VOV4.Sêdang - Vâ mơnhên mâu tơdroăng tơ’lêi hlâu, pá puât, tơpui ‘na troăng rơnêu, xúa roh tơ’lêi hlâu vâ rak tơdroăng mơnhông mơdêk tơniăn kơvâ xi xŏng tung rơxông nếo, kơxo lơ 16/7, a Hà Nội, Khu xiâm pơkuâ ‘na pêi chiâk deăng ƀă mơnhông mơdêk thôn pơlê tơkŭm po hneăng hôp mơ’no tơdrêng tung um tơvi ‘na ‘’Troăng mơnhông mơdêk kơvâ xi xŏng hơnăm 2021 ƀă pêi pro Pơkâ dêi Ngế pro xiâm hnê ngăn Chin phuh ‘na tơdroăng kĭ troăng mơnhông mơdêk păn ká xi xŏng Việt Nam troh hơnăm 2030, tơmiât pêi troh hơnăm 2045’’.

Tung 6 khế apoăng hơnăm kố, kơxô̆ xi xŏng a têa long ai tơvât ƀă têa kơxĭ châ 371 rơpâu tâ̆n, tâk 12% tâng pơchông ƀă roh kố hơnăm 2020. Pakĭng mâu tơdroăng châ tơƀrê, mơnhên tơdjuôm ‘na kơvâ xi xŏng Việt Nam ăm hlo, ối trâm hên ƀă tơdroăng pá puât ƀă ôh tá mơhúa xua păn tơdrêng lối hên, pơreăng COVID 19 xông tâ tú ó ƀă tơbriât tê mơdró lâp plâi tơnêi ôh tá ‘nâi tối hdrối.

Pêi pro tiô troăng mơnhông păn ká xi xŏng Việt Nam troh hơnăm 2030, tơmiât pêi troh 2045 hiăng châ Ngế pro xiâm hnê ngăn Chin phuh kĭ kô tơmiât pêi troh pơkâ mơdêk păn xi xŏng châ 3% troh 4%/hơnăm; tâi tâng kơxô̆ xi xŏng châ 9,8 rơtuh tâ̆n; pêi lo liăn tê ngi kong têa châ sap 14 rơtal troh 16 rơtal dollars ƀă tăng cheăng pêi ăm lối 3,5 rơtuh ngế pêi cheăng.

A Sa Ly tơplôu ƀă tơbleăng