VOV4.Sêdang - Khu xiâm ngăn Đoân droh rơtăm Kŏng san Hồ Chí Minh, Khu xiâm ngăn ‘na Khu tơrŭm Droh rơtăm Việt Nam nếo tơkŭm po tơdroăng ki veăng kum yă tê rôe tơmeăm ăm khu droh rơtăm cho kŏng nhân ƀă kuăn pơlê, dó inâi “Veăng kum xua tuăn hiâm hơ-ui pâ, tơdjoâm ivá tơkâ luâ pơreăng”. Kố cho tơdroăng cheăng ki pêi pro tiô rơkong krếo thế dêi Ngế pro xiâm hnê ngăn Chin phuh tung tơdroăng veăng tơdjoâm ivá, mơhno tối tuăn mơno ki hơ-ui kum dêi pó, tơveăng dêi pó pơla khu droh rơtăm kŏng nhân ƀă mâu rơpŏng ki dế trâm pá xua ai tơdjâk ki tâ tú dêi pơreăng kân COVID-19.

Tơdroăng kố châ tơbleăng sap ing hâi lơ 15/7/2021 troh hâi lơ 30/6/2022. Ki nhên gá, drêng roê mâu kế tơmeăm ki kal vâ xúa ing App mua sắm MEGA1 lơ ing mâu tíu ki tê ukố umê dêi tơdroăng, droh rơtăm kŏng nhân, kuăn pơlê kô châ mâu khu mơdró kâ, inâi veăng tung tơdroăng kố kơdroh yă troh tơdế ƀă yă tê mâu kế tơmeăm.

Nôkố, tơdroăng kố ai tơdroăng ki tŏng kum dêi hên khu mơdró kâ tung tơnêi têa. Pôa Nguyễn Ảnh Nhượng Tống, kăn hnê ngăn Hô̆i đong kuan trĭ Kŏng ti Tơlo liăn Grup yeah1, tíu pêi cheăng tơrŭm pêi pro ăm ‘nâi, nôkố, tơdroăng kố dế tê mâu kế tơmeăm ki kal xúa môi tiah phái, têa tôu ro, têa măm, têa tương, têa rơmâ ƀă hên ki ê.

Pakĭng mê, vâ tơdjuôm ivá rơtế ƀă mu mâu, khu mơdró kâ, mâu ngế krê ki ai tơdroăng rêh ối xơpá xua COVID-19, kŏng ti Tơlo liăn Grup Yeah1 xuân hiăng pêi cheăng tơdrêng ƀă mâu tíu pêi cheăng mê vâ kơdroh yă tê ăm kuăn pơlê:

“Ngin hiăng kơchuâ chêh combo vâ tiah lâi mâu ngế ki roê xúa rêm khế bu ‘no hrê lối 100 – 200 rơpâu liăn hiăng châ roê tŭm kế tơmeăm xúa rêm khế, ngin xuân mơ’no tối mâu tơdroăng ki kơdroh iâ vâ mâu ngế ki roê xúa chiâng vâ roê 1  combo/khế. Nôkố ivá mơjiâng pro tung khế kố mơ’no tối châ dâng tá hâi troh 50 rơpâu liăn combo pơkâ khế kơ’nâi kô tâk troh 200 rơpâu liăn combo, rế hía xuân rế tâk tâ”.

Pôa Nguyễn Ngọc Dũng, kăn phŏ hnê ngăn Khu tơrŭm Tê mơdró điê̆n tưh Việt Nam ăm ‘nâi: Khu tơrŭm kô rơtế ƀă tơdroăng kố, ‘na tơdroăng ki tơrŭm mâu tíu tê mơdró điê̆n tưh ki kân tung tơnêi têa ƀă mâu khu mơdró kâ tung kơvâ ki pơtroh rĕng kô kum ăm mâu kế tơmeăm troh ƀă mâu ngế ki roê xúa.

“Pakĭng tơdroăng ki Khu tơrŭm điê̆n tưh ăm tơdroăng kố mê ăm mâu kế tơmeăm troh ƀă mâu ngế ki roê xúa rĕng má môi, nôkố khu tơkŭm po xuân dế tơkŭm tâi tâng mâu nhŏng o vâ pro tiah lâi pro chiâng tơdroăng ki séa ngăn ki dâi lĕm dêi kế tơmeăm, tơhrâ yă tê rơpâ vâ pơtroh ăm mâu ngế ki roê xúa, ôh ti ai tơdroăng ki mơdêk yă ‘na ki dâi lĕm lơ pro kuăn pơlê tơmiât tiah kố mơdêk yă mê ah kơdroh yă”.

Tơbleăng ai 63 to kong pơlê, pơlê kong kân tung lâp tơnêi têa, laga, tơdroăng kố dế kơjo kum tơbleăng a mâu kong pơlê, pơlê kong kân dế ai pơreăng kân COVID-19 ki dế ôh tá tơniăn. Ki nhên gá, tung mâu khế 7, 8, 9, tơdroăng kố kô kum ăm Pơlê kong kân Hồ Chí Minh, Bình Dương ƀă mâu kong pơlê ki achê. Tơdroăng ki kô po rơdâ tung mâu khế ki pơtối ngăn tiô kơ tơdroăng ki ai khât.

Hdrối mê, vâ tŏng kum vâi krâ nhŏng o kuăn pơlê ki pêi chiâk deăng tê dêi kế tơmeăm, tơtro ƀă rôh ki ai pơreăng COVID-19, Tíu xiâm Đoân Droh rơtăm Kŏng san Hồ Chí Minh hiăng tơkŭm po tơdroăng “Tơdjêp kế tơmeăm pêi lo ing chiâk deăng – Tơrŭm tơdroăng ki pâ nhuô̆m – Tơdjuôm ivá tơkâ luâ pơreăng kân”. Mâu khu mơdró kâ, tíu pêi cheăng hiăng tơhrâ tơdjuôm ivá tơniăn tơdroăng rêh ối pơlê pơla, tŏng kum mâu ngế pêi cheăng tơkâ luâ pơreăng COVID-19. Tơdrêng amê hnối tơbleăng châ tơƀrê Rôh mơhnhôk “mâu ngế Việt Nam kơjo xúa kế tơmeăm Việt Nam mơjiâng pro”.

Ngoh Ngô Văn Cương, kăn pơkuâ ngăn Tíu xiâm Đoân tơpui a rôh po tơdroăng cheăng

Tiô kăn pơkuâ ngăn má môi Tíu xiâm Đoân Droh rơtăm Kŏng san Hồ Chí Minh cho pôa Nguyễn Anh Tuấn ăm ‘nâi, ƀă tơdroăng ki tơdjêp kế tơmeăm pêi lo ing chiâk deăng ing mâu tíu ki tê tơdrêng ƀă tê ing măng pơlê pơla, Đoân droh rơtăm tơrŭm ƀă mâu Khu xiâm, kơvâ cheăng, mâu khu tơrŭm tơdroăng kal kí pơlê pơla xúa ivá rơdêi dêi tíu, xúa ki pơxúa dêi tơdroăng hơ’lêh kơxô̆ vâ tŏng kum tê kế tơmeăm pêi lo ing chiâk deăng tơƀrê má môi ăm vâi krâ nhŏng o tung rơnó ki ai pơreăng kố:

“Ngin loi tơngah tiah kố hiâm mơno rơkê plĕng tŏng kum kố kô pơtối châ mơdêk tung la ngiâ ôh ti xê tơdjêp kế tơmeăm pêi lo ing chiâk deăng mê ối veăng tŏng kum tơdroăng ki pâ nhuô̆m tơdjuôm ivá tơkâ luâ rôh ki ai pơreăng kân kố mê ối veăng kum rơtế ƀă khu ngăn pêi chiâk deăng ƀă Mơnhông thôn pơlê pêi pro châ tơƀrê hnoăng cheăng ‘na hơ’lêh ƀă mơnhông pêi chiâk deăng tung hneăng ki nếo”.

Ƀă tơdroăng ki veăng kum tơdroăng ki xơpá rơtế ƀă hrĭng rơtuh rơpŏng Việt Nam ing tơdroăng ki tŏng kum yă tê kế tơmeăm xúa ki kal, tơdroăng kố xuân hiăng veăng kum pêi pro ai pơxúa “tơdroăng pơkâ pêi péa tơdroăng” rế hbrâ mơdât pơreăng tơƀrê, rế rak vế, mơjiâng pro tê mơdró kế tơmeăm ing tơdroăng ki kum lối rơtuh ngế pêi cheăng, mâu kŏng nhân a mâu hngêi kơmăi, tíu pêi cheăng mơjiâng pro kế tơmeăm kơdroh iâ tơdroăng ki mơni kô hía tơdroăng cheăng xua tơdjâk ing pơreăng COVID-19, rơtâ tâ nếo cho veăng kum mơdêk tơdroăng cheăng kâ ‘na mâu ngế ki roê xúa.

VOV1

Katarina Nga tơplôu ƀă tơbleăng