai ivá djâ pơlê pơla, kum kuăn pơlê hlê plĕng nhên tơdroăng xiâm tung tơnêi têa ƀă lâp plâi tơnêi, mơjiâng tơdroăng ki xiâm pơlê pơla, mơnhông tơdroăng tơrŭm môi tuăn ƀă pơtroh tơdroăng ki hâk vâ ăm tâi tâng kuăn pơlê.

Xông tơpui a tíu mơđah tơbleăng ‘’80 hơnăm Rơkong tơpui Việt Nam rơtế tơnêi têa’’, pôa Đỗ Tiến Sỹ, Kăn cheăng tung Tíu xiâm Đảng, Kăn xiâm pơkuâ Rơ’jíu Việt Nam tối rơdêi:

‘’Rơ’jíu Việt Nam ƀă cho kơ koan chêh hlá tơbeăng ki xiâm tơnêi têa kô pơtối xúa mâu kŏng ngê̆ nếo má môi vâ pêi pro hnoăng cheăng kal kí châ hnê hriâm ƀă pêi pro mâu tơdroăng tơkêa bro, tơdroăng tơrŭm cheăng tơdjâk, gum mơnhông hiêm mơno hâk tơngăm hdroâng mơngế, tơbêng hiêm mơno pâ nhuô̆m tơnêi têa, troh lâp lu tơdroăng pói vâ hơniêp lĕm ƀă tơdroăng loi tơngah krá tơniăn tung la ngiâ mơnhông mơdêk kro mơdrŏng chal mơ-eăm dêi hdroâng mơngế Việt Nam’’./.