VOV4.Sêdang - Pơtối roh hôp má 57, kơxo lơ 15/6, a Hngêi Kuô̆k hô̆i, Vi ƀan pơkuâ Kuô̆k hô̆i veăng hnê tối tung hlá mơ-eá tơbleăng tối ‘na ki tơ’ƀrê pêi pro tơdroăng pơkâ mơnhông cheăng kâ - rêh ối ƀă liăn ngân tơnêi têa 6 khế apoăng hơnăm ƀă mâu troăng hơlâ pơkâ pêi 6 khế mơ’nui hơnăm 2021. Pôa Vương Đình Huệ, Kăn xiâm hnê ngăn Kuô̆k hô̆i pơkuâ hôp. A rôh hôp, mâu ngế tung Vi ƀan tối tiah kố: Chin phuh kal rak tơniăn ‘na cheăng kâ kân, thế rak tơniăn pôi pro to kơnâ ƀă liăn tơkâ iâ, kơxô̆ yă tơniăn, ‘no mơjiâng tơmeăm khoăng tơnêi têa thế tro tiô pơkâ, ‘na hyôh kong prâi tíu ‘no liăn mơjiâng pro châ séa ngăn nhên thế đi đo mơdêk tơ-ƀrê, ai tiah mê ‘nôi drêng pơreăng hiăng kâi mơdât ah tơdroăng cheăng kâ tung tơnêi têa pin nếo rĕng châ mơnhông tơ-ƀrê. 

Tiô tối tơbleăng, 6 khế apoăng 2021, ki mơdêk GDP tối tơbleăng hdrối châ dâng 5,8%. Liăn châ xo ăm hngêi rak liăn tơnêi têa châ 55,5% tiô tối hdrối, tâk 10,9% tâng vâ pơchông ƀă hơnăm 2020. Tung pơla ai pơreăng COVID-19, mâu kơxô̆ ki ăm hlo ki tro mơhé hâi châ tiô pơkâ. Ki tơxâng vâ tối  ai dâng 23% kơxô̆ khu mơdró ton tơrŏng lo ing khu mơdró, tối tơdroăng mơ-eăm ôh tá kâi chiu dêi mâu khu mơdró rế kơdroh xua ai pơreăng tâ tú.

Gương tơplôu ƀă tơbleăng