Dêh char Đắk Lắk dang ei đei hloh 1.700 hnam rong sem pleng, akŏm lơ tơ̆ pơlei tơm Buôn Ma Thuột păng dôm apŭng Ea Kar, Ea Súp, Krông Pắc. Kơsô̆ tơpu sem pleng kơ dêh char đei đơ̆ng 8-10 tấn lơ̆m 1 sơnăm. Đắk Lắk jĭ dêh char dơ̆ng hơdrol tơring Tây Nguyên păng oei lơ̆m grŭp 10 dêh char pơlei tơm đei kơsô̆ hnam rong sem pleng tih hloh lơ̆m teh đak. Dang ei, lơ̆m dêh char đei 15 tơmam pơm tơlĕch đơ̆ng tơpu sem pleng đei hơlen lăng klaih song ăn ‘noh tơmam OCOP 3 hơ nglŏng, 8 tơmam OCOP 4 hơnglŏng.

Đắk Lắk hlôi đei tơmam tơpu sem pleng mă blŭng tĕch tơ̆ teh đak đe kiơ̆ trong tơm tơ̆ anih tĕch mơdro Trung Quốc păng kiơ̆ trong iĕ tơ̆ 1,2 teh đak nhen Mi, Úc, Nhật Bản...Hơdai hăm dôm jơnei hlôi iŏk đei, tơdrong jang rong sem pleng tơ̆ dêh char Đắk Lắk tŏk bŏk tơƀơ̆p lơ mơmat tat păng long nol găh trong jang proh hơmet tơring rong tơm, pơm tơlĕch păng tĕch tơmam, vei lăng ‘lơ̆ng păng pơjing hơnăn.