VOV4.Sêdng - Hâi kố lơ 7/7, vâ chê 1 rơtuh ngế hok tro tung lâp tơnêi têa pơxiâm mot tung hâi ki apoăng dêi rôh tơ’noăng râ má pái phôh thong hơnăm 2021 rôh má 1, ƀă 2 môn tơ’noăng cho Ngữ văn prếi Toán. A kơxo, 7 chôu 30 phut hok tro kô pro ƀai tơ’noăng môn Ngữ văn, tiô túa tự luận, chôu pro ƀai cho 120 phut. Kơxê tơ’noăng môn Toán, tiô trắc nghiệm, chôu pro ƀai ai 90 phut.

Hdrối mê a kơxê lơ 6/7, mâu hok tro hiăng troh a mâu tíu tơ’noăng vâ pro hlá mơ-éa tơ’noăng, ‘mâi rơnêu tâng lơ ai tơdroăng ki ôh tá tro, tơmâng tối tơbleăng túa pơkâ tơ’noăng, hâi tơ’noăng.

Test rĕng SARS-CoV-2 ăm mâu hok tro a Dak Lak

Xua pơreăng COVID-19 ôh tá tơniăn mê ki hên mâu tíu tơ’noăng pơrá hriâm tâp mâu tơdroăng ki hbrâ mơdât pơreăng hbrâ tŭm mâu pơkeăng, kế xúa tung hbrâ mơdât pơreăng, môi tiah: kên pâng môh rơkong, têa kơdê pơreăng, triăng têa ƀă mâu kế ki têa ‘na hbrâ mơdât pơreăng ƀă hên ki ê.

Vâ rôh tơ’noăng kố châ tơkŭm po kơtăng ƀă tơniăn, pôa Nguyễn Hữu Độ, ngế pro xiâm phŏ ngăn hnê hriâm ƀă hnê mơjiâng tuăn ngoâ rơkê, kăn pơkuâ Khu hnê mơhno cheăng râ tơnêi têa rôh tơ’noăng râ má pái phôh thong hơnăm 2021 pơchân: mâu tíu tơ’noăng athế mơdêk séa ngăn troh kăn ƀô̆, ngế ki ngăn tơ’noăng, mâu hok tro athế mơdêk pôu râng hnoăng cheăng tung tâi tâng mâu hâi po tơ’noăng vâ rak tơniăn ôh tá ai tơdroăng ki pêi pro ôh tá tro.

Tung péa hâi hâi lơ 5 ƀă 6/7, Khu pơkuâ ngăn pơkeăng ƀă khăm pơlât kong pơlê Dak Lak hiăng tơkŭm khăm ngăn rĕng pơreăng SARS-CoV2 ăm 150 ngế cho thái cô ngăn tơ’noăng, mâu thái cô séa ngăn, mâu ngế kum ăm hneăng tơ’noăng ƀă khăm ngăn rĕng ăm lối 500 ngế hok tro veăng tơ’noăng mơgêi râ má pái phôh thông a tíu tơ’noăng Hngêi trung râ má pái phôh thông Lắk, pơlê kân Liên Sơn, tơring Lắk.

Kố cho tơring ai ngế tro tâ Covid 19 châ hlo tơdjâk troh pơreăng a pơlê kong kân Hồ Chí Minh ƀă dế klâ kơtăn pơlât. Troh nôkố tâi tâng mâu ngế châ khăm ngăn pơrá hlo âm tĭnh. Laga vâ tơniăn hneăng tơ’noăng tơniăn hbrâ mơdât pơreăng Khu pơkuâ ngăn pơkeăng ƀă khăm pơlât Dak Lak pơcháu Tíu xiâm khăm pơlât tơring Lắk tơrŭm pêi pro tơniăn tơdroăng hbrâ mơdât Covid 19 tung plâ tơkŭm po hneăng tơ’noăng mơgêi râ má pái phôh thông tung kong pơlê.

A Sa Ly tơplôu ƀă tơbleăng