Pơlei tơmang pơhiơ̆ Trà Nhiêu, apŭng Duy Xuyên hơtăih kơ pơlei tơm Hội An lăp 5km păng hơtăih kơ pơlei tơm Đà Nẵng 30 km. Tơ̆ au đei 10ha bri ‘long gao đak hăm lơ pơlei đei tơdrong jang sơ̆ ki ‘lơ̆ng rŏ.

‘Nhŏng Phạm Minh Tâm, tơ-ngla thŏng nan Cô Mốt, tơ̆ tơring Duy Vinh jang tơmang pơhiơ̆ đĭ 7 sơnăm kơ au, mă kăl tơgŭm ba tơmoi năm tơmang pơhiơ̆ bri ‘long gao đak, chă dăng hơnhoăl. Đei năr, hơnih ‘nhŏng sơng dang 50 truh 100 ‘nu tơmoi, găh lơ ‘noh tơmoi teh đak đe. Kơjă hao thŏng nan, et sa đơ̆ng 200.000 hlak jên truh 250.000 hlak jên lơ̆m 1 ‘nu. ‘Nhŏng Phạm Minh Tâm tơbăt, hơnih ‘nhŏng đei 15 tong thong nan, pơjing tơdrong jang ăn lơ bơngai tơ̆ au: “Tơmoi năm tơmang bri ‘long gao đak đơ̆ng noh hao thŏng nan. Ba jei pơgơ̆r pai por ‘nhot ăn tơmoi chă sŏng sa kơ ‘năr dơ̆ng. Mĭnh ‘măng chă glơi đơ̆ng 6 truh 7 thŏng nan đei 14 truh 16 ‘nu tơmoi, 2 ‘nu tơmoi hao mĭnh tŏ thŏng nan kơthŭng kơjă kơjên 100.000 hlak jên, găh sŏng sa kơ ‘năr dơ̆ng ‘noh gô mơ̆ng kiơ̆ ‘nhĕm ‘nhot tơmoi ‘meh vă. Hơpơi đei lơ tơmoi năm ngôi, kơdih ba păng kon pơlei chơt hơ iă jang sa iŏk đei rim năr".

Tơmoi năm tơ̆ Trà Nhiêu roi năr roi lơ, pơjing rơvơn ăn rim hơnih jang tơmang pơhiơ̆ jang sa iŏk yua kơjăp, kon pơlei tơring jei đei iŏk yua kơjăp mơ̆n. Dang ei tơ̆ pơlei Trà Nhiêu đei dang 15-20 ‘nu kon pơlei vang jang lơ̆m khul thŏng nan kơthŭng kơ ‘nhŏng Phạm Minh Tâm. Yă Đỗ Thị Sáng, kon pơlei oei tơ̆ thôn Trà Đông, tơring Duy Vinh akhan, sơ̆ choh mir ƀa lăp tăh sa kơtĕch sơnăm. Đơ̆ng mă đei pơjing pơlei tơmang pơhiơ̆ cham char, yă vang mơ̆t lơ̆m khul ăn tơmoi mơng thŏng nan kơthŭng, lơ̆m mĭnh năr jei sơng iŏk đei mĭnh ƀar hrĕng hlak jên.“Lu nhôn lơ̆m khul vơ̆r thŏng nan ba tơmoi chă tơmang lăng bri ‘long gao, đei ‘măng tơmoi tôch kơ lơ. Đei tơmoi tơmang pơhiơ̆ truh hăm kon pơlei ‘noh kon pơlei chơt hơ iă dêh, jang sa đei iŏk yua tŏ sĕt, lăp mah mai chă tăh sa kơ ‘năr”.

Klo akăn yă Trần Thị Xì hăm ƀok Trần Văn Hùng oei tơ̆ thôn Trà Đông, tơring Duy Vinh pơjing minh hơnih tĕch mơdro ‘noh hơnih pơdơ̆h jơ̆ng tơmoi. Tơmoi năm tơ̆ au chă sa dôm ‘nhĕm ‘nhot gĭt kăl nhen mì Quảng, por ‘nhĕm iĕr, ƀĕng kuôn ... Klo akăn ƀok yă Xì oei pơm tơlĕch tơmam drăm pơsư̆ hăm kram nhen kơđeng hơdrŭng, kơƀang tang dŏ ... vă chă tĕch ăn tơmoi. Yă Xì tơbăt: “Sơ̆ jang chŭn mir tôch mơmat tat, hrei au ŭnh hnam tơplih jang tơmang pơhiơ̆, tơdrong hơrih sa jei hiôk jơnap ƀiơ̆. Khei đei tơmoi lơ ‘noh ŭnh hnam jang sa iŏk đei mĭnh ƀar jĭt triu hlak jên. Găh lơ bơ̆n chă pai por ‘nhot ăn tơmoi sŏng sa, găh klo ‘noh chă tanh hre tơlak tĕch ăn tơmoi păng ba tơmoi tơmang pơhiơ̆".

Tơ̆ pơlei tơmang pơhiơ̆ cham char pơlei pơla Trà Nhiêu đei 5 ŭnh hnam jang tơmang pơhiơ̆ jang sa. Pơlei tơmang pơhiơ̆ Trà Nhiêu tŏk bŏk atŏk tơ iung tơdrong jang tơgŭm ăn bơ̆ jang tơmang pơhiơ̆ nhen: chă dăng, hrăh sơnhoăl tơ̆ đak kroong, tanh sơkok ƀŭng, tanh jĭt, pai tơdrô hơlăk. Sơnăm 2010, Pơlei Tơmang pơhiơ̆ Trà Nhiêu đei pơjing, đơ̆ng noh truh dang ei pơih đei rơvơn ăn kon pơlei atŏk tơ iung tơmang pơhiơ̆. Ƀok Nguyễn Sáu, Kơdră chĕp pơgơ̆r Hơnih vei lăng kon pơlei tơring Duy Vinh, apŭng Duy Xuyên tơbăt, lơ ŭnh hnam sơ̆ tôch tơnap tap dang ei hlôi đei ƀôh.“Nhôn hơpơi tơmang pơhiơ̆ kơ tơring atŏk tơ iung pơjing đei lơ tơdrong jang ăn kon pơlei. Lơ̆m pơlei đei 5 ŭnh hnam jang tơmang pơhiơ̆, jang sa đei iŏk yua kơjăp. Tơdrong jang tơmang pơhiơ̆ atŏk tơ iung găh mŭk drăm. Hơpơi ‘meh vă pơlei tơmang pơhiơ̆ Trà Nhiêu đei kơdră kơpal lăng ba tơmơ̆t jên jang dơ̆ng hơnih sơng hơvơn tơmoi păng dôm hơnih pơdă tơmam drăm tơmang pơhiơ̆ tơring vă hơvơn đei lơ tơmoi păng pơgơ̆r pơtho tơbăt ăn kon pơlei băt hơdăh găh tơdrong jang tơmang pơhiơ̆”.

Hrei au, tơmang pơhiơ̆ pơlei pơla păng tơmang pơhiơ̆ cham char tŏk bŏk atŏk tơ iung kơtang tơ̆ rim tơring kơ dêh char Quảng Nam. Lơ tơring hlôi pơjing khul jang hơdoi, hơp tak xah tơmang pơhiơ̆ pơlei pơla. Ƀok Hồ Quang Bửu, Kơ iĕng Kơdră chĕp pơgơ̆r Hơnih vei lăng kon pơlei dêh char Quảng Nam tơbăt, tơring hlôi đei lơ trong jang tơgŭm djru kon pơlei jang tơmang pơhiơ̆, pơtho ăn kon pơlei trong jang tơmang pơhiơ̆, ăn kon pơlei năm chă lăng, hŏk pơhrăm đơ̆ng rim tơring anai. Dôm trong jang tơmang pơhiơ̆ au ưh khan lăp tơgop pơm hơtŏk lơ trong jang tơmang pơhiơ̆, atŏk tơ iung mŭk drăm mă lei oei atŏk tơ iung tơmang pơhiơ̆ hăm tơdrong oei sa joăt joe sơ̆ ki.“Hrei au, dêh char pơtrŭt atŏk tơ iung trong jang tơmang pơhiơ pơlei pơla, dôm pơlei jang tơmang pơhiơ̆ păng tơmang pơhiơ̆ pơlei pơla choh jang sa. Nhôn đei trong jang pơrô̆ athei rim tơring kăl tơgŭm djru hăm lơ trong jang, tơgŭm ăn tơmang pơhiơ̆ pơlei pơla, tơmang pơhiơ̆ choh jang sa au tơklep kơjăp dih băl ƀar păh Hội An, Mỹ Sơn păng tơmang pơhiơ̆ tơring đak dơsĭ kơ Quảng Nam. Nhôn lui akhan atŏk tơ iung tơmang pơhiơ̆ pơlei pơla đei trong jang mơ̆t lĕch dih băl hlôi hơnhăk đei jơnei hơ iă ăn kơdih dôm bơngai jang tơmang pơhiơ̆ tơring choh jang sa adoi nhen jang tơmang pơhiơ̆ pơlei pơla”.