VOV4.Sêdang - A kơxê lơ 13/7, ăm rơkong veăng tơpui tối ‘na troăng hơlâ ‘no liăn ăm tơdroăng pơkâ dêi tơnêi ‘na mơjiâng thôn pơlê nếo hneăng hơnăm 2021 – 2025, Vi ƀan pơkuâ Kuô̆k hô̆i môi tuăn xoăng 30 rơpâu rơtal liăn ‘no cheăng tơdjuôm ki krá tơniăn ăm khế hơnăm ăm cheăng kố. Tơdroăng ki nếo ki rơhêng vâ tối dêi tơdroăng hneăng hơnăm 2021 – 2025, mê cho: Mơjiâng Khu xiâm pơkâ tơnêi têa ‘na thôn pơlê nếo rêm râ (kong pơlê, tơring, cheăm) tiô mâu kơlo (pêi klêi, mơdêk ƀă tiô túa nếo).

Tơdroăng kố mơ-eăm ai iâ hlái 80% tung tâi tâng cheăm dêi lâp tơnêi têa pêi klêi thôn pơlê nếo, tung mê, ai dâng 40% kơxô̆ cheăm pêi klêi thôn pơlê nếo châ mơdêk, 10% to cheăm pêi klêi thôn pơlê nếo tiô túa nếo; mơ-eăm troh hơnăm 2025 lâp tơnêi têa ôh tá ai cheăm pêi klêi pá xuâp 15 tơdroăng; mơhnhôk mâu kong pơlê, tơring, cheăm ai tơdroăng ki hbrâ rơnáu mơjiâng thôn pơlê tiô túa nếo.

Pôa Vương Đình Huệ, kăn xiâm hnê ngăn Kuô̆k hô̆i pơkâ thế kal pro tơdâng kơxô̆ liăn, tơkŭm ‘na tơdroăng ki châ kơjo ăm tơdroăng pơkâ dêi tơnêi têa ‘na mơjiâng thôn pơlê nếo hneăng hơnăm 2021 – 2025, tá kơxô̆ liăn ‘no cheăng, kơxô̆ liăn pêi cheăng; kơxô̆ liăn tơnêi têa, kơxô̆ liăn tíu xiâm ƀă kong pơlê, tơkŭm hên má môi ăm tơdroăng kố.

Katarina Nga tơplôu ƀă tơbleăng