VOV4.Sêdang - Tiô tơbleăng rĕng dêi Khu xiâm pơkuâ hnê hriâm ƀă Hnê mơjiâng tuăn ngôa rơkê, hâi tơ’noăng má môi, Hneăng tơ’noăng mơgêi râ má pái phôh thong hơnăm 2021, tâi tâng kơxô̆ hok tro troh veăng tơ’noăng tŭm 2 môn Ngưh văn ƀă Toăn pơrá châ lối 97% tâng pơchông ƀă kơxô̆ hok tro kĭ veăng tơ’noăng. Lâp tơnêi têa ai 9 ngế hok tro pro xôi pơkâ tro ăm pơtê tơ’noăng.

Tiô mơnhên apoăng dêi hok tro, thái cô ƀă pơlê pơla, ko ƀai tơ’noăng môn Ngưh văn ƀă tơ’noăng môn Toăn ối tung tơdroăng hnê hriâm phôh thong, ai rah tơtro. Mâu Hô̆i đong tơ’noăng hiăng pêi pro tơtro mâu troăng hbrâ mơdât COVID 19 ƀă pêi pro mâu troăng hbrâ xua mê hiăng tơleăng teăm tơdrêng mâu tơdroăng ki ôh tá tro, rak tơniăn tơkŭm po tơ’noăng tơniăn, kơtăng.

Hâi lơ 8/7, hâi tơ’noăng má mơ’nui dêi roh 1, Hneăng tơ’noăng mơgêi râ má pái phôh thong hơnăm 2021, peăng kơxo mâu hok tro tơ’noăng ƀai tôh hơp Khoa hok Tư̆ nhiên lơ Khoa hok xah hô̆i, peăng kơxê hok tro tơ’noăng môn kong têa ê.

            A Sa Ly tơplôu ƀă tơbleăng