Hlôi đĭ truh 70 sơnăm, mă lei ƀok A Thiếu, hơdrung Jrai oei tơ̆ pơlei Lung, tơring Ia Xiêr, apŭng Sa Thầy, dêh char Kon Tum oei pơm jŭk yŭk trong hơlau lơ̆m tơdrong choh jang sa. Ƀok tơbăt, sơnăm 2022, mưh Hơnih Đảng tơring pơjinH Tơdrong tơchơ̆t găh tơdrong hơmet ming mir pơgar, ŭnh hnam ƀok năm chih hơnăn apĭnh jang kiơ̆ đei sơng iŏk tơdrong tơgŭm ăn 20 dơnơm mit păng 50 dơnơm sầu riêng. Vă rơvơn vei lăng năng tông, ƀok răt dơ̆ng 50 Dơnơm sâu riêng păng răt pơlăp đing đak tơruih pơkom đak. Ƀok A Thiếu, ‘noh đảng viên hloh 30 sơnăm jang đảng, ƀok kăl pơm jŭk yŭk trong hơlau păng jang ‘lơ̆ng vă kon pơlei jang kiơ̆:“Ba jĭ mĭnh ‘nu đảng viên, truh dang ei hlôi 30 sơnăm jang Đảng, hơrih sot 70 sơnăm, đơ̆ng năr Khul kơdră Đảng tơring đei tơdrong tơchơ̆t tơplih ‘long pơtăm pơtho ăn ŭnh hnam nhôn adoi nhen kon pơlei pơtăm sâu riêng, măk ka vă kon pơlei đei tơdrong hơrih sa sơđơ̆ng, hơdrin pơm pơdrŏng, ba jĭ mĭnh ‘nu đảng viên kơna kăl pơm jŭk yŭk trong hơlou vă kon pơlei kiơ̆ yok rok jơ̆ng, jang kiơ̆, pơm kiơ̆ ‘lơ̆ng trong bơ̆ jang đơ̆ng Đảng păng Teh đak, ŭnh hnam ayơ oei mơmat tat lei kơdră tơring gô tơgum djru vă kon pơlei pơtăm sâu riêng păng băt kih thuơ̆t vei lăng năng tông, vă ‘long pơtăm plei ăl, kon pơlei sơđơ̆ng jang sa, hơrih sa”.  

Tơring Ia Xiêr, apŭng Sa Thầy đei hloh 1.600 ŭnh hnam, găh lơ ‘noh bơngai kon kông. Vă tơdrong hơmet pơ ‘lơ̆ng mir pơgar đei iŏk yua kơjăp, Khul kơdră Đảng tơring pơrô̆ athei rim chi ƀô̆ iung jang hơdoi hăm kang ƀô̆ tơring dăr lăng hơlen, lơ̆m au tơlĕch jang hơdrol ŭnh hnam dơnuh, ŭnh hnam đei iŏk yua ăn teh đak, ŭnh hnam kon kông mă lei kăl đei tôm rơvơn găh teh păng đak tơruih vă tơgŭm ăn hơdrĕch ‘long pơtăm. Hăm trong jang au lơ̆m 3 sơnăm au ki, tơring Ia Xiêr hlôi chă pơrô̆ athei kon pơlei ming hơmet mir pơgar đei hloh 54 ha mir pơgar ‘long pơtăm iŏk yua ưh kơ lơ vă tơplih pơtăm ‘long pơtăm sa plei, găh lơ ‘noh sâu riêng. Ƀok Nguyễn Văn Hậu, Kơ iĕng Kơdră Hơnih vei lăng kon pơlei tơring Ia Xiêr, tơbăt:“Đei lơ mir pơgar jơnei păng dôm hơnih jang sa ‘lơ̆ng đei tơring ăn kon pơlei năm lăng păng hŏk pơhrăm jang kiơ̆. Đơ̆ng noh dôm ŭnh hnam jang gơ̆h pơtho ăn dôm ŭnh hnam anai vă vei lăng năng tông ‘long pơtăm jing ‘lơ̆ng ngăl. ‘Ngoăih kơ ‘noh, bơ̆ jang chă pơrô̆ pơrôp, pơtho khan jơhngơ̆m đon kơ kon pơlei hlôi tơplih kơtang. Ƀôh ‘long pơtăm jang sa iok yua kơjăp, Teh đak tơgŭm djru lơ loh, pơtho ăn kih thuơ̆t tôch tơnăp kơna kon pơlei tôch kơ chhôk ‘nă păng sơđơ̆ng jơhngơ̆m vei lăng năng tông ‘long pơtăm jing ‘lơ̆ng”.      

Vă đei kon jên răt tơgŭm hơdrĕch dơđăh ‘long sa plei tơgŭm ăn kon pơlei oei lơ̆m 11 tơring, thĭ trân hơmet ming mir pơgar ưh kơ đei iŏk yua kơjăp, apŭng Sa Thây hlôi chă hơvơn đơ̆ng lơ hơnih. Jô̆ hơdrô̆ sơnăm 2023 truh dang ei, đơ̆ng kon jên tơpôl vang jang vă jê̆ 2 ti hlak jên, apŭng răt hloh 15.000 dơđăh sâu riêng păng măk ka tơgŭm ăn kon pơlei. Lơ̆m 4 khei blŭng sơnăm 2024 đei 177 ŭnh hnam kon kông lơ̆m apŭng hlôi hơmet ming 52ha mir pơgar hmă vă pơtăm ‘long sa plei. Yă Nguyễn Thị Luyến, kơ iĕng kơdră chĕp pơgơ̆r Hơnih vei lăng Choh jang sa păng atŏk tơ iung tơring tơrang apŭng Sa Thây, tơbăt:“Apŭng hlôi tơlĕch lơ tơdrong jang tơmơ̆t jên jang đơ̆ng lơ tơdrong jang, đơ̆ng rim tơdrong jang tơm teh đak, kon jên jang mŭk drăm tơgŭm ăn ‘moi kiơ̆ rim tơdrong jang pơtrŭt choh jang sa, hơnhăk hơdrĕch ‘long pơtăm ‘nao tơgŭm ăn kon pơlei, mă kăl hăm kon pơlei kon kông. Pơm hơtŏk jang sa iŏk yua kơjăp ăn kon pơlei lơ̆m tơring ‘noh apŭng hlôi tơlĕch jang pơtăm ‘long sâu riêng jĭ tôch kơ lơ, kon pơlei chơt hơ iă jang kiơ̆ păng vei năng năng tông ‘long pơtăm tôch tơnăp”.

Đơ̆ng rŏng 3 sơnăm tơlĕch jang kiơ̆ Tơdrong vă jang 07 găh hơmet ming mir pơgar, apŭng Sa Thây hlôi tơplih kơtang lơ̆m atŏk tơ iung lang să hơgăt teh ‘long sa plei. Akŏm iĕ jing să, tơdăh nhen hơgăt teh ‘long sa plei kơ apuưng lơ̆m vă đĭ sơnăm 2020 ‘nao đei 285ha ‘noh truh vă đĭ sơnăm 2023, Sa Thây hlôi lang să vă jê̆ 1.600 ha, lơ̆m au, sâu riêng hloh 660ha. Ƀok Nguyễn Minh Tuấn, Ƀĭ thư Đảng apŭng Sa Thây, sơkơ̆t hơdăh: “Hăm kon pơlei kon kông vang iung jang hơmet ming mir pơgar lơ̆m apŭng, mă kăl ‘noh vang iung jang kiơ̆ trong jang pơtăm ‘long sa plei ‘măng mă blŭng hlôi hơ nhăk ăn đei jơnei păng hrei au kon pơlei năm chih hơnăn vang jang kiơ̆ tôch kơ lơ. Sơnăm 2025, hơnơ̆ng tơlĕch jang tơgŭm djru hơdrĕch dơđăh ‘long hơmet ming mir pơgar ‘moi kiơ̆ ‘noh pơm tơplih jơhngơ̆m đon tơchĕng, trong jang sa kơ kon pơlei, hơdrin yak hloh tơnap tap, kơrŭn iung jing pơdrŏng”.

 Atŭm hăm trong jang hơmet ming mir pơgar, tơgŭm djru, pơtho ăn kon pơlei pơtăm ‘long sa plei atŏk tơ iung mŭk drăm ŭnh hnam, Hơnih jang Đảng apŭng Sa Thây jei hlôi đei trong chĕp pơgơ̆r hơdăh vă pơm hơtŏk jang sa iŏk yua kơjăp, ‘lơ̆ng păng jang sa đei iŏk yua kơjăp đơ̆ng mir pơgar. Truh dang ei, apŭng hlôi đei 2 ŭnh hnam iŏk đei ƀơk ăn mã tơring pơtăm sâu riêng hăm hơgăt teh să 31ha. Tơdrong choh jang sa ‘long sa plei đei tơlĕch jang kiơ̆ trong tuh mơ̆r, kơjăp ‘lơ̆ng. Găh hơnô̆ hơnăp, khul kơdră apŭng Sa Thây tŏk bŏk krao hơvơn hơnih mơdro sa tơmơ̆t jên jang ming man hnam kmăi pơm tơlĕch tơmam drăm plei ‘long sa plei vă pơjing đei trong jang hơdoi ƀar păng choh jang sa, pơm tơlĕch păng tĕch mơdro tơmam drăm choh jang sa.