Hop akŏm vă pơtôch, hơlen năng dôm tơdrong jơnei găh tơchĕng hơlen, jang kiơ̆ khoa hŏk păng kơmăy kơmok lơ̆m tơdrong choh jang xa hăm kơmăy kơmŏk ‘nao; kơmăy sinh hŏk pơyoa ăn tơdrong rong yŏng, rei pơtăm păng pơm tơlĕch tơmam đơ̆ng rim kơloăi ‘long pơtăm (‘long pơgang, ‘long xa plei, ƀa, ƀum hơƀo); pơmâu pơgang păng pơmam xa tơ̆ dôm dêh char lơ̆m tơring Tây Nguyên; Ƀai hŏk kăp gĭt găh atok tơiung choh jang xa hăm kơmăy kơmŏk 'nao, kơmăy sinh hŏk đơ̆ng plt Hồ Chí Minh.

14 ƀai chih tơblang đơ̆ng dôm bơngai juăt jang, bơngai vei lăng kŭm hăm lơ nơ̆r tơgop tơ̆ hop akŏm ăn ƀôh, tơring Tây Nguyên đei teh pơtăm xă mă 3 lơ̆m teh đak păng đei ƀĕnh tơdrong ‘lơ̆ng vă atŏk tơiung choh jang xa. Mă hơdăh, hăm tŏ ‘mi kial ‘lơ̆ng, dôm dêh char Tây Nguyên hlôi jang tŏk pran găh ‘nhot, pơkao, plei ‘long, ‘long kăp gĭt, ‘long pơm bri păng ‘long pơgang ‘lơ̆ng. Kiơ̆ đơ̆ng noh, hơtŏk kơjă kăp gĭt găh muk drăm lơ̆m hơgăt tĕh rei pơtăm păng pơih xă anih tech mơdro tơmam lơ̆m teh đak păng tĕch tơ̆ teh đak đe nhen cheh phe, tiu, gŭi yoăn, găr điêu păng mắc ca, cao-su. Mă lei kơjă tĕch tơ̆ teh đak, tơdrong tĕch tơmam đơ̆ng choh jang xa kơ Tây Nguyên oei tam gan hlot, tam mă tơgăl hăm tơdrong pran ‘lơ̆ng đơ̆ng tơring.

Ƀok Nguyễn Hữu Tháp, Phŏ Kơdră vei lăng kon pơlei dêh char Kon Tum akhan, tơdrong jang hơdoi hăm plt Hồ Chí Minh lơ̆m tơdrong tơchĕng hơlen khoa hŏk, atŏk tơiung kơmăy kơmŏk, hơtŏk trong jang hơdoi pơih đei đon hơmĕng tih, tơgŭm pơjing đei lơ trong jang hơdoi găh choh jang xa tơgăl hăm tơdrong ‘lơ̆ng đơ̆ng Tây Nguyên: “Plt Hồ Chí Minh jĭ 1 anih jang mŭk drăm tơpôl tih, kŭm jing 1 anih jang khoa hŏk kơmăy kơmŏk păng 1 anih tĕch mơdro tôch ‘lơ̆ng ‘năi. Dôm dêh char Tây Nguyên đei lơ tơmam tôch kăp gĭt. Bơ̆n pơjing trong jang hơdoi ‘nŏh gô đei trong jang tŏk pran ‘lơ̆ng”.

Găh tơdrong vă jang hơdoi choh jang hăm kơmăy kơmŏk ‘nao đơ̆ng dôm dêh char Tây Nguyên păng plt Hồ Chí Minh, bơngai tang măt akhan athei đei trong jang mă hơdăh, mă lăp, kăl loi jĭ đei trong tơgŭm hơdrô̆ mă ‘lơ̆ng vă sơng iŏk dôm anih jang mŭk drăm, anih jang khoa hŏk vang tơmât jên jang, tơplih 'nao kơmăy kơmŏk. Dôm tơdrong gơ̆h jang hơdoi nhen vang tơchĕng hơlen, hơmet pơ 'lơ̆ng trong jang, pơtho pơhrăm, đei: mong akŏm, vei lăng gen dôm kơloăi hơdrĕch 'nhot pơtăm, plei 'long, 'long pơgang, pơmâu… pơyoa ăn tơdrong chă rơih hơdrĕch. Jang hơdoi hăm plt Hồ Chí Minh gô tơgŭm ăn Tây Nguyên tơplih ‘nao kơmăy 'măn răk păng pơm tơlĕch tơmam 'lơ̆ng rŏng rŏng kơ phĕ; tơmât yoa kơmăy kơmŏk roi tơbăt, kơmăy kơdâu kơdih lơ̆m tơdrong choh jang xa; pơtho pơhrăm trong choh jang xa hăm kơmăy kơmŏk 'nao...

Tiến sỹ Hoàng Anh Tuấn, Phŏ Kơdră Lăm jang Khoa hŏk păng pơtho pơhrăm, Anih vei lăng Tơring choh jang xa hăm kơmăy kơmŏk ‘nao kơ plt Hồ Chí Minh ăn tơbăt, đei lơ trong vă anih vang jang hơdoi, tơchĕng hơlen, tơmât yoa kơmăy kơmŏk mưh choh jang xa ăn dôm dêh char Tây Nguyên:

“Đĭ đăng dôm tơdrong mă Anih vei lăng tơring Choh jang xa hlôi đei, dôm tơdrong hlôi iok đei tơdăh lăp hăm dôm dêh char tơring Tây Nguyên ‘nŏh Anih vei lăng gô vă tơgŭm ăn ngăl. Gơ̆h tơgŭm kiơ̆ đơ̆ng dôm tơdrong jang khoa hŏk tơ̆ tơring, hăm jên jang đơ̆ng tơring tơlĕch. Vang jang hơdoi hăm plt Hồ Chí Minh mă ưh ‘nŏh plt Hồ Chí Minh vă tơlĕch dôm trong jang mă lăp vă sek tơlang ‘lơ̆ng dôm tơdrong oei đei tơ̆ yăn âu tơ̆ tơring Tây Nguyên. Tơgŭm kiơ̆ đơ̆ng dôm tơdrong pơtho pơhrăm, hơtŏk đon hlôh vao, băt iŏk yoa kơmăy kơmŏk, tơmam drăm lơ̆m tơdrong tơchĕng hơlen khoa hŏk”.

Sơnăm 2024, plt Hồ Chí Minh păng dôm dêh char Tây Nguyên vă jang hơdoi pơgơ̆r 3 tơdrong tih tơ̆ tơring, đei: Năr Lêh ‘long sâm păng ‘long pơgang apŭng plenh teh lơ̆m khei 5, Kơchơ pơdă tơƀôh hơdrĕch, tơđăh ‘long păng choh jang xa hăm kơmăy kơmŏk ‘nao (lơ̆m khei 6) păng Giĕng tơmam OCOP, tơmam ‘lơ̆ng đơ̆ng tơring groi kông păng kơmăy kơmŏk rei pơtăm – ‘măn răk – pơm tơlĕch tơmam đơ̆ng choh jang đei (lơ̆m khei 11). ‘Nao âu tơ̆ hop akŏm, hlôi đei drơ̆ng nơ̆r tơlĕch trong jang hơdoi găh choh jang xa sơnăm 2024 đơ̆ng plt Hồ Chí Minh hăm dôm dêh char Tây Nguyên, ƀok Đỗ Xuân Dũng, Phŏ Kơdră Anih vei lăng choh jang xa păng atŏk tơiung tơring tơrang dêh char Đắk Lắk kŭm hơpơi ‘mĕh, đei trong jang hơdoi, jang đei lơ tơmam ‘lơ̆ng, hơnhăk ba tơdrong đei yoa ăn kon pơlei păng anih tĕch mơdro.