Pôa Như Văn Nhuận, ối a thôn 3, cheăm Liêng Srônh, tơring Dam Rong, kong pơlê Lâm Đồng tối ăm ‘nâi, troăng kân 27 pá ngiâ hngêi pôa nếo ‘mâi rơnêu ahdrối Têt Lo hơnăm nếo kố nah, 2 khế kơ’nâi mê troăng hiăng tơ’nhê, kơhlong kơhlăng. Troăng kơpong kố đi đo tro tơ’nhê, đi đo ‘mâi rơnêu, pro kuăn pơlê nhôm tơdroăng ‘mâi rơnêu mê ôh tá tơdrăng.

‘’Hlo vâi xuân ‘no rơxế ki kân kơtâk la ôh tá ‘nâi ai kế ki klâi ga tơ’lêi tơ’nhê ó khât, á xuân ôh tá hâi ‘nâi. Tơdroăng ‘mâi ronêu troăng kơpong kố châ 1 km. Mâu rơxế ki kơtâu tơkâ luâ a kơpọng kố rơxế kơtâu môi tiah mot tung trâp, tung thông tâk chu tâk chu. Vâi dế ối ‘mâi rơnêu troăng kơpong kố râ’’.

Hên kơpong troăng ki nếo ‘mâi rơnêu la hiăng tơ’nhê

Xuân môi tiah mê, troăng ki tơkâ troh a thôn Trung Tâm, cheăm Phi Liêng, tơring Dam Rong xuân đi đo ‘mâi rơnêu ga pro pá ăm tơdroăng prôk lăm pêi cheăng kâ dêi kuăn pơlê. Jâ Đỗ Thị Loan, ối a thôn Trung Tâm hêng hôu tối:

‘’Tiô á hlo nôkố, tơnêi têa hiăng ‘no liăn, tâng khu ki mơjiâng, rơnêu troăng kố pro ti lâi tâng ôh tá krá kâk păng ‘nâng xuân athế ki krá le\m ga châ dâng 80, 90%. Troăng ki klâi hlo vâi ‘mâi rơnêu nếo apoăng hơnăm nah, mơ’nui hơnăm hiăng ai khu ki lăm mơnhên ngăn, la troh apoăng hơnăm nếo hiăng tơ’nhê tâi tâng. Klêi ‘mâi rơnêu la hiăng tro tơ’nhê’’.

A ngiâ troăng kơhlong kơhlong, tơhnâp maluâ nếo klêi ‘mâi ai 2 khế

Tiô pôa Phạm Văn Thái Bình, Kăn pơkuâ ngăn troăng prôk, ối tung Khu ngăn ‘na troăng prôk a kong pơlê Lâm Đồng hơnăm 2019 ăm ‘nâi, khu kố hiăng châ tơnêi têa mơ’no ăm lối 7 rơtal liăn vâ ‘mâi rơnêu 7km troăng kân 27. Khu ki mơjiâng troăng hiăng ‘mâi ronêu pro troăng [ă ok [ê tong hbo châ 5cm. Bu to lâi khế mê troăng hiăng kơhlong kơhlăng. Pôa Phạm Văn Thái Bình tối troăng khoh tơ’nhê cho xua ing kong tôu, kong mêi.

‘’Xua tơdroăng ‘mâi rơnêu mê tro a rơnó tô mê ngin ôh tá châ ‘nâi tung kơdâm ai têa mo\ng. Xua hdrối troăng vâ tơ’nhê klêi mê ai têa plo\ng lo rơgok ing kơdâm, ngin ôh tá ‘nâi. Drêng ‘mâi rơnêu ngin xuân ôh tá ‘nâi ai kế ki klâi. Klêi kơ’nâi hiăng ‘nâi nhên tơdroăng kố, Khu ngăn ‘na troăng prôk kong pơlê hiăng pơkuâ thế ăm ngin ‘mâi rơnêu’’.

Dế nôkố, Tây Nguyên hiăng mot tung rơnó mêi hngêi. Tơdroăng ki pơtối ‘mâi rơnêu troăng kân 27 ki mot á Lâm Đồng tá hâi ai kơbố khên tối kô krá kâk tơniăn ton, xua kong tô kong mêi hên.

Tuấn Anh chêh

Nhat Lisa tơplôu [ă tơbleăng