Tơdrong jang đei tơlĕch jang lơ̆m 3 khei (đơ̆ng khei 3 truh khei 6/2024), tơdrong tơm ‘noh jĭ 10.000 tơnơm ‘long sầu riêng lơ̆m dêh char Dak Lak gô đei kơsô̆ hăm mã QR păng tăh tơmơ̆t lơ̆m Bandocayxanh.vn. Đơ̆ng dang ei, rim ‘nu bơngai bơngơ̆t truh gơh tơmơ̆t mã số păng pơih lăng tơroi tơbăt hơdăh găh rim tơnơm ‘long nhen: tơring pơtăm, hơdrĕch ‘long, khei ‘năr pơtăm, tơdrong vei lăng, dăh mă hơdăh hloh ‘noh jĭ dôm kơsô̆ găh kơjung, tih iĕ păng um rup đơ̆ng ‘long kiơ̆ rim khei ‘năr bluh tih.

Tơdrong jang “Pơm kơsô̆ ‘long sầu riêng tơ̆ hla kak ‘long jơk” ưh khan lăp tơƀôh hơnăp jang iung jang hơdrol đơ̆ng hơdruh tơdăm Dak Lak lơ̆m tơplih kơsô̆ mă oei tơgop kŭm hăm khŭl kơdră, kon pơlei, anih mơdro sa, pơjing păng hơtŏk tơiung anih jang tơmam sầu riêng kơjăp.