Dêh char Lâm Đồng akhan 350 unh hnam đei rơmo iŏk đak toh jĭ păng lôch đơ̆ng rŏng kơ ƀet vaccine tang găn jĭ pơplei tơ̆ hơkar Navet - LpVac đơ̆ng Công ty Navetco. Đơ̆ng rŏng lơ ‘măng pơma nuh, truh dang ei đĭ đei 330 unh hnam, hăm 7.186 tŏ rơmo jĭ păng 511 tŏ rơmo lôch drơ̆ng nơ̆r iŏk jên hrŭ ‘mong đơ̆ng Công ty Navetco hăm kơsô̆ jên hlŏh 35 ti 500 triu.

Dang ei Công ty Navetco hlôi tơlĕch jên hrŭ ‘mong đơt mônh vă jê̆ 18 ti, kơsô̆ jên hrŭ đơt 2 vă kla adrol kơ ‘năr 28/11 âu kơnh. Kiơ̆ ƀok Nguyễn Hà Lộc, Phŏ Kơdră Anih vei lăng choh jang xa păng atŏk tơiung tơring tơrang dêh char Lâm Đồng, hrei ‘nâu oei đei 20 unh hnam tam mă drơ̆ng nơ̆r hăm tơdrong hrŭ ‘mong. Dêh char vă hơnơ̆ng athei Công ty Navetco pơgơ̆r pơma nuh, tơlĕch trong hrŭ ‘mong mă lăp vă vei lăng ‘lơ̆ng tơdrong đei yoa ăn bơngai rong.