VOV4.Sêdang - A roh hôp má 57 dêi Vi ƀan pơkuâ Kuô̆k hô̆i, tơpui ‘na tơbleăng mơnhên tơdroăng châ tơƀrê pêi pro pơkâ mơnhông cheăng kâ – rêh ối pơlê pơla ƀă liăn ngân tơnêi têa 6 khế hơnăm 2021 tơkŭm po hâi lơ 15/6, mâu ngế pêi cheăng dêi Vi ƀan pơkâ thế: Tơbleăng dêi Chin phuh kal mơnhên nhên tơ’nôm ‘na pêi pro kơxô̆ liăn tŏng kum 62 rơpâu rơtal ăm mâu ngế ki tro tơdjâk xua pơreăng kân COVID 19 xuân môi tiah mâu kơxô̆ liăn tŏng kum ki ê, ing mê pro xiâm kối ăm tơdroăng tơbleăng mâu troăng hơlâ ki ê tung la ngiâ.

Xông tơpui mơgêi Roh hôp má 57 dêi Vi ƀan pơkuâ Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i pơkâ thế: klêi kơ’nâi roh hôp, mâu kơ koan, khu tơrŭm cheăng ai tơdjâk thâ hriăn plĕng, tơmâng xo rơkong tơpui dêi rêm tơdroăng xiâm a mâu roh hôp vâ pêi kêi đeăng mơ-éa ƀă tối hdrối tơdroăng Hneăng hôp má môi Kuô̆k hô̆i hneăng má 15.

Vi ƀan pơkuâ Kuô̆k hô̆i xuân pơkâ pêi kêi đeăng tâi tâng tơdroăng rah xo mơngế pêi cheăng klêi mê nếo tơkŭm pêi pro mâu tơdroăng xiâm ki ê a Hneăng hôp má môi Kuô̆k hô̆i hneăng má 15.

A Sa Ly tơplôu ƀă tơbleăng