VOV4.Bahnar - Đơ̆ng tơ drong hưch hanh kơ dih, 1 kơ sô̆ druh dăm bơ ngai kon kông tơ̆ xăh Ea Mnang, apŭng Cư mgar, dêh char Dak Lak pơm tơ plih jing trong iung jang xa. Dôm tơ drong đei yoa blŭng a đơ̆ng tơ drong iung jang xa hlôi hơ nhăk dơ̆ng tơ drong đei yoa kơ jăp ăn kơ dih kâu păng đei lơ bôl boăl druh dăm nai ‘mĕh hŏk jang kiơ̆, vang tơ gop pơm tơ iung tơ drong iung jang xa tơ̆ tơ ring.

Mă đơ̆ng tơ ƀâp lơ mơ mat tat yoa đơ̆ng jĭ Covid-19 oei tôch hơ mơt mă lei lơ̆m sơ năm ‘nâu ‘nhŏng Đàm Đình Hiếu, 29 sơ năm, bơ ngai Tày, tơ̆ plei Bình Hòa, xăh Ea Mnang oei tĕch đei lơ tơ mam đing klel pơm đơ̆ng ‘lao, pơ le kơtơp, pơ o ăn tĕh đak Nhật Bản păng Ấn Độ. Đàm Đình Hiếu ăn tơ băt, yoa ƀơm kơ nê̆ đơ̆ng jĭ, tơ mam vă pơm păng tơ drong chơ chuĕn tôch mơ mat kơ na sư lăp pơ̆n pơm hla ar pơ kăp pơm tĕch tơ̆ tĕh đak đe tŏ sĕt đĕch, mă lơ tơ mam ‘nhŏng pơm ‘nŏh tĕch lơ̆m tĕh đak ngăl.

Hăm Đàm Đình Hiếu, iung jang xa hăm trong pơm klel âu jĭ tơ drong ưh kơ ê. Blŭng a yoa hưch hanh tơ drong hlôm klel păng ‘mĕh kơ dih kâu pơm đei klel ‘lơ̆ng hơ iă hlŏh, ‘nhŏng Hiếu hŏk trong pơm klel lơ̆m internet. Đơ̆ng rŏng lơ ‘măng pơm ưh đei, pơm hư kơ băt dôm yơ ‘long, ‘nhŏng pơm đei klel tôch lăp đon păng phĭn tơ ƀôh lơ̆m grŭp boăl sư, grŭp ƀơm truh tơ̆ klel lơ̆m mang tơ pôl. Iŏk đei lơ nơ̆r pơ ư đơ̆ng dôm bơ ngai tơ rĕk truh, sư ƀôh gơ̆h pơm tĕch klel đơ̆ng pơ le kơtơp đơ̆ng sơ năm 2015, đơ̆ng nŏh ‘nhŏng tơ lĕch jên răt kơ măy pơm klel đang kơ ‘nŏh chă tĕch.

Hrei ‘nâu, ‘ngoăih kơ bơ ngai răt lơ, apinh răt đơ̆ng 1.000 – 2.000 đing klel 1 khei, ‘nhŏng oei tơ gĕch iŏk mang tơ pôl chă tĕch le hai, hăm kơ jă đơ̆ng 2, 3 hrĕng truh 2, 3 triu pôm klel. Gơ nơm thoi nŏh đei iŏk yoa sơ đơ̆ng 1 khei đơ̆ng 15 - 20 triu hlj. Hăm kơ sô̆ bơ ngai apinh răt roi đunh roi lơ, ‘nhŏng Hiếu oei tơ chĕng hơ len pơih xă tơ drong jang xa, răt dơ̆ng kơ măy pơm, chă thim bơngai jang păng pơih lăm pơ tho hlôm klel vă hơ nơ̆ng druh kiơ̆ tơ drong ‘mĕh vă đơ̆ng kơ dih. ‘Nhŏng Đàm Đình Hiếu pơ ma:

 Truh dang ei inh pơm đei 5 -6 sơ năm bơih, mă 1 ‘nŏh tĕch ăn dôm shop tih păng đei Zalo, Facebook, Fanpage vă tĕch tơ mam thoi nŏh rim khei tĕch tơ mam kŭm tôch sơ đơ̆ng. Truh âu kơnh ŏh vă pơih anih tĕch tơ mam hlôm rĕh kơ hơ drĕch kon kông păng tĕch đing klel, jang hơ doi hăm bôl boăl vă pơ tho hlôm klel ăn đe hơ iŏh.   

Đàm Đình Hiếu iung jang xa đei ƀôh đơ̆ng hưch hanh kơ klel pơle kơ tơp

Kŭm iung jang xa kiơ̆ jơ hngâm đon ‘mĕh vă kơ dih, ‘nhŏng Hoàng Văn Nam, 33 sơ năm, bơ ngai Nùng tơ̆ thôn 6 (xăh Ea M'nang) rơih trong rong iĕr bri vă chă jên. Hoàng Văn Nam tơ roi, blŭng a lăp rong pơ rŏ ngôi đĕch, đang kơ ‘nŏh roi tơ ƀôh ăn bôl boăl, phĭn tơ ƀôh lơ̆m mang tơ pôl hăm bôl boăl. Đơ̆ng rŏng âu lơ bôl boăl truh apinh răt iĕr yŏng păng athei pơ tho tơ ƀôh trong rong ăn đe sư kơ na ‘nhŏng kŭm chă tơ roi ăn. Đơ̆ng blŭng sơ năm sơ̆, ‘nhŏng pơ tơm chă hơ len năng rim tơ drong păng rong yŏng, đơ̆ng nŏh iĕr bri yŏng jing đei truh 100 tŏ. Rong yŏng hai, tĕch hai, lơ̆m sơ năm ‘nâu ‘nhŏng tĕch đei hlŏh 30 kăp iĕr yŏng. Kiơ̆ ‘nhŏng Nam, iĕr yŏng oei rong âu đei rong đơ̆ng iĕr bri păng ăn iĕr bri kiơ̆ iĕr hnam hai kơ na iĕr kon oei nhen thoi iĕr bri mơ̆n, rong tĕch kŭm đei lơ bơ ngai ‘mĕh răt, 1 kăp iĕr yŏng đơ̆ng rŏng 8 khei rong tĕch đơ̆ng 800 rơ bâu truh 1,2 triu hlj. Mă đơ̆ng rong iĕr jĭ tơ drong jang pơ gia đĕch, tơ gĕch iŏk mir xă hlŏh 1ha păng tơ mam xa jrăh jrai đơ̆ng rei pơ tăm mă lei pơ têng găh mŭk drăm, rong iĕr bri âu đei lơ hlŏh kơ rong kon tơ rong nai dơ̆ng. Yoa thoi nŏh, ‘nhŏng oei vă chă trong pơih xă tơ drong rong iĕr bri kiơ̆ trong rong pơm yŏng:

Rong iĕr âu ‘noh ĭnh ƀôh sư tôch kơ pran ‘lơ̆ng, hơ dai hăm ‘noh sư sa tôch kơ tŏ sĕt, tơ mam sa găh lơ ‘noh hơ ƀo păng ƀa. Nhen ier kon ‘noh inh ăn sa thim dôm kơ loăi vitamin ăn kơ sư pran jăng vă yak hloh khei ‘năr sơ oei iĕ păng ưh kơ jăng. Tơ̆ hơ năp kơnh gô hơ nơ̆ng rong lơ dơ̆ng, pơm hơ drong vă tĕch yŏng dăh mă tơ mam pơm lăp hăm anih tĕch mơ dro.

Anhŏng Hoàng Văn Nam vei lăng ier bri lơ̆m khei ‘năr cheh

Kiơ̆ kơ ‘nhŏng Nguyễn Văn Mẫn, bí thư đoàn xăh Ea Mnang, apŭng Cư Mgar, dôm sơ năm tơ jê̆ âu tơ̆ xăh đei ƀôh lơ tơ drong jang druh dăm hơ tŏk tơ iung mŭk drăm, iung jang xa. Lơ̆m noh lơ tơ drong jang đơ̆ng druh dăm bơ ngai kon kông hơ tŏk tơ iung đơ̆ng ‘meh vă tôch ‘nao. Hơ drô̆ tơ drong jang pơm klel pơ le kơ tơp păng vei rong iĕr bri ‘noh jĭ 2 tơ drong jang mă khan ‘nao ră mă lei yak blŭng hơ nhăk ăn iŏk yua mŭk drăm ‘lơ̆ng, hơ nhăk iŏk yua sơ đơ̆ng ăn druh dăm kơ na đei anih jang đoan xăh bơ ngơ̆t truh, pơ trŭt jang. Kŭm hăm rim tơ drong jang vang yak hơ dai, tơ gŭm pơm tơ drong hiôk găh tơ drong hanh chĭnh, anih jang đoan xăh kŭm tơ gŭm pơ tho tơ ƀôh păng jang hơ dai vă druh dăm đei gơh tŏk iŏk jên, năm lăng hŏk pơ hrăm dôm tơ drong jang vă đơ̆ng noh đei dơ̆ng trong vă jang iung jang xa ăn kơ dih kâu.

   Vă jê̆ truh kơnh anih jang Đoan xăh gô jang tơ gŭm pơm rim hla ar hô sơ vă apĭnh tŏk iŏk jên đơ̆ng jên mong iung jang xa hăm Anih jang Đoan apŭng păng pơ gơ̆r ăn đoàn viên druh dăm lơ̆m tơ ring năm chă lăng rim tơ drong jang âu vă hŏk pơ hrăm dơ̆ng tơ drong jang lăp hăm rim tơ drong jang đơ̆ng đoàn viên druh dăm.

H’Xíu H’Mốc: Chih

Thuem: Tơ blơ̆