VOV4.Bahnar - Yak hloh dôm tơ drong tơ hlăk blŭng a, đơ̆ng rŏng hloh 1 khei jang kiơ̆ pơ vang găn vă tang găn jĭ Covid-19, kon pơ lei tơ̆ lơ pơ lei pơ la kơ xăh Cư Né, apŭng Krông Buk, dêh char Dak Lak hlôi đei tơ drong hơ met ming lăp vă sơ đơ̆ng tơ drong arih sa, vei sơ đơ̆ng jang sa. Oei dơ nơ̆ng lơ̆m hnam, mă lei chŭn mir oei jing ‘lơ̆ng, kon tơ rong kŭm pran jăng gơ nang đơ̆ng tơ drong đơ̆ng rim grŭp tang găn jĭ Covid tơ pôl păng khŭl jang hơ druh tơ dăm tơ gŭm.

Đei brŏk tơ̆ hnam đơ̆ng rŏng 1 khei hơ met jĭ Covid-19, mŏ H Trâm Kpă, oei tơ̆ plei Đrao, xăh Cư Né, apŭng Krông Buk ưh kơ kĕ ôn tơ drong chhôk hơ iă yua kơ đĭ klăih kơ jĭ păng đei tơ ƀơ̆p dơ̆ng kon drŏ kăn ‘lơ̆p sư. Mŏ H Trâm tơ roi, prăt 1 khei âu ki, iŏk đơ̆ng pơ đĭ 4 ‘nu lơ̆m hnam sư đei jĭ, sư tôch kơ hli bơ ngơ̆t. Lơ̆m khei ‘năr hơ met jĭ, mă đơ̆ng đei đe ƀak si, bơ ngai jang pơ gang păng khŭl jang tơ gŭm vei lăng, tơ gŭm tôch kơ ‘lơ̆ng, mă lei mŏ H Trâm oei bơ ngơ̆t ăn bơ ngai lơ̆m hnam păng kon tơ rong tơ̆ hnam ƀơ̆t pơ đĭ unh hnam athei năm oei hơ drô̆, hơ met, oei pơ lei pơ la ‘noh tŏk bŏk pơ vang găn.

      “Hmă ‘noh kon pơ lei gô năm jang mir roh vă tơ chă tơ mam sa unh hnam, mă lei jĭ ‘noh đe sư ưh kơ gơh năm lĕch tơ̆ ‘ngoăih. Iŏk đơ̆ng jĭ đei ƀôh ‘noh inh đei lăng lơ̆m rim trang mạng Facebook kŭm nhen tơ drong tơ roi đơ̆ng apŭng ‘noh ƀôh đei lơ bơ ngai năm jang tơ gŭm kŭm nhen teh đak năm mơ̆t tơ gŭm lơ ăn kon pơ lei, ưh khan lăp dôm unh hnam mơ mat tat mă đĭ đăng dôm unh hnam đei bơ ngai F0, F1 ‘noh tă kơ đei teh đak tơ gŭm ngăl.

Bơ ngai jang tơ gŭm vei lăng hơ ioh iĕ đei mĕ tŏk bŏk hơ met jĭ Covid-19

        Hloh 1 khei đei pơ vang găn, tơ drong arih sa kơ kon pơ lei tơ̆ xăh Cư Né đei tơ hlăk. Plei Đrao păng Ktơng Drun, 440 unh hnam kon pơ lei ‘noh truh 439 unh hnam ‘noh bơ ngai Êđê, arih sa gơ nang lơ̆m choh jang sa. Khei ‘năr âu tŏk bŏk jing pơ yan iŏk yua lơ kơ loăi tơ mam choh jang sa nhen ƀa, hơ ƀo, sầu riêng păng seh ‘nhĕt cheh phe. Mă lei yua kơ pơm kiơ̆ tơ drong hơ găt tang găn jĭ, rim ‘nu athei oei lơ̆m hnam ngăl. Dôm tơ drong jang vei lăng ‘long pơ tăm, kon tơ rong, iŏk yua tơ mam đơ̆ng choh jang sa, răt tơ mam yua đơ̆ng kon pơ lei adoi đei dôm bơ ngai jang tơ gŭm. ‘Nhŏng Y Bih Êban, bơ ngai jng lơ̆m khŭl jang tơ gŭm plei Đrao tơ roi.

        “Rim tơ drong jang tơ gŭm kon pơ lei lơ̆m tơ ring pơ vang găn ‘noh bơ ngơ̆t ăn kon tơ rong nhen yuă ‘nhĕt ăn rơ mo, ăn iĕr, bip, nhŭng, kŏ meo sa dăh mă dôm unh hnam năm ăn oei hơ drô̆ mă ưh kơ đei bu oei tơ̆ hnam. Tơ gŭm răt tơ mam ăn kon pơ lei lơ̆m tơ ring pơ vang găn, răt tơ mam yua kăl ‘noh khŭl jang tơ gŭm gô năm ăn truh tơ̆ hnam ăn kon pơ lei. Mưh rim bơ ngai đei jơ hngơ̆m đon ‘mêm mơ nat păng khŭl tơ gŭm găh tơ mam sa, pơ tih gia nhen ‘nhot, ƀum, plei ‘long mă đơ̆ng ‘năr kơ sơ̆ bơ̆ih ră đe ‘nhŏng oh jang tơ gŭm oei hao gre choh, gre hon đa năm rim trong pơ lei vă tơ tom asong ăn kon pơ lei”.

Bơ ngai jang tơ gŭm yuă ‘nhĕt păng hla ‘long ăn kon tơ rong ưh kơ mŏng ‘mi kial păng trong nơ năm mơ mat tat

Xăh Cư Né jĭ hơ nih đei jĭ lơ, hăm vă jê̆ 300 ‘nu jĭ Covid-19, lơ̆m noh lơ hloh ‘noh tơ̆ 2 pơ lei Đrao păng Ktơng Drun hăm vă jê̆ 240 ‘nu. Đơ̆ng ‘năr 22/8 truh dang ei lơ̆m xăh đei 17 pơ lei đei pơ vang găn, 4 pơ lei nai pơm kiơ̆ ưh kơ ăn yak vih vơ̆t lơ̆m tơ pôl kiơ̆ tơ chơ̆t 16. Xăh hlôi pơ jing 21 khŭl jang tơ gŭm păng grŭp Covid tơ pôl, ‘nâu jĭ khŭl jang răh tơ drong jang tơ gŭm, pơm răh gơng tơ ƀưh đơ̆ng kon pơ lei păng khŭl kơ dră. Dôm bơ ngai jang lơ̆m rim khŭl gô vei lăng tơ drong tơ gŭm răt tơ mam yua kăl tơ gŭm rim unh hnam, asong tơ mam păng che gom ăn kon pơ lei; tơ klep hơ dai tơ gŭm tĕch tơ mam choh jang sa vă tơ gŭm kon pơ lei đei ‘mĕh vă tĕch tơ mam đơ̆ng choh jang sa.

Tơ gŭm kon pơ lei gơ̆ hơ ƀo

       Rim khŭl jang tơ gŭm păng grŭp Covid tơ pôl kŭm tŏk bŏk iŏk jang tơ gŭm vei lăng 6 ‘nu oh hơ ioh kơ dôm unh hnam tŏk bŏk ăn oei hơ drô̆ akŏm dăh mă tŏk bŏk hơ met jĭ Covid-19. Tơ pôl tơ gŭm asong tã, đak toh, tơ mam yua kăl oei dôm khŭl jang tơ gŭm gô tơ plih băl năm pai por ăn kơ đe mon. Ƀok Hoàng Văn Thịnh, Kơ dră Anih jang mặt trận tổ quốc Việt Nam xăh Cư Né tơ băt:

        Đơ̆ng rŏng kơ xăh Cư Né ‘nao đei pơ vang găn 2-3 năr ‘noh đĭ đăng rim bơ ngai đei jơ hngơ̆m đon ‘mêm mơ nat lơ̆m dêh char Dak Lak adoi hlôi năm truh tơ gŭm ăn Cư Né tôch kơ lơ, mă kăl lơ̆m noh đei dôm tơ mam pơ gang, vei sơ đơ̆ng ăn ‘nhŏng oh lơ̆m tơ drong jang tang găn jĭ kŭm nhen asong ăn kon pơ lei, ưh kơ lê̆ kon pơ lei đei pơ ngot dăh mă đei hŭt lê̆ tơ̆ rŏng. Găh grŭp Covid tơ pôl păng dôm khŭl hơ druh tơ dăm jang tơ gŭm ‘noh tôch kơ tơ năp păng 1 jơ hngơ̆m đon, tơ klep hơ dai lơ̆m jang kiơ̆ tơ drong jang tang găn jĭ. Lơ khŭl hơ druh tơ dăm jang tơ gŭm, grŭp Covid tơ pôl mă đơ̆ng đei kon iĕ dăh mă trong lơ̆m pơ lei tôch kơ rơ ƀơ̆r hlŭt mă  lei ‘nhŏng oh tôch hơ drin tơ gŭm kon pơ lei 1 trong tôch đei yua”.

Tơ gŭm kon pơ lei vei lăng kŏ meo

        Đơ̆ng rŏng hloh 1 khei ăn oei hơ drô̆, pơ vang găn păng pơm kiơ̆ ưh kơ ăn yak vih vơ̆t lơ̆m tơ pôl vă tang găn jĭ, truh khei ‘năr âu, tơ drong jĭ tơ̆ hơ nih jĭ xăh Cư Né hlôi đei vei lăng, ưh kơ đei ƀôh dôm bơ ngai jĭ plơ̆ng lơ̆m tơ pôl. Khŭl kơ dră păng kon pơ lei tŏk bŏk hơ drin vă tơ plih kơ mâu tơ ring jĭ, jăh tang găn đĭ jĭ hơ buh, hơ nhăk tơ drong arih sa  hmă hơ lơ̆k dơ̆ng.

Thuem: Tơ blơ̆