VOV4.Sêdang - Kơxo lơ 29/6, Khu xiâm riân ngăn tơmeăm khoăng tơbleăng kơxô̆ riân ngăn cheăng kâ rêh ối pơlê pơla 6 khế apoăng hơnăm. Ki rơhêng vâ tối, maluâ, tung pơla ai pơreăng COVID -19 tâ tú a hên kong pơlê, la tâi tâng kế tơmeăm GDP 6 khế apoăng hơnăm xuân ối tâk 5,64%. Tung kơlo tâk tơdjuôm dêi tâi tâng kơvâ cheăng kâ tung tơdế apoăng hơnăm kố, kơvâ pêi chiâk deăng, loăng pơlái, ká xi xŏng tâk 3,28% kơxô̆ tâng vâ pơchông ƀă khế kố hơnăm nah. Tơdroăng cheăng liăn ngân, hngêi rak liăn ƀă ƀaoh hiêm tâk 9,27%. Kơpong pêi cheăng ƀă kơmăi kơmok ƀă mơjiâng pro kế tơmeăm tâk 8,36%.

Maluâ tung pơla ai pơreăng tơdjâk troh cheăng kâ, tê mơdró la kơxô̆ mâu khu mơdró kâ chêh inâi mơjiâng ki nếo tung 6 khế apoăng xuân ối châ lối 67 rơpâu khu mơdró kâ, tâk 8,1% tâng vâ pơchông ƀă khế kố hơnăm nah ƀă tâk 34,3% ‘na kơxô̆ liăn chêh. Tơdroăng ki mơdêk ‘na kơxô̆ ngế ƀă kơxô̆ khu mơdró kâ chêh inâi mơjiâng ki nếo ăm hlo ki mơ-eăm ƀă hiâm mơno pơxiâm pêi cheăng dêi mâu khu mơdró kâ gá hên.

Katariana Nga tơplôu ƀă tơbleăng