‘Nau jĭ nơr tơbăt đei pơma truh lơ̆m hop akŏm tơlĕch jang tơdrong vă jang “jang chehphe trŏ lăp hăm tơplih tŏ ‘mi kial tơ̆ Việt Nam” kơ yuơ Hơnih vei lăng Choh jang sa păng Atŏk tơ iung tơring tơrang dêh char Dak Lăk jang hơdoi hăm Khul jang Atŏk tơ iung Hà Lan SNV pơgơ̆r tơ̆ kơsơ̆ brei, năr 6/3.

Tơdrong jang tơgŭm djru ăn dêh char Dak Lăk hăm kơjă hloh 18 ti hlak jên. Khei năr jang kiơ̆ đơ̆ng khei 1/2024 - truh khei 10/2028, tơ̆ rim tơring pơtăm chehphe tơnap tap kơ dêh char. Tơdrong tơm kơ tơdrong vă jang ‘noh hơmet pơ ‘lơ̆ng tơdrong jang sa hơrih sa ăn 8.000 ŭnh hnam kon pơlei choh jang sa tơ̆ tơring pơtăm chehphe tơnap tap găh đak tơruih păng tim mă vang mơ̆t lơ̆m tơdrong jang chehphe drơ̆ng nơ̆r ‘moi kiơ̆ hŏk pơhrăm găh choh jang sa; đơ̆ng noh, pơm hơtŏk jơhngơ̆m đon iŏk yua trŏ lăp găh đak, pơm tơjur đak pơgang phŏng lơ̆m plei ‘long pơtăm, vei lăng năng tông jơhngơ̆m jăn bơngai jang; pơm hơtŏk iŏk đei jơnei jang sa ăn kon pơlei choh jang sa kiơ̆ trong pơm tơjur tơdrong kơnê̆, kơjăp ‘lơ̆ng păng trŏ lăp hăm tơplih tŏ ‘mi kial.