Vang năm pơlong đei 36 kơ loăi găr chehphe ‘lơ̆ng Arabica đei rơih iŏk đơ̆ng rim mir pơgar kon pơlei jang lơ̆m dêh char Lâm Đồng tơ̆ teh groi 1.000m pơtêng hăm đak dơsĭ. Dôm kơ loăi găr chehphe Arabica vang năm pơlong đei chă pơm tơlĕch, hơdrĕng, ot, pơm tơlĕch đak chehphe kiơ̆ ƀlep tơdrong ‘lơ̆ng apŭng plĕnh teh.

‘Măng pơlong hơvơn đei lơ ŭnh hnam choh jang sa, bơngai khoa hŏk, bơngai joăt jang lơ̆m teh đak păng teh đak đe.

Rim bơngai joăt chă huch lăng lơ̆m teh đak păng teh đak đe gô chơ̆m pơlong păng pôk hơpăh ăn rim chehphe ayơ ‘lơ̆ng đei tơmơ̆t lơ̆m ‘măng pơlong tuch luch. ‘Măng pơlong au vă pơm hơtŏk ‘lơ̆ng chehphe Arabica Việt Nam. Adoi pơm ăn hơyak pran, pơtrŭt rim ŭnh hnam jang chehphe vang jang kiơ̆ pơjing đei găr chehphe Arabica ‘lơ̆ng, hơnhăk tơmam drăm gĭt kăl chehphe au yak truh tơ̆ hơnih tĕch mơdro lơ̆m apŭng plĕnh teh.

Lơ̆m ‘măng pơgơ̆r pơlong oei pơgơ̆r chă huch lăng dôm đak chehphe ‘lơ̆ng, pơma dơnuh tơbăt dih băl trong jang hơ iă lơ̆m pơm tơlĕch chehphe ‘lơ̆ng đơ̆ng rim ŭnh hnam, bơngai khoa hŏk păng bơngai joăt jang.