Truh dang ei, hloh 2.000 hek tar ‘long pơtăm tơ̆ Dak Lak ưh kơ măh đak tơruih. Lơ̆m noh, đei hloh 1.300 hek tar cheh phe, 638 hek tar ƀa păng 36 hek tar ‘long pơtăm nai. Tơdra hơdrol tơ̆ hơnăp kơnh, gô đei đơ̆ng 5.000-8.000 hek tar ‘long pơtăm rŏ lăng gô kơ đei ƀôh tŏ phang pơđang, ưh kơ măh đak tơruih tơdăh tŏ hang hơnơ̆ng pơdui đunh. Tơ̆ hơnăp đei ƀôh krê hơmơt đơ̆ng ‘năr tŏ, Anih vei lăng găh choh jang sa păng hơtŏk tơiung tơring tơrang dêh char Dak Lak kŭm hăm dôm anih jang vei lăng dơnâu mong đak jang hơdai hăm dôm tơring tơtĕnh tơlĕch jang dôm trong jang tang găn tŏ phang vă găn ƀiơ̆ hiong răm yua đơ̆ng tŏ phang pơm ăn.

Ƀok Trịnh Quốc Bảo, Phŏ Kơdră chĕp kơ̆l Kŏng ti vei lăng dơnâu mong đak Dak Lak tơbăt, truh dang ei, lơ̆m kơ sô̆ hơgăt ‘long pơtăm mă kŏng ri pơvih pơvăn tơruih đei hloh 1.380 hek tar ‘long pơtăm đei phang pơđang, lơ̆m noh hlôi tơ jră phang pơđang đei hloh 790 hek tar, hơgăt uơ oei dơ̆ng tŏk bŏk hơdrin dan kơmăy ƀôm tơgĕch iŏk yua đak uơ oei dơ̆ng tơ̆ hơla dơnâu đak pơyua ăn tơ jră phang pơđang.