Na oei mah đak, ƀa noh oei jơk ƀlĭk tơ̆  “mir na 132” tơ̆ xah Cư Ea Lang, apŭng Ea Kar, dêh char Đăk Lăk. Ah ‘năr dơ̆ng tŏ hlơ hlĕng, ao hơ-iuch kơlih đak pơ-uh ro mă lei ƀơ̆r chhôk ‘nă đơ̆ng Sa Moan Krông ang hơdah lơ̆m na ƀa giơ̆ng ‘lơ̆ng. Sa Moan Krông, hnam oei tơ̆ pơlei Briu, xah Cư Huê, apŭng Ea Kar ăn tơbăt, kơyuơ ưh kơ mah teh choh jang, unh hnam đei asong ăn na âu đơ̆ng sơnăm 2016. Dôm sơnăm blŭng jang ưh đei yua lơ kơlih tam mă băt trong pơm jang, dôm sơnăm đơ̆ng rŏng kơ noh, unh hnam jang 2 pơyan, 10 tâ̆n ƀa rim sơnăm. Pơyan phang sơnăm âu tôch kơtang, na ƀa kơ unh hnam noh ah hơtuch kơ hơbong đak, noh Sa Moan athei năm hrôih vă pơchoh đak: “Tơ̆ pơlei  Êa Đơk âu, pơlei Briu đei dôm hrĕng unh hnam đei teh đak asong ăn na, unh hnam inh đei asong ăn 3 sso 7 na. Trong năm truh tơ̆ na noh hơtaih, athei năm đơ̆ng hrôih vă pơchoh đak trŏ năr đei đak”.

Ƀok Nguyễn Ngọc Hòa, Kơdră Anih jang vei lăng kon pơlei xah Cư Elang ăn tơbăt, ‘nguaih kơ "na ƀa 132" đei muih choh kiơ̆ Tơchơ̆t 132/2003 đơ̆ng Thủ tướng Teh đak, asong ăn kon pơlei kon kông ưh đei teh choh jang, pơyan Puih phang âu, kon pơlei jang mir lơ̆m xah oei rei pơtăm 500 hectar ƀa tơ̆ dôm tơring jang na. Đơ̆ng blŭng pơyan, jơnŭm pơgơ̆r tơring hlôi hơvơn kon pơlei rei pơtăm trŏ pơyan, tang găn rei pơtăm ƀa tơ̆ dôm anih na ưh đei mah đak, noh truh dang ei adoi kĕ găn tŏ pơđang: “Tŏ pơđang hlôi đei. Hăm tơdrong asong pơro đak đơ̆ng Kŏng ti jang pơnơ̆ đak, tơring kơchăng tơroi ăn kon pơlei, mă kăl noh bơngai đei teh na athei kơchăng jang hadoi hăm kŏng ti jang gah pơnơ̆ đak vă pơchoh đak ăn kơ na ƀa. Tang găn huach kư̆ kă păng ưh đei pơchoh truh na ƀa tơ̆ hơtaih”.

Kŏng ti pơnơ̆ đak Đăk Lăk pơm jang tơ̆ Ea Kar vei lăng 20 hơbong pơnơ̆ đak, đei 18 dơnâu mong đak, 1 dơnâu bơ̆t păng 1 anih ƀôm đak. Hơgăt na pơtăm đei đak ruih sơđơ̆ng đơ̆ng Anih jang kơ Kŏng ti noh 3.220 ha hăm dôm hơdrĕch ‘long pơtăm. Lơ̆m noh đei 1.800 ha ‘long kŏng ngĭp păng 1.150 ha ƀa. Ƀok Nguyễn Tiến Sĩ, Kơdră Kŏng ti pơnơ̆ đak Đăk Lăk pơm jang tơ̆ Ea Kar ăn tơbăt: Dang ei 14 dơnâu mong kơyuơ Kŏng ti vei lăng, đak adoi oei sơđơ̆ng.

Tơ̆ hơbong pơnơ̆ Ea Rớt, jing hơbong pơnơ̆ đak tih hloh tơ̆ apŭng Ea Kar, kĕ mong hloh 18 trĭu mét khối đak. Hloh 1 khei kơ âu, 10 kang ƀô̆ bơngai jang tơ̆ anih âu asong ‘năr jang, pơih – tang pơro đak măng năr hloi. Ƀok Phạm Ngọc Linh, pơgơ̆r tơdrong asong đak đơ̆ng Pơnơ̆ Ea Rớt ăn tơbăt, đak lơ̆m dơnâu dang ei oei pă 45% đĕch. Kan ƀô̆, bơngai jang kơ anih jang âu hơnơ̆ng hơlen kơjăp tơdrong tơdrong iŏk pơro đak kiơ̆ dôm hơbong pơchoh đơ̆ng dôm unh hnam, vei sơđơ̆ng yua mong ƀiơ̆ đak tơnăp hloh: “Dơnâu đak adoi oei mah đak vă ruih ăn ‘long pơtăm truh hơtuch pơyan puih phang âu. Tôm đơ̆ng đe kơdră truh bơngai jang kơ anih jang gô jang atŭm hăm jơnŭm pơgơ̆r tơring vă tơroi tơbăt, asong đak iŏk yua mong ƀiơ̆”

Tŏk bŏk ah khei tơm kơ pơyan phang tơ̆ Tây Nguyên, tŏ phang đei ƀôh tơ̆ minh ƀar tơring, pơrăm truh tơdrong pơyua đơ̆ng dôm hơdrĕch ‘long pơtăm. Mă lei bơngai jang ƀa tơ̆ apŭng Ea Kar, dêh char Đăk Lăk hlôi kơchăng đei thong đak ruih. Pơyan ƀa Puih Phang tơ̆ tơring adoi oei kĕ "găn" tŏ phang keh kong.