VOV4.Sêdang - Vi ƀan hnê ngăn kong pơlê Dak Nông nếo pơtroh hlá mơ-éa pơkâ thế tơkŭm tối tơbleăng kơtăng, tơdâng tơ’mô mâu tơdroăng ki hbrâ mơdât pơreăng châi klêa chu châu Phi a kong pơlê, malối cho a tơring Tuy Đức. Tiah mê, pơreăng châi klêa chu châu Phi nếo hlo tâ tú a mâu rơpŏng ki păn chu a tơring Tuy Đức, pro 2 to chu tâ pơreăng, hiăng châ prâu, tâp kơđu.

Hlo tơdroăng ki ai khât kố, Vi ƀan hnê ngăn kong pơlê pơkâ thế Khu ngăn chiâk deăng ƀă Mơnhông thôn pơlê, mâu tơring, pơlê kong kơdrâm ƀă mâu tíu pêi cheăng ki ai tơdjâk tơkŭm pêi pro kơtăng mâu hlá mơ-éa ki hnê mơhno kố dêi kong pơlê ‘na hnoăng cheăng hbrâ mơdât pơreăng châi klêa chu châu Phi, pôi tá ăm pơreăng châ tâ tú tung lâp lu.

Vi ƀan hnê ngăn tơring Tuy Đức rĕng hbrâ mơdât, xôh kơdê pơreăng a kơpong ki ai pơreăng. Tơring Tuy Đức ƀă kơvâ cheăng ki ai tơdjâk tăng xiâm kối pro ai pơreăng châi klêa chu châu Phi, hbrâ mơdât tơdrêng, pôi tá ăm pơreăng tâ tú.

Katarina Nga tơplôu ƀă tơbleăng