VOV4.Sêdang - Kơxo hâi lơ 13/7, ăm rơkong veăng tơpui tối ‘na tơdroăng ki tiô tối hdrối mâu túa pơkâ mơnhông mơdêk cheăng kâ rêh ối pơlê pơla, túa pơkâ liăn ngân tơnêi têa, túa pơkâ mung liăn, mơdrếo liăn mung tơdjuôm ƀă túa pơkâ ‘no liăn cheăng tơdjuôm ki ton krâ kơvâ khế hơnăm, hneăng hơnăm 2021 – 2025, Vi ƀan pơkuâ Kuô̆k hô̆i môi tuăn ƀă túa pơkâ dêi Chin phuh ‘na tơdroăng ki ‘no hrê liăn hneăng ki kố tiô tối hdrối kô hên tâ hneăng hdrối ai 3,7% GDP.

Vi ƀan pơkuâ Kuô̆k hô̆i tối tiah kố: Tơdroăng cheăng kâ tung tơnêi têa tá hâi rơdêi, mơdêk tá hâi rak vế tơniăn. Tơdjâk dêi kong prâi pro hơ’lêh, kong mêi  khía mơhot, têa xăng po lân vâ pôi trâm hên tơdroăng ki pá. Malối, pơreăng kân COVID-19, tiô mơnhên tối tá hâi hlo tâi ki xơpá tơvâ tơvân dêi khu mơdró kâ ƀă kuăn pơlê.

Pôa Trần Thanh Mẫn, kăn xiâm phŏ hnê ngăn Kuô̆k hô̆i pơkâ thế kal mơnhên tối trâu tâ mâu tơdroăng ki tro tơdjâk troh liăn ngân túa pơkâ  kân, nâp, ‘no liăn hneăng ki hdrối kố nah, malối cho tơdjâk dêi pơreăng kân COVID-19. Malối cho xơpá ‘na tơdroăng ki mơdrếo liăn chĕn tơdjuôm ƀă kơxô̆ liăn ‘no hrê. Xuân a kơxo lơ 13/7, Vi ƀan pơkuâ Kuô̆k hô̆i ăm rơkong tơpui tối ‘na Hlá mơ-éa chêh tơkŭm rơkong tơpui tối, pâ thế dêi kuăn pơlê tung lâp tơnêi têa pơtroh ăm rôh hôp má môi, Kuô̆k hô̆i hneăng má 15.

Katarina Nga tơplôu ƀă tơbleăng