VOV4.Bahnar - Vă jê̆ 2 sơ năm âu ki, lơ hŏk tro đei tơ drong arih xa mơ mat tat tơ̆ dôm hnam trưng tơ̆ tơ ring atăih yăih kơ apŭng Cư M’gar iŏk đei 1 tơ drong jang tôch hơ iă 'nŏh jĭ Tơ gŭm bơ be ăn hŏk tro. 'Nâu jĭ tơ drong jang đơ̆ng Grŭp yoa đe hơ iŏh ‘mêm kơ eng (găh Khul hơ iŏh apŭng Cư M’gar) tơ lĕch trong jang vă tơ gŭm ăn đe hŏk tro tơ nuh, vang tơ gop kŭm hăm unh hnam đe ŏh jang atŏk tơ iung mŭk drăm.

Rim pơ gê hrôih, oh Đặng Viết Mạnh hŏk tro lăm 7A, Hnam trưng hŏk jă 2 Ngô Mây xăh Ea M’Droh, ‘noh tơ gŭm mĕ ƀă lĕch tơ̆ pơ gar phĕ hla, yuă ‘nhĕt ăn kơ pơ be vă jê̆ jĭt tŏ sa. Oh Mạnh tơ roi, pơ be đei hơ tŏk đơ̆ng 2 tŏ, yua đơ̆ng Jơ nŭm khŭl apŭng Cư M’gar pơ jao asong lơ̆m khei 5 sơ năm 2020. Vă jê̆ 2 sơ năm vei rong, dang ei unh hnam sư gơh tĕch vă iŏk jên răt phe sa hơ met ‘lơ̆ng tơ drong arih sa kŭm nhen nôp jên hŏk ăn kơ 4 ‘nu mŏ oh, năr blŭng sơ năm hŏk ‘nao.

“Đơ̆ng dang ei truh Têt pơ be ‘noh tuh dơ̆ng  2 - 3 tŏ, akŏp pơ be tŏk 10 tŏ bơ̆ih văi. Mĕ ƀă đĭ tĕch 2,3 tŏ vă răt phe, răt hla ar hŏk păng nôp jên hŏk ăn 4 ‘nu mŏ oh năm hŏk.”

Lei lăi thoi noh, oh Bàn Minh Kiệt hŏk tro lăm 7C, Hnam trưng hŏk jăl 2 Ngô Mây, xăh Ea M’Droh kŭm đei Jơ nŭm khŭl apŭng Cư M’gar asong 3 tŏ pơ be yŏng lơ̆m blŭng khei 3 sơ năm 2020. Truh khei ‘năr âu, unh hnam oh Kiệt kŭm hlôi rong tŏk 13 tŏ, đei kơ jă vă jê̆ 100 triệu hlak jên.

Mĭnh hŏk tro dơ nuh hin tơ̆ apŭng Cư M'gar đei asong 2 - 3 tŏ pơ be yŏng, đei kơ jă 8 - 10 triệu hlak jên

Kiơ̆ kơ ƀok Lý Văn Chòi ƀă oh Kiệt, đei iŏk pơ be yŏng ‘ngoăih kơ tơ gŭm unh hnam đei dơ̆ng tơ drong hiôk vei rong hơ tŏk tơ iung mŭk drăm sut pơ ngot tơ jur dơ nuh hin, ‘noh oei tơ gŭm đe kon đei hlôh vao ƀiơ̆ lơ̆m tơ drong vang jang sa, pơ hrăm tơ drong hơ drin, pơ nam.

“Đe kon oei tơ̆ hnam ưh kơ jang kiơ, đei asong pơ be ‘noh đe mon  tơ gĕch năm iŏk hla keo, yuă ‘nhĕt ăn pơ be sa tơ gŭm mĕ ƀă. Tơ drong vang jang thoi noh tơ ƀôh ăn đe mon ‘lŏ ƀiơ̆ yua kơ băt lai yơ hŏk, lai yơ jang. Đơ̆ng rŏng âu kơnh jing bơ ngai đei yua ăn tơ pôl.”

Ƀok thây Mai Văn Chuyền, Bơ ngai vei lăng Khŭl hnam trưng hŏk jăl 2 Ngô Mây (xăh Ea M’droh, apŭng Cư M’gar) sơ năm hŏk 2019 - 2020, tơ drong jang asong pơ be yŏng pơ tơm đei bơ̆ jang. Lơ khŭl hlôi krao hơ vơn tơ gŭm đơ̆ng rim bơ ngai đei jơ hngơ̆m đon ‘lơ̆ng tơ̆ pơ lei tơm Hà Nội, Hồ Chí Minh, Đà Nẵng păng 1,2 dêh char Tây Nguyên tơ lĕch jang asong pơ be yŏng ăn kơ đe oh rong hơ tŏk tơ iung mŭk drăm. Hơ dai hăm ‘noh khŭl kŭm jang hơ dai hăm anih jang khŭl grŭp, khŭl jang thú y… tơ gŭm pơm hơ drong, ƀet bơ̆ng dăh mă pơ tho trong vei lăng pơ be.

Đơ̆ng rŏng 2 -3 sơ năm vei rong, rim tơ drong jang pơ be adoi hơ tŏk tơ iung đơ̆ng 10 - 15 tŏ

Krao ‘noh hơ nih mong yua kơ pơ be gô ưh kơ asong ăn hloi mă lăp ăn mơng đĕch, lăng pơ be yŏng nhen jên blŭng a vă song băl. Kiơ̆ kơ ‘noh, 1 unh hnam hŏk tro đei tơ drong arih sa mơ mat tat gô đei tơ drong jang tơ gŭm đơ̆ng 2 - 3 tŏ pơ be yŏng, đei kơ jă dang 8 - 10 triệu hlak jên. Lơ̆m dang 3 sơ năm, mưh pơ be đĭ lơ ‘noh unh hnam gô pơ dreo dơ̆ng tôm kơ sô̆ pơ be hăm kơ sô̆ trăp blŭng a vă pơ jao ăn kơ hŏk tro dơ nuh hin nai.

Lăng ƀôh đei yua păng ‘lơ̆ng đơ̆ng tơ drong jang, Kâu lak ƀô̆ yua đe oh ‘mêm kơ eng hlôi hơ drin krao hơ vơn tơ drong tơ gŭm đơ̆ng dôm bơ ngai đei jơ hngơ̆m đon ‘lơ̆ng lơ̆m păng ‘ngoăih dêh char, kiơ̆ đơ̆ng noh hơ nhăk tơ drong jang truh hăm hŏk tro dơ nuh hin ưh khan lăp tơ̆ xăh Ea M’droh mă oei tơ̆ lơ tơ ring nai lơ̆m apŭng Cư M’gar nhen: xăh Ea Kpam, thị trấn Ea Pốk... Gơ nang đơ̆ng noh, vă jê̆ 2 sơ năm âu ki, hlôi đei 8 grŭp pơ be hăm 20 tŏ đơ̆ng hơ nih asong pơ be đei pơ jao ăn unh hnam hŏk tro đei tơ drong arih sa mơ mat tat lơ̆m tơ ring.

“Dang ei kơ sô̆ đe oh đei tơ gŭm găh lơ oei tơ̆ dôm xăh Ea M’Droh, Ea K’pam păng Ea Pốk. Mă lei, kiơ̆ đơ̆ng dăr hơ len băt hơ dăh đơ̆ng Jơ nŭm khŭl apŭng Cư M’gar ‘noh dang ei oei tôch kơ lơ đe oh mơ ti, dăh mă đei tơ drong arih sa unh hnam mơ mat tat tơ̆ dôm xăh lơ̆m apŭng Cư M’gar kăl đei tơ gŭm. ‘Nâu jĭ tơ drong jang hơ iă păng ‘lơ̆ng, tơ gŭm đe oh đei tơ drong hiôk hơ tŏk tơ iung vei rong hơ tŏk iŏk yua hai pơ tho pơ hrăm đon hlôh vao bơ̆ jang kơ na nhôn gô lang să lơ̆m apŭng.”

Đơ̆ng rŏng ‘noh, đe oh tơ gŭm dơ̆ng pơ be yŏng ăn dôm buăl mơ mat tat tơ̆ 1,2 xă hơ tăih hơ tŏ lơ̆m apŭng Cư M'gar

 Tơ drong krao hơ vơn tơ gŭm pơ be yŏng đơ̆ng jơ nŭm khŭl apŭng Cư M’gar ăn hŏk tro dơ nuh hin tơ̆ dôm xăh tơ ring hơ tăih hơ tŏ lơ̆m apŭng Cư M’gar ‘noh jĭ trong jang hơ iă, ‘lơ̆ng. Trong jang âu kŭm tôch kơ lăp hăm tơ ring tơ rang, tơ ring groi kông. Kiơ̆ đơ̆ng noh tơ gŭm unh hnam đe oh đei dơ̆ng tơ drong hiôk vei rong kon tơ rong hơ tŏk iŏk yua tơ plih ‘lơ̆ng tơ drong arih sa; mă loi ‘noh jĭ tơ ƀôh ăn hŏk tro truh tơ drong pơ hrăm đon hơ drin, pơ nam lơ̆m jang sa păng hŏk pơ hrăm.

Tuấn Long: Chih

Thuem: Tơ blơ̆