VOV4.Bahnar - Kŭm hăm lơ tơ drong jang tơ gŭm tơ drong arih sa vă đe mŏ oh jang hơ tŏk tơ iung mŭk drăm, rim khŭl drŏ kăn tơ̆ Dak Lak oei hơ drin tơ lĕch jang lơ tơ drong jang pơm jên mong vă asong ăn bơ ngai jang lơ̆m khŭl mơ mat tat. Tơ drong jang âu hlôi tơ gŭm ăn lơ mŏ oh đei gơh khăm hơ met jĭ, vei lăng jơ hngơ̆m pran, tơ jur pŭ trăp jên hiong hoach mưh ưh kơ pŭn đei jĭ pơ lŏ.

        Iŏk đei kơ the ƀao hiêm pơ gang yua đơ̆ng khŭl drŏ kăn xăh pơ jao asong, mŏ Đặng Thị Bình, oei tơ̆ thôn 1, xăh Ea Kpam, apŭng Cư Mgar, dêh char Dak Lak tôch kơ chhôk. Mŏ Bình tơ băt, unh hnam ưh kơ đei teh choh jang sa, klo kăn sư tă kơ năm jang thuê vă đei jên rong 2 ‘nu kon tŏk bŏk sơ năm oei hŏk, lơ̆m noh đei 1 ‘nu kon đei jo jăn. Đunh kơ âu yua ưh kơ đei ƀao hiêm pơ gang kơ na mưh jĭ pơ lŏ, sư ưh kơ pơ̆n năm tơ̆ hnam pơ gang khăm jĭ yua hli kơ hoach jên lơ. Đơ̆ng khei 9 sơ năm ‘nâu, đei khŭl drŏ kăn xăh asong ăn the ƀao hiêm tơ pôl khei ‘năr 1 sơ năm, sư ƀôh sơ đơ̆ng jơ hngơ̆m ƀiơ̆.

        Tơ drong arih sa unh hnam nhôn ‘noh kŭm tŏk bŏk mơ mat tat, đei păh Khŭl drŏ kăn xăh ăn 1 kơ suơ̆t the ƀao hiêm ‘noh ĭnh kŭm bơ nê lơ, đei the ƀao hiêm vă ĭnh năm khăm jĭ kŭm dă ƀiơ̆ hoach jên ‘noh ĭnh kŭm sơ đơ̆ng jơ hngơ̆m ƀiơ̆ mưh năm khăm hơ met jĭ, tơ jur pŭ trăp găh jên mưh năm khăm ăn kơ dih kơ dâu ĭnh.

Mĭnh sơ năm rim khŭl drŏ kăn dêh char Dak Lak asong kơ hrĕng the ƀao hiêm pơ gang ăn mŏ oh păng hŏk tro mơ mat tat

        Kŭm hăm mŏ Bình, sơ năm ‘nâu đei 55 ‘nu drŏ kăn nai tơ̆ apŭng Cư Mgar đei asong the ƀao hiêm pơ gang. Yă Lê Thị Thu Hiền, Kơ dră vei lăng khŭl drŏ kăn apŭng Cư Mgar tơ băt, tơ drong asong the ƀao hiêm pơ gang ăn drŏ kăn păng hơ ioh mơ mat tat hlôi đei tơ lĕch jang tơ̆ tơ ring đơ̆ng lơ sơ năm kơ âu bơ̆ih. Gơ nang đơ̆ng noh hlôi tơ gŭm lơ mŏ oh păng đe mon hŏk tro đei dơ̆ng tơ drong hiôk vei lăng jơ hngơ̆m pran, tơ jur tơ drong bơ ngơ̆t păng pŭ trăp găh kon jên tơ dăh mưh ưh kơ pŭn đei jĭ pơ lŏ. Vă pơ vei hơ nơ̆ng tơ drong jang ‘nâu, rim khŭl jang păng khŭl tơ ring hlôi đei lơ trong jang pha ra băl pơm jên mong, iŏk đei tơ drong jang kiơ̆ ‘lơ̆ng đơ̆ng lơ đe mŏ oh jang lơ̆m khŭl.

        Trong krao hơ vơn pơm jên mong ‘noh đei jang kiơ̆ đơ̆ng lơ tơ drong jang kơ drŏ kăn nhen tơ drong jang iŏk akŏm tơ mam đe hŭt pơm jên mong, rim grŭp ‘mơ ‘met dăh mă mŏ oh krao hơ vơn đơ̆ng dôm bơ ngai jang lơ̆m khŭl drŏ kăn tơ gop kơ dih păng tơ drong jang âu đei đe mŏ oh jang kiơ̆ tôch kơ ‘lơ̆ng, tơ năp.

        Ưh khan lăp tơ̆ apŭng Cư Mgar, tơ drong jang asong the ƀao hiêm pơ gang hlôi đei lơ khŭl tơ̆ dêh char Dak Lak tơ lĕch jang păng pơ̆ih să. Nhen tơ̆ xăh Ea Kao, pơ lei tơm Buôn Ma Thuột, khŭl drŏ kăn xăh hlôi tơ lĕch jang pơm jên mong hăm trong iŏk akŏm păng rơ̆ih iŏk tơ mam đe hŭt vă tĕch. Kiơ̆ kơ yă Nguyễn Thị Tuyết, Kơ dră  vei lăng khŭl drŏ kăn xăh Ea Kao, đơ̆ng sơ năm sơ̆ truh dang ei, ‘moi kiơ̆ tơ drong krao hơ vơn mŏ oh vang jang iŏk akŏm păng rơ̆ih iŏk tơ mam đe hŭt vă tĕch, khŭl hlôi iŏk đei vă jê̆ 6 triệu hlak jên, yua vă răt 9 the ƀao hiêm asong ăn bơ ngai jang lơ̆m khŭl đei tơ drong arih sa mơ mat tat, đei jĭ jăn lơ̆m xăh.

        ‘Nâu kŭm jing 1 lơ̆m dôm tơ drong jang yua khŭl kơ pal tơ lĕch jang ‘noh jĭ iŏk akŏm răh tơ mam đe hŭt, râm rĕk nhươ̆ pơm rơ goh cham char păng nhôn tơ chĕng akhan ‘nâu kŭm jing 1 hơ năp jang tôch kơ gĭt kăl vă tơ gŭm 1,2 mŏ oh đei tơ drong arih sa mơ mat tat.

Pơm đei lơ trong jang pơm jên mong vă răt ƀao hiêm pơ gang, đe mŏ oh hlôi pơ jing grŭp jang thuê păng iŏk dơ̆ng jên jang vă pơm jên mong

        Yă Trần Thị Phong, Phŏ kơ dră Khŭl vei lăng drŏ kăn dêh char Dak Lak tơ băt, tơ drong jang asong the ƀao hiêm pơ gang ăn drŏ kăn mơ mat tat đei 1,2 khŭl jang kơ apŭng păng khŭl jang tơ ring tơ lĕch jang đơ̆ng sơ năm 2018. Kiơ̆ đơ̆ng noh tơ gŭm ăn kơ hrĕng mŏ oh đei tơ gŭm vei lăng jơ hngơ̆m pran rim sơ năm. Ƀôh đei iŏk yua đơ̆ng tơ drong jang ‘nâu hơ nhăk ăn kơ na lơ khŭl kŭm hŏk pơ hrăm păng tơ mơ̆t yua tơ̆ khŭl kơ dih sư. 1,2 anih jang jang ‘lơ̆ng nhen apŭng Cư Mgar, thị xã Buôn Hồ păng pơ lei tơm Buôn Ma Thuột. Vă tơ lĕch jang đei yua păng pơ vei hơ nơ̆ng, rim anih jang âu hlôi hơ nhăk tơ drong asong the ƀao hiêm pơ gang ăn khŭl jang mơ mat tat jing 1 tơ drong bơ̆ jang lơ̆m sơ năm vă krao hơ vơn mŏ oh vang jang, hơ dai hăm ‘noh pơ cheh trong pơm jên mong vă tơ gŭm lơ mŏ oh đei sa yua.

        Trong jang đơ̆ng anih jang ‘noh đe sư pơ jing dôm tơ drong jang tôch kơ hơ iă, pơ tih gia nhen iŏk akŏm tơ mam đe hŭt, jang thuê kiơ̆ grŭp vă mŏ oh jang thim păng iŏk jên mong vă răt ƀao hiêm. ‘Noh trong jang tôch kơ lơ thoi noh tơ ƀôh đei tơ drong ‘mêm mơ nat păng trong jang hơ gei đơ̆ng rim khŭl ‘noh nhôn ƀôh akhan tơ drong ‘noh tôch kơ kăl đei pơ trŭt jang.

        Tơ drong asong the ƀao hiêm tơ pôl ăn kơ khŭl mơ mat tat kơ rim khŭl drŏ kăn tơ̆ Dak Lak ‘noh jĭ 1 tơ drong jang đei lơ tơ drong hơ iă. Ưh khan lăp tơ gŭm lơ đe mŏ oh hlôh vao ƀiơ̆ găh tơ drong đei yua mư̆h yua ƀao hiêm pơ gang, tơ jur pŭ trăp kon jên mưh kơ pŭn đei jĭ pơ lŏ, mă kiơ̆ đơ̆ng noh oei tơ gop tơ gŭm ăn dơ̆ng lơ mŏ oh đei tơ drong hiôk gơh khăm hơ met jĭ păng vei lăng jơ hngơ̆m jăn, hơ tŏk ‘lơ̆ng kơ sô̆ yua ƀao hiêm pơ gang lơ lơ̆m kon pơ lei tơ̆ tơ ring.

            H’Xíu H’Mốc: Chih

Thuem: Tơ blơ̆