VOV4.Sêdang - “Kal pơtối ‘mâi hơ’lêh rôh Hôp má môi dêi Kuô̆k hô̆i hneăng 15 tiô troăng kơdroh chôu tơpui tơbleăng tơdroăng chêh tung hlá mơ-eá, mơdêk chôu tơbleăng tơdroăng séa ngăn ki tơtro, vâ mâu kăn Kuô̆k hô̆i  ai chôu séa ngăn ƀă veăng hnê tối”. Kố cho tơdroăng ki tơpui hên dê pôa Vương Đình Huệ, Kăn xiâm hnê ngăn Kuô̆k hô̆i a rôh hôp ‘na tơdroăng hbrâ vâ hôp roh má môi, Kuô̆k hô̆i hneăng 15 xua Vi ƀan pơkuâ cheăng Kuô̆k hô̆i tơkŭm po kơxê lơ 14/6, a Hà Nội.

Tiô tối hdrối, rôh hôp má môi, Kuô̆k hô̆i hneăng 15 ai tâi tâng chôu hôp 11,5 hâi pêi cheăng. Tung mê, Kuô̆k hô̆i ‘măn ăm 5 hâi hôp tơpui tơdroăng ‘na mơngế cheăng, 4,5 hâi vâ séa ngăn hlá mơ-éa chêh tơbleăng ƀă mâu tơdroăng kal ki ê ƀă môi pôe hâi vâ tơpui tơdroăng ki hbrâ rơnáu; pơxiâm po ƀă mơgêi hneăng hôp ai 1 hâi ƀă ki hbrâ môi pôe hâi.

A hneăng hôp, mâu ngế tung Vi ƀan pơkuâ cheăng Kuô̆k hô̆i vâ môi tuăn leh pơxiâm po hneăng hôp roh má môi, Kuô̆k hô̆i hneăng 15 po a hâi lơ 20/7 la ngiâ. Xua mê, kô cho hneăng hôp ki apoăng ƀă ki hên cho tơpui ‘na xing xoăng tơdroăng cheăng dêi mâu kăn, thế hôp mơ’no tơdrêng. Tung mê, ai dâng 500 ngế kăn. Xua mê, mâu ngế tung Vi ƀan thế: Hbrâ hbrâ rơnáu ‘na tơdroăng plâ mơdât COVID - 19 nhên khât.

Xuân tung kơxê lơ 14/6, mâu ngế cheăng tung Vi ƀan  pơkuâ cheăng Kuô̆k hô̆i xuân veăng tối ‘na tơdroăng hnê tối Tơdroăng séa ngăn dêi Kuô̆k hô̆i, Vi ƀan pơkuâ cheăng Kuô̆k hô̆i hơnăm 2022.

Gương tơplôu ƀă tơbleăng