Hơp Tak xăh Choh jang xa Nam Yang, apŭng Đak Đoa, dêh char Gia Lai đei 150 ha cheh phe. Pơyan phĕ âu ki đei 450 tân găr. Ƀok Nguyễn Tấn Công- Kơdră chĕp kơ̆l pơgơ̆r HTX tơroi: ƀât yă tŏk truh 100 triu 1 tân, kon pơlei đĭ tơlĕch tĕch truh 80% plei phĕ đei bơih. Kơsô̆ chĕh phe oei đei dơ̆ng kŭm đei tơlĕch tĕch mưh ƀôh yă chĕh pheh vă jur: “Yă chĕh phe tŏk đơ̆ng blŭng pơyan, ‘nŏh ưh jor kon pơlei đei xa yoa lơ tơpă. Mă ‘lŏ ‘nei bu bu kŭm ‘mĕh tĕch hăm yă 130.000 1kĭ. Mă lei ưh đei tĕch ƀât 130.000 1kĭ ki ‘nŏh tĕch hăm yă 110.000 hlak mă ưh ‘nŏh 90.000 hlak 1kĭ oei tôch ‘lơ̆ng đĕch. Kon pơlei băt hơdăh gô đei năr yă tơplih dơ̆ng, ưh kơ sĭ tŏk hơnơ̆ng ôh. Hăm kon pơlei, yă tĕch đơ̆ng 70 - 80.000 hlak 1kĭ đĭ tôch hơiă dêh bơih".

Ƀât mă bơngai pơtăm tom tĕch ƀât yă oei măk, ‘nŏh anih jang, ot chĕh phe iĕ păng păh lăp tơ̆ tơring tơtă tơƀâp lơ tơdrong krê. Ƀok Nguyễn Huỳnh Phú Lâm- Kơdră chĕp kơ̆l Công ty jang chĕh phe Classic (plt Pleiku, Gia Lai) akhan: yă chĕh phe tŏk păng jur hrĕnh pơm ưh sơđơ̆ng truh anih tĕch mơdro. Mă lei, yoa tơdrong kơhret đơ̆ng dôm hla ar pơkăp pơm ăn anih jang athei răt iŏk lơ tơmam vă jang xa. Tơdrong ‘nâu pơm tơlĕch lơ tơdrong pơmat tat: nhen jên răt tơmam ƀât lăp tŏk hlŏh 2 ‘măng păng anih jang ưh tom hơmet yă kiơ̆ anih tĕch mơdro tơ̆ ‘ngoăih: “’Mĕh vei kơjăp tơdrong jang xa hơnơ̆ng ‘nŏh athei ‘măn tôm tơmam. Oei kơsô̆ tơmam ‘măn răk ‘nŏh pơtih gia ƀât lăp răt hăm yă tôch lơ, dang ei yă jur, ưh tom hơmet kiơ̆. Hăm anih jang hơdoi đunh đai ‘nŏh athei đei nơ̆r tơroi vă hơmet ming, ưh đei hrĕnh nhen thoi yă chĕh phe tĕch tơ̆ anih tĕch hăm kơmăy. Mă lei hăm bơngai răt tơmam ‘nŏh athei tơplih ming hloi, ‘nŏh anih jang gô pŭ lơ tơdrong".

Ƀok Lương Tiến Việt- tơ ‘ngla 1 anih tĕch chĕh phe ‘lơ̆ng tơ̆ xăh Đăk Tơ Ver, apŭng Chư Păh, dêh char Gia Lai tơdra, yă chĕh phe rŏ năng gô hơnơ̆ng jur tơ̆ hơnăp kơnh. Yoa thoi nŏh, vă găn ƀiơ̆ tơdrong krê, anih tĕch mơdro lăp răt tơtơng đĕch: “Dôm ‘măng yă jur hơnơ̆ng dôm năr đơ̆ng rŏng kơ pơdơ̆h lêh, mă lei kơsô̆ tơmam mong tŏk tôch lơ. Yă tŏk păng jur kiơ̆ anih tĕch mơdro tơ̆ ‘ngoăih ‘nŏh anih jang oei athei răt mong hơnơ̆ng. Mă lei, răt đang chă răp mơ̆ng, răt dar deh, ưh đei răt iŏk 1 vât hloi. Yoa anih tĕch mơdro oei jur tŏk, ưh tam mă sơđơ̆ng”.

Ƀok Phạm Văn Binh- Kơdră Anih vei lăng jang kơmăy, tĕch mơdro dêh char Gia Lai tơroi, cheh phe jĭ tơmam tơm, rim sơnăm tơgop dang 80% kơjă tơmam tĕch tơ̆ teh đak đe đơ̆ng tơring. Ƀok Phạm Văn Binh akhan, tơ̆ hơnăp tơdrong jur tŏk tơ̆ anih tĕch mơdro, anih jang kăl đei lơ trong jang vă găn ƀiơ̆ tơdrong krê, pơm ‘lơ̆ng ăn tơdrong jang xa, ot tĕch:

“Hăm anih chă răt tơmam, ot, tech chĕh phe tơ̆ teh đak đe athei băt hơdăh rim tơdrong tơ̆ anih tĕch mơdro păng tơdrong tĕch mơdro tơ̆ hơnăp. Mă 2, anih tĕch mơdro tơ̆ châu Âu jĭ anih tĕch mơdro tih găh chĕh phe, athei đei tơmam ‘lơ̆ng. Kơna tơdrong tĕch mơdro, jang xa athei tơcheng truh trong jang kơjăp ‘lơ̆ng, jang xa rơgŏh. Tơtă ăn dôm pang akŏm jơhngâm hơmet đei tơmam ‘lơ̆ng vă tĕch tơ̆ teh đak đe. Hăm kon pơlei ‘nŏh ƀai hŏk ‘nâu đei lơ bơih, yă tŏk ‘nŏh tơlĕch jên jang lơ, yă jur jing pơm ăn jang xa lôh. Kơna athei jang xa lăng kiơ̆ tơdrong tơproh trong jang tŏk ‘long chĕh phe".