Hop akŏm đei pơgơ̆r kiơ̆ pơgơ̆r kơtă, pơjing rơvơn ăn rim răih kơdră chĕp pơgơ̆r rim dêh char Tây Nguyên, rim khul mơdro sa, hơnih mơdro sa, tang măt ăn rim hơnih bơ̆ jang, khul tơgum djru mơdro sa lơ̆m teh đak păng teh đak đe vang năm.

Ƀok Vũ Bá Phú, Kơdră chĕp pơgơ̆r Hơnih jang pơtrŭt mơdro sa găh Hơnih tơm vei lăng Mơdro sa sơkơ̆t hơdăh, Tây Nguyên ‘noh tơring jang sa đei lơ tơmam drăm, mă kăl ‘noh ‘long kăp gĭt păng ‘long sa plei. Mĭnh ƀar tơmam drăm tĕch mơdro tơ̆ teh đak đe găh khul dơ̆ng mă blŭng, mă ƀar lơ̆m tơring adoi nhen lơ̆m apŭng plĕnh teh nhen chehphe , tiu, krô̆i hroi, ‘long găr sơlơ̆k. Hơgăt teh pơtăm ‘long pơgang gĭt kăl nhen: sâm Ngọc Linh, sâm hroi, pơmau kơ̆ng ƀrê, đinh lăng,  đương quy, pơkao hòe… jei tŏk bŏk atok tơ iung kơtang, pơjing đei tơring pơtăm ‘long pơgang tơ̆ Tây Nguyên.