Jang blŭng a hăm 9 ‘nu bơngai, truh dang ei HTX choh jang xa – tĕch mơdro – pơvih pơvăn Tơ Tung (xăh Tơ Tung, apŭng Kbang, Gia Lai) dang ei đĭ tŏk truh 67 ‘nu bơngai jang vang pơtăm păng ep đak plăng pơm pơgang. Kiơ̆ mŏ Nguyễn Thị Thanh Hương, Kơdră vei lăng HTX, adrol sơ̆, kon pơlei lăp pơtăm hơdrô̆ ƀum păng hơƀo đĕch. Đơ̆ng sơnăm 2019 truh dang ei, gơnơm đơ̆ng pơtăm plăng, mă dôm bơngai jang lơ̆m HTX đei iŏk yoa sơđơ̆ng ƀiơ̆. HTX hlôi pơjing đei hơnăn đak plăng lăp hăm hơgăt tơmam OCOP 3 sơ ‘nglŏng kơ dêh char, hăm tơdrong tĕch mơdro ƀônh hlot, sơđơ̆ng ‘lơ̆ng tơ̆ 1,2 siêu thĭ păng anih tĕch pơgang.

Mŏ Nguyễn Thị Thanh Hương tơroi: “Mưh hơmet lăp hăm tơdrong hơgăt ‘nŏh tơmam roi ‘lơ̆ng ƀiơ̆. Nhôn adrin pơm kiơ̆ dôm tơdrong hơgăt tơmam OCOP vă hơnhăk tĕch tơmam tơ̆ ‘ngoăih ƀônh hlot, pơjing đon lui ăn bơngai răt. Dang ei, HTX đei Công ty pơm pơgang păng tơmam pơyoa ăn kơ jang pơgang Đà Nẵng kĭ hla ar răt iŏk pơđĭ, hơnhăk ba iŏk yoa jô̆ păh lăp đơ̆ng 50-60 triu hlak jên 1ha 1 sơnăm.”

Lơ̆m tơring tơter Anih vei lăng tơmam bri brăh kăp gĭt Kon Chư Răng, 1,2 anih jang tơlĕch jên jang hăm kon pơlei apŭng Kbang iŏk yoa tơdrong 'lơ̆ng đơ̆ng 'long pơgang. Nhen tơ̆ xăh Đăkrong đei 2 tơdrong jang pơtăm 'long pơgang oei tơlĕch jang tơ̆ plei Kon Trang păng plei Kon Lanh Te, akŏm đĭ đăng tĕh pơtăm vă jê̆ 40ha. Nhen thoi noh mơ̆n, tơ̆ dôm xăh Sơn Lang, Kon Pne, Sơ Pai, păng Krong (lơ̆m apŭng Kbang mơ̆n) đei vă jê̆ 240ha 'long lơ ve, sâm tơmo, đương quy, đinh lăng păng kơmưt oei pơtăm kiơ̆ tơring mă ưh 'nŏh pơtăm hơla yơ̆p 'long bri.

Ƀok Ngô Văn An, Phŏ Kơdră vei lăng kon pơlei xăh Đăkrong, hơmĕng dôm tơdrong jang pơtăm 'long pơgang gô pơm tơplih đei tơdrong arih xa găh mŭk drăm ăn kon pơlei kon kông tơ̆ âu: “Kiơ̆ đơ̆ng tơdrong jang tơ̆ plei Kon Trang (7ha) păng plei Kon Lanh Te (30ha), gô chă dơ̆ng tơdrong jang ăn kon pơlei lơ̆m xăh. Dôm công ty kŭm vă pơtruh hơdrĕch, tơđăh, tơmam jang păng kĭ pơkăp hla ar răt iŏk pơđĭ tơmam hăm mih ma duch nă tơ̆ hơnăp kơnh.”

Đơ̆ng đei tơdrong tơchơ̆t kơsô̆ 09-NQ/TU đơ̆ng Khul kơdră chĕp kơ̆l Đảng ƀô̆ dêh char Gia Lai (jăl XV) sơnăm 2019 găh chĕp vei păng atŏk tơiung ‘long pơgang, truh dang ei, lơ̆m dêh char pơtăm đei hlŏh 4200ha ‘long pơgang. Gia Lai đĭ đei 55 tơmam pơgang đei chih tơbăt tơmam OCOP (lơ̆m noh đei 9 tơmam 4 sơnglŏng). Dêh char đei 4 hnam kơmăy pơm pơgang, chih hơdăh anih pơm pơgang, atŭm hăm ‘nŏh vei kơjăp rim tơdrong đơ̆ng pơtăm truh pơm tơlĕch pơgang. Kŭm hăm ‘nŏh, dang ei Gia Lai đei 4 tơdrong jang atŏk tơiung ‘long pơgang đei kĭ ăn, hăm đĭ đăng kơsô̆ jên jang dang 497 ti, păng 10 tơdrong jang oei chă jên jang, hăm kơsô̆ jên đei tơdra vă bơ̆ jang hlŏh 7.272 ti.

Ƀok Nguyễn Văn Hoan, Phŏ Kơdră Anih vei lăng choh jang xa păng atŏk tơiung tơring tơrang dêh char Gia Lai, ăn tơbăt, dêh char pơjing tơdrong ‘lơ̆ng hiôk hian ăn dôm anih jang tơmât jên jang găh ‘long pơgang: “Găh sơng iŏk jên tơmât jang, nhôn vă pơjing tơdrong ‘lơ̆ng, hiôk hian hlŏh ăn dôm anih tĕch mơdro chă dăr lăng dôm tơring gơ̆h pơtăm ‘long pơgang lăp ‘lơ̆ng hăm tơdrong chăt arih, tih vơ̆ đơ̆ng rim kơloăi ‘long pơgang. Dôm tơdrong jang đei tơlĕch gô đei roi tơbăt ăn anih jang dôm tơring gơ̆h bơ̆ jang. Mă loi nhôn tôch ‘mĕh anih jang hơnhăk ba hnam kơmăy pơm pơgang truh hăm dêh char”.