Rim nơ̆r pơma tơ̆ hop akŏm vang tơroi tơbăt găh dôm tơdrong hơdrin đơ̆ng Việt Nam păng Mi lơ̆m atŏk kơtang vei lăng kơjăp tơdrong chă koh păng tĕch mơdro ‘long trŏ lăp; pơchoh trong tơ iung pơjing trong pơprŏ jang lơ̆m khei năr au kơnh vă roi năr roi atŏk kơtang jang hơdoi mơdro sa kơtang hloh dơ̆ng ‘moi kiơ̆ tơdrong pơjing rim tơdrong pơkăp kơtang, vei lăng kơjăp păng jang kiơ̆ rim trong jang tang găn hơlau đe koh tơtông păng tĕch mơdro ‘long glăi.

Sơnăm 2023, hơgăt teh bri kơ Việt Nam đei 14 triu 800.000ha, lơ̆m au đei 10 triu 100.000 ha bri ‘long kơdrơ̆ng păng 4 triu 650.000ha bri ‘long pơtăm, hăm ‘long hơyơ̆l teh jơnei 42%. ‘Long hơpôm kơ bri ‘long pơtăm, ‘long pơtăm răh rap lơ̆m teh đak sơđơ̆ng dang 80% tơdrong ‘meh vă chă ot tĕch lơ̆m teh đak păng tĕch tơ̆ teh đak đe.

Đei pơgơ̆r lơ̆m 4 năr đơ̆ng năr 4 truh năr 7/3, ‘moi kiơ̆ rim ‘măng pơma dơnuh kơtang; pơma dơnuh ‘lơ̆ng hơ iă, hop akŏm gô pơtruh ăn păng tơbăt ăn rim pang ƀơm truh dôm tơdrong bơ̆ jang vei lăng ‘long păng tơmam drăm đơ̆ng ‘long kơ Việt Nam, Mi păng Jơnŭm atŭm châu Â, lăng truh atŏk tơ iung hơnih jang ‘long trŏ lăp, kơjăp ‘lơ̆ng tơ̆ hơnăp kơnh.