Kơxo hâi lơ 21/1, pôa Đỗ Tiến Sỹ, Ngế cheăng tung Tíu xiâm Đảng, Ngế cheăng tung Khu kăn Đảng ƀô̆ Chin phuh, Kăn hnê ngăn Đảng ủy, Pơkuâ xiâm Rơ’jíu Việt Nam hiăng troh lăm ngăn, mơhnhôk thế mâu ngế chêh hlá tơbeăng, mâu ngế rah chêh, mâu cheăng kih thuât dế xup hrik xo chêh mâu tơdroăng a kơpong dêi VOV a Tíu xiâm hlá tơbeăng hneăng Hôp kân 14.

Mơhnhôk thế mâu ngế chêh hlá tơbeăng, mâu ngế rah rêh, mâu cheăng kih thuât hlối tăng ngăn vâ ‘nâi mâu kăn tơpui tối mâu tơdroăng ki ai chêh tung Hlá mơ-éa pơtroh ăm hneăng Hôp tung rôh hôp a hngêi hôp kân kơxo hâi lơ 21/1, pôa Đỗ Tiến Sỹ pơkuâ Rơ’jiu xiâm Việt Nam pơkâ thế mâu ekip dêi tơrêm tíu pêi cheăng pơtối tơmâng xup xo, chêh nhên, tro mâu tơdroăng a hneăng Hôp 14 dêi Đảng.

Tung mê, Ban Thời sự VOV1 chêh rĕng mâu tơdroăng tơpui hên vâ mơ’no tung hyôh Rơ’jiu, pơtroh mau tơdroăng kal dêi tơdroăng tơpui â hneăng hôp troh mâu kăn ƀô̆, đảng viên ƀă kuăn pơlê. Ngế pơkuâ Rơ’jíu xiâm Việt Nam VOV pơkâ thế mâu ngế chêh hlá tơbeăng thế tơmâng chêh, xup xo nhên, tro, ai tơ’nôm mâu tơdroăng rơtâ tá dêi hneăng Hôp kân vâ veăng ‘no hnoăng mơhno tuăn loi a mâu tơdroăng kal ai tơpui a hneăng Hôp, malối cho ƀai tơbleăng dêi pôa Tô Lâm - Kăn xiâm pơkuâ hnê ngăn Đảng ƀă mâu ƀai chêh tơbleăng dêi mâu kăn.