Kon pơlei tơ̆ apŭng Phú Thiện, dêh char Gia Lai tŏk bŏk tơjră hăm hiong răm tih yua đơ̆ng kơjă ƀum yuăn tôch kơjur reh, lơ ŭnh hnam kon pơlei jang ƀum lôh lơ. Pơyan jang âu, yă Lê Thị Xuân, Xăh Chư A Thai, apŭng Phú Thiện, dêh char Gia Lai pơtăm 2 hek tar ƀum yuăn hăm jên tơmơ̆t jang vă jê̆ 200 triệu hlak jên. ‘Nao âu, ŭnh hnam hlôi rô̆ ƀum, đei dang 40 tấn, mă lei kơjă tĕch lăp 3000 hlak jên 1 kĭ, kơna lôh kơ hrĕng triệu hlak jên. Yă Xuân akhan, mơmat tat âu ‘noh yua đơ̆ng đei bơngai pơjei băl pơtăm ƀum yuăn lơ dêh hnang:

“Hơgăt teh pơtăm lơ, kơ sô̆ tĕch ‘noh ưh kơ đei nhen rim sơnăm, tĕch mơdro tôch kơ hiơ̆, kơjă sơnăm ‘nâu ưh kơ đei nhen sơnăm sơ̆, jur tôch kơ lơ yua đơ̆ng ƀum lơ dêh. Bơngai mơdro ‘noh ƀum ‘lơ̆ng mă răt, oei ƀum kơnê̆ đe sư kla tôch kơ reh.”

Đơ̆ng blŭng pơyan rô̆ tĕch truh dang ei, kơjă ƀum yuăn jur tôch kơ reh. Mă hơdăh ‘noh, đơ̆ng 10.000 hlak jên 1 kĭ, kơjă hơnơ̆ng jur oei pă 3.500 hlak jên 1 kĭ hrei ‘nâu. Kơjă reh, anih mơdro sa răt iŏk păh lăp pơm ăn kon pơlei jang ƀum mơmat. ‘Nhŏng Nguyễn Đình Thái, oei tơ̆ xăh Chư A Thai, apŭng Phú Thiện, tơbăt, hăm kơjă tĕch hrei ‘nâu, pơgar ƀum yuăn kơ ŭnh hnam lôh kơ hrĕng triệu hlak jên.

“Pơting hăm dôm sơnăm ‘noh sơnăm ‘nâu jang ƀum 1 hek tar lôh đơ̆ng 20 triệu truh 30 triệu hlak jên. Dang ei 5hek tar ‘noh tŏk bŏk iŏk đei 1hek tar, dang ei oei tŏk bŏk gô kơjă plơ̆ng ‘noh gô kon pơlei rô̆ iŏk oei năm, mă kơ jă tŏk ƀiơ̆ ‘noh tŏk, ưh kơ tŏk ‘noh oei athei rô̆ tĕch đang kơ ‘noh tơplih jing jang ƀa”.

Kŭm lei lăi hăm yă Lê Thị Xuân păng ‘nhŏng Nguyễn Đình Thái, kơ hrĕng ŭnh hnam kon pơlei nai tơ̆ apŭng Phú Thiện, dêh char Gia Lai kŭm tŏk bŏk mơmat yua kơjă tĕch ƀum tôch kơ reh. Đei ŭnh hnam oei hiong pơgoh pơđĭ pơgar ƀum yua kơ hơdrông sa, pơrang jĭ pơrăm. Yă Nguyễn Thị Thủy, xăh Chư A Thai, apŭng Phú Thiện, dêh char Gia Lai, pơma:

“Pơting hăm rim sơnăm anih tĕch mơdro sơnăm ‘nâu jang lơ hloh kơ sơnăm sơ̆, kon pơlei jang sơnăm ‘nâu pruih pơgang kŭm ưh kơ trŏ kơna đei pơgang lơ dêh, lơ hnam choh hŭt pơđĭ chŭn ưh kơ dônh đei ƀum hơ yơ, lôh đĭ hloi”.

Apŭng Phú Thiện jĭ tơring pơtăm ƀum yuăn să hloh kơ dêh char Gia Lai. Pơyan jang âu, lơ̆m apŭng pơtăm 3.500 hek tar, tŏk hloh 3 ‘măng pơting hăm sơnăm 2022 – 2023, ƀum jô̆ pơhlom dang 68.800 tấn. Truh khei ‘năr dang ei, ƀum yuăn đĭ rô̆ tĕch đei dang 60% hơgăt teh, kơ sô̆ uơ oei dơ̆ng tơchĕng hơdrol truh ‘năr 30/4 gô rô̆ đang. Hơdrol ‘noh, anih jang kơpal hlôi tơtă kơ kon pơlei mưh pơih să jang sa, kăl kơ tơklep hăm anih mơdro sa tơmơ̆t jên jang, tĕch tơmam. Hơgăt teh tŏk lơ mă lei ưh kơ đei anih tĕch sơđơ̆ng pơm ăn bơngai pơtăm ƀum lôh mưh lơ̆m pơyan rô̆ tĕch. Ƀok Bùi Trọng Thành, Kơdră Anih vei lăng găh Choh jang sa păng Hơtŏk tơiung tơring tơrang apŭng Phú Thiện, dêh char Gia Lai tơbăt, tơ̆ hơnăp dôm tơdrong mơmat tat anih tĕch mơdro, apŭng tơlĕch jang dôm trong jang tơgoăt hơdai tĕch vă tơgŭm kon pơlei.

“Tơ̆ hơnăp tơdrong kơpal nhôn hlôi krao hơvơn dôm anih mơdro sa jang hơdai pơm lơ tơdrong hiôk ăn tơdrong răt iŏk lơ hloh, hơdai hăm athei dôm xăh pơjing dôm hơnih tơm vă răt iŏk vă dôm anih mơdro sa răt iŏk hiôk hloh, vei sơđơ̆ng tơdrong jang”.

Âu ki, Grŭp jang Central Retail Việt Nam tơbăt dôm hơnih siêu thị kơ grŭp jang âu tŏk bŏk tơlĕch jang tĕch ƀum yuăn ưh kơ đei lơi, yak hơdai hăm kon pơlei jang chŭn mir Gia Lai. Kiơ̆ kơ grŭp jang âu, tơdrong jang đei tơlĕch jang hloi ƀơ̆t băt kơtơ̆ng kơjă ƀum yuăn Tây Nguyên trŏ pơyan tŏk bŏk jur tôch kơ hrĕnh đơ̆ng 10.000 hlak jên 1 kĭ oei pă 3.500 hlak jên 1 kĭ, bơngai pơtăm ƀum lôh dêh. Đei băt, tơdrong jang vang yak hơdai hăm kon pơlei jang chŭn mir Gia Lai đơ̆ng Central Retail Việt Nam gô hơnhăk ƀum yuăn đơ̆ng kon pơlei dêh char âu mơ̆t lơ̆m dôm siêu thị GO!, Big C păng Tops Market. Ƀum yuăn gô đei răt iŏk păng dôm siêu thị tĕch hăm kơjă ưh kơ đei lơi ‘noh 9.900 hlak jên 1 kĭ tơ̆ dôm hơnih tĕch mơdro tơ̆ tơring Tŏk bŏk, tơring pơbăh păng 10.900 hlak jên 1 kĭ tơ̆ dôm hơnih tĕch mơdro tơring găh Tu. Kơtă lơ̆m giĕng blŭng tơmơ̆t yua tơdrong jang, dôm siêu thị gô tĕch dang 80-100 tấn ƀum yuăn đơ̆ng kon pơlei jang chŭn mir Gia Lai.