Truh dang ei akŏp hơgăt teh ‘long sa plei kơ dêh char Kon Tum hlôi iŏk đei hloh 14.000 hek tar, tŏk hloh 10.500 hek tar pơting hăm sơnăm 2020. Thoi noh dêh char Kon Tum hlôi jang đang hrôih hloh 1 sơnăm păng yak hloh 4.000 hek tar pơting hăm tơdrong hơgăt tơlĕch ăn truh sơnăm 2025. Vă rim sơnăm hơtŏk tơiung 3.000 hek tar ‘long sa plei, 3 sơnăm âu ki, dêh char Kon Tum tŭn pran pơtho tơƀôh, tơgŭm tơtom găh tơđăh, jên, ki thuơ̆t ăn kon pơlei jang chŭn mir.

Kŭm hăm ‘noh bơ̆jang kiơ̆ đei yua trong tơlĕch jang hơmet ming pơgar ‘long sa plei, mă loi ‘noh jĭ tơ̆ tơring kon pơlei kon kông. Truh dang ei dêh char Kon Tum kŭm hlôi pơjing đei 25 mã kơ sô̆ tơring pơtăm, lơ̆m noh đei 18 mã kơ sô̆ tơring pơtăm tĕch tơ̆ teh đak đe păng 7 mã kơ sô̆ tĕch lơ̆m teh đak hăm akŏp hơgăt teh vă jê̆ 400 hek tar ‘long sa plei.