VOV4.Sêdang - Kơxo lơ 15/6, a Hà Nội, Khu xiâm ngăn chiâk deăng ƀă Mơnhông thôn pơlê tơrŭm ƀă kăn teăng mâ mâu Khu xiâm tơpui kâ, khu xiâm ngăn pơkeăng, Khu xiâm ngăn kế tơmeăm khoăng tung têa a tơnêi ƀă hyôh kong prâi, Khu xiâm ngăn cheăng kơmăi kơmok ƀă tê mơdró, Khu xiâm pơkâ ‘no liăn cheăng, Khu lâp kong têa dêi Việt Nam ƀă mâu khu ki tơrŭm cheăng cho kong têa, mâu viê̆n hriăn ngăn, hngêi trung đăi hok, mâu khu mơdró kâ, khu tơrŭm tơroâ ƀă mâu khu ki ai tơdjâk, khu tơrŭm tơpui kâ tơnêi têa rôh má môi a Hà Nội.

Kố cho tơdroăng tơkŭm po ki kal vâ hbrâ ăm Việt Nam veăng tung rôh hôp khu kăn xiâm ‘na kế tơmeăm kâ dêi Khu lâp kong têa po a khế 9 hơnăm kố. Hneăng hôp khu kăn xiâm hơnăm 2021 dêi Khu lâp kong têa vâ pơkâ troăng prôk ăm mâu kế kâ châ mơnhông krá tơniăn tâ, tâi tâng tâ ƀă ai ivá kâi chiu tro tâ, pro chiâng ivá tơdjâk ki hên troăng vâ pêi pro châ tơƀrê mâu tơdroăng pơkâ mơnhông krá tơniăn a hơnăm 2030.

Hneăng hôp kố tơkŭm cho ăm rơkong tơpui tối tung mâu tơdroăng pơkâ pêi pro tung mê ai: rak tơniăn hnoăng ki pơtroh pơtối ‘na mâu kế tơmeăm xúa tơniăn ƀă pro tơdâng ‘na trếo piê kơhiâm ăm rêm ngế ki xúa; hơ’lêh troăng ki xúa tiô troăng ki rơdêi ƀă krá tơniăn; mơdêk pro achê ƀă tơnêi tơníu; mơdêk tơdroăng ki pro tơdâng tơ’mô tung tơdroăng ki veăng kum ‘na ki kơnía ƀă tơdroăng cheăng kâ, mơjiâng tơdroăng ki kâi trâng ‘na mâu tơdroăng ki kô trâm tung la ngiâ.

Katarina Nga tơplôu ƀă tơbleăng