Ƀok Hoàng Văn Ga, 1 ‘nu bơngai pơtăm chĕh phe tơ̆ xăh Ia Nan, apŭng Đức Cơ, dêh char Gia Lai pơtăm 2 ha cheh phe tơm tih đĭ đei plei bơih. Ƀok Hoàng Văn Ga tơroi, tŏ phang đunh pơm ăn cheh phe ưh kơjăng, đơ̆ng noh jing đei yă de phă tôch dêh. Lơ̆m kơsô̆ vă jê̆ 2000 tơnơm chĕh phe lơ̆m pơgar, đĭ đei 600 tơnơm đei yă de phă pơm ăn hla jơk, plei kơtĕn kro hơlŭng: “Hnam nhôn âu dang 30% đei yă de phă mă ưh gơh hơmet. Pruih pơgang truh 4 -5 vât bơih, jô̆ hloi pruih ôp hơmet rim tơm, pruih đang pơgang ‘nâu pruih pơgang to dơ̆ng mă lei ưh kơ pơlôch đĭ yă da ‘mơ̆i, ƀơm ưh ‘lơ̆ng truh tơ̆ pơgar ‘long pơtăm, tơm yơ đei yă de phă ‘nŏh ưh jur plei hiong đơ̆ng 70 truh 100%”

Tơ̆ apŭng Ia Grai đei hlŏh 18 rơbâu ha chĕh phe đei plei. Yă de hlôi đei tơ̆ lơ pơgar. Dôm tơring đei pơgar chĕh phe yoa yă de phă lơ ‘nŏh xăh Ia Sao, Ia Hrung, Ia Yok,... Adrol kơ ‘nŏh, lơ̆m khei 3 sơnăm ‘nâu, lơ̆m apŭng lăp đei hlŏh 200ha đei yă de phă, truh dang ei đĭ tŏk hlŏh 500ha bơih. Kiơ̆ nơ̆r tơblang đơ̆ng ƀok Đỗ Xuân Hiền, Kơdră Anih pơvih ăn tơdrong choh jang xa apŭng Ia Grai, yă de chek lar yoa tŏ đunh păng ‘mi jruh blŭng pơm ăn yă de chek lar tôch ƀônh. Vă tơjră hăm tơdrong răm đơ̆ng yă de phă, anih jang kơpal tơtă, hăm dôm pơgar ‘long đei yă de phă dêh ‘nŏh athei kăt hŭt lê̆ sơdrai đei yă de phă dêh vă sư da ƀiơ̆ kơ tơpŏh; jang kiơ̆ hrơ̆ch ‘lơ̆ng dôm trong tang găn tơ̆ dôm pơgar chĕh phe đei yă de phă da biơ̆; tơchĕng mă hơlen adrol ‘mĕh pơih xă teh pơtăm chĕh phe.

Ƀok Đỗ Xuân Hiền tơblang dơ̆ng: “Yă de phă ‘long chĕh phe păng yă de chek lar kơlih đơ̆ng ‘năr tŏ hơdai hăm dôm ‘măng ‘mi jruh blŭng, hơyuh tŏ ‘yôm tôch ‘lơ̆ng vă yă de chek lar, phă ‘long.”

Kiơ̆ Anih vei lăng rei pơtăm păng ‘long pơtăm dêh char Gia Lai, yă de da phă tôch lơ tơ̆ ‘long chĕh phe, hơnơ̆ng đei đơ̆ng khei ‘long lĕch pơkao truh đĭ pơyan phĕ, ƀât lăp pơm hiong răm lơ ăn pơgar ‘long.

Vă tơgŭm ăn kon pơlei tang găn yă de, Anih vei lăng rei pơtăm păng ‘long pơtăm Gia Lai athei dôm tơring, anih jang, mir đak lar pơtăm chĕh phe pơtho ăn kon pơlei bơ̆ jang kiơ̆ trong vei lăng rơgŏh pơgar ‘long, kăt hơmet sơdrai đei sơdrông phă, tơ ‘mơ̆ng tơƀiĕng, sơdrai ưh đei yoa păng sơdrai tơter teh vă pơgar chĕh phe rơhơi ‘lơ̆ng, găn ƀiơ̆ yă de tơpoh. 

Ƀok Trần Xuân Khải, Kơdră Anih vei lăng rei pơtăm păng ‘long pơtăm dêh char Gia Lai ăn tơbăt dơ̆ng: “Khei ‘năr âu ki, anih rei pơtăm, vei lăng ‘long pơtăm hơtŏk tơdrong dăr lăng tơ̆ pơgar ‘long, tơgŭm ăn kon pơlei bơ̆ jang hrơ̆ch ‘lơ̆ng dôm ki thuơ̆t jang, vei rong kŭm nhen tang găn yă de phă. Hăm dôm pơgar đei yă de phă kon pơlei athei kăt lê̆ dơng sơdrai đei yă de phă dêh, pôi akŏm păng sŏh lê̆. Hăm dôm pơgar ưh gan đei yă de phă 'nŏh kon pơlei athei tơlĕch trong tang găn mă 'lơ̆ng”.

Kiơ̆ kơsô̆ chih jô̆ đơ̆ng Anih choh jang xa Gia Lai, dang ei lơ̆m dêh char đei hlŏh 4.800ha cheh phe đei yă de phă. Lơ̆m kơsô̆ âu lơ pơgar ‘long đei yă de phă tôch dêh, hơnat vă gơ̆h blŭng jing ‘lơ̆ng. Kŭm kiơ̆ nơ̆r tơtă đơ̆ng anih vei lăng ‘long pơtăm, hăm dôm pơgar đei yă de phă dêh, kon pơlei athei kăt hŭt lê̆ dơng sơdrai vă yă de huei tơpoh xă. Tơdrong ‘nâu ưh lăp ƀơm ưh ‘lơ̆ng truh tơ̆ plei pơyan ‘nâu đĕch mă oei ƀơm truh pơyan đơ̆ng rŏng dơ̆ng.

Hăm hlŏh 105 rơbâu ha, cheh phe jĭ ‘long pơtăm tơm kơ dêh char Gia Lai. Tơdrong ưh kơmăh đak tơruih yoa tŏ phang pơđang đunh kŭm hăm lơ pơgar ‘long đei yă de phă ưh jor gô ƀơm ưh ‘lơ̆ng truh tơ̆ plei kơloăi ‘long ‘nâu. Yoa thoi nŏh, kon pơlei athei tơchĕng mă hơlen adrol kơ ‘mĕh pơih xă dơ̆ng teh pơtăm chĕh phe đơ̆ng rŏng kơ yă chĕh phe tŏk tôch dêh khei ‘năr âu ki.