VOV4.Sêdang -  Rơtế ƀă hok tro tung lâp tơnêi têa, hâi lơ 7/7, lối 19.800 ngế hok tro dêi kong pơlê Dak Lak pơxiâm mot tung rôh tơ’noăng râ má pái phôh thong hơnăm 2021 rôh má 1. Maluâ cho 1 tung mâu kong pơlê ki ai ngế tâ COVID-19 la kơnôm ing séa ngăn tro tơdroăng pơreăng mê hok tro, nôu pâ mâu hok tro ƀă mâu ngế ki veăng kum tung rôh tơ’noăng pơrá hmiân tuăn, loi tơngah rôh tơ’noăng kố tơkŭm po tơniăn, kơtăng, tro pơkâ.

Hok tro rak tơniăn tíu ối hdrối vâ pro ƀai tơ’noăng

A tíu tơ’noăng hngêi trung râ má pái Lak, pơlê kân Liên Sơn, tơring Lak, cho tơring ki hiăng ai 2 ngế tâ COVID-19, tâi tâng hok tro hiăng châ test rĕng ƀă hiăng ‘nâi âm tĭnh, mê mâu vâi o pơxiâm mot tung rôh tơ’noăng ƀă hiâm mơno tơniăn. Tâi tâng hok tro pơrá pêi pro kơtăng tơdroăng truâ kên pâng môh rơkong.

Vâ rak tơniăn ‘na kơtăn hơngế, pôi tá tơkŭm hên mơngế rơtế prôk, ối  tung môi hdroh, hô̆i đong tơ’noăng hiăng pơtroh khu ngăn pơkeăng cho lối 10 ngế pêi pro pơtối hlối mâu tơdroăng ki séa ngăn ki tô a châ, xếo kŏng ƀă têa kơdê pơreăng hdrối vâ mot tung lâm tơ’noăng. Pakĭng hbrâ rơnáu tro mâu tơdroăng ki hiăng hlê, mâu hok tro hiăng hlê plĕng rak vế châ chăn vâ mot tung rôh tơ’noăng.

Katarina Nga tơplôu ƀă tơbleăng