VOV4.Bahnar - Xăh Đưng K’Nớ, apŭng Lạc Dương (Lâm Đồng) đei vă jê̆ 95% kon pơ lei ‘nŏh jĭ kon pơ lei bơ ngai K’ho. Gơ nơm tơ iung tơ drong tơ guăt 1 ƀơ̆r đon, mĭnh jơ hngâm vang tơ iung pơ jing tơ ring tơ rang ‘nao, pơ ngot rơ vĕt, tơ nuh hin đei găn ƀiơ̆, tơ drong arih xa kơ kon pơ lei roi tŏk ‘lơ̆ng. Sơ năm âu ki, mă đơ̆ng tơ ƀâp lơ mơ mat tat yoa đơ̆ng jĭ Covid-19, mă lei Đưng K’Nớ oei hơ nơ̆ng jang đei lơ tơ drong hơ găt atŏk tơ iung mŭk drăm tơ pôl, lơ̆m nŏh tơ drong jơ nei gĭt kăl hlŏh jĭ jang kĕh đĭ đăng 19 tơ drong hơ găt găh pơ jing tơ ring tơ rang ‘nao.

Năm tơ̆ Đưng K’Nớ, apŭng Lạc Dương (Lâm Đồng) lơ̆m dôm năr blŭng sơ năm ‘nao, nhôn hơ̆k jơ hngâm ƀôh tôch hơ iă yoa tơ drong tơ plih ‘nao tôch hrĕnh đơ̆ng 1 xăh hơ tăih yăih oei hlom lơ̆m bri kông tơ̆ pơ gar ‘long teh đak Bidup-Núi Bà. Dôm tŏ hnam tơ̆r so sơ̆ dang ei đei tơ plih jing hnam man ‘nao ƀrơih kơ jăp ‘lơ̆ng; lơ trong tih trôk rơ bơ̆r adrol sơ̆ dang ei đei man jing trong bê tông ngăl; unh điên, hnam trưng, hnam pơ gang păng lơ anih pơ yoa ăn tơ drong arih xa kơ kon pơ lei đei tơ lĕch jên man kơ jăp ‘lơ̆ng, ăn ƀôh tơ drong arih xa kơ kon pơ lei tơ̆ âu oei tơ plih ‘lơ̆ng, roi phĭ tơ nŏ.

Tơ hlâu ti tơ̆ trong bê tông xă gơ gơng mât truh tơ̆ pơ lei pơ la, ƀok Bon Niêng Ha Đê, tơ̆ plei K’Nớ 2, xăh Đưng K’Nớ chơt hơ iă ăn tơ băt, kŭm gơ nơm đơ̆ng trong yak hiôk hian kơ na tơ mam đơ̆ng choh jang xa đei chă chơ chuĕn kŭm tôch ƀônh, kon pơ lei tĕch tơ mam da ƀiơ̆ ep kơ jă nhen adrol sơ̆. Hơ drô̆ sơ năm ‘nâu, chĕh phe đei kơ jă, tĕch ƀônh hlot kơ na rim hnam kŭm chơt hơ iă, răt đei lơ tơ mam yoa kăl pơ ‘nhŏ ăn tơ drong jang xa păng arih xa rim năr:   “Đơ̆ng bơ̆ jang tơ drong pơ jing tơ ring tơ rang ‘nao, pơ lei pơ la đei lơ tơ drong tơ plih ‘lơ̆ng, mŭk drăm unh hnam roi tŏk, hnam oei đei man kơ jăp, trong yak hiôk hian. Đĭ đăng gơ nơm kơ Đảng păng tĕh đak tơ rĕk truh, tơ lĕch jên jang kơ na um ai pơ lei pơ la đei tơ plih ‘lơ̆ng, tơ plih gơ nơm đơ̆ng tơ drong jang pơ jing tơ ring tơ rang ‘nao. Lơ unh hnam tơ nuh jang tŏk jing đei ƀôh, răt đei gre, kơ măy pơ yoa ăn tơ drong jang xa, chơ chuĕn chĕh phe. Kon pơ lei tơ̆ âu roi băt trong jang xa, băt trong vei rong ‘long pơ tăm păng tơ drong arih xa tŏk ‘lơ̆ng ƀiơ̆ kơ adrol sơ̆ tơ pă.”

‘Ngoăih kơ 980 ha chĕh phe, xăh Đưng K’Nớ pơ tơm đei ƀôh 1,2 trong jang pơ tăm ‘nhot, pơ kao hăm kơ măy kơ mŏk, pơ tăm ‘long xa plei păng rong kon tơ rong, nhŭng iĕr. Hlŏh 80% kơ sô̆ unh hnam đei xa yoa gơ nơm đơ̆ng vei lăng bri ‘long, akŏm đĭ đăng truh 11.770 ha. Ƀât mă lơ tơ drong iŏk yoa tơ jur yoa đơ̆ng jĭ Covid-19 ‘nŏh Đưng K’Nớ iŏk yoa jô̆ păh lăp kơ kon pơ lei oei tŏk đơ̆ng 41 truh 43 triu hlak jên 1 sơ năm. Kơ sô̆ unh hnam tơ nuh kŭm jur lơ, dang ei pă 3,2% đĕch.

Kiơ̆ kră pơ lei Rơ Ông Ha Bang, tơ̆ plei K’Nớ 1, tơ drong ‘nâu gơ nơm đơ̆ng đon adrin đĭ jơ hngâm đơ̆ng đe kăn ƀô̆ păng kon pơ lei, lơ̆m nŏh tơ drong tơ rĕk đơ̆ng Đảng păng tĕh đak tơ lĕch jên jang ăn rim tơ drong ‘nŏh jĭ tơ drong tôch gĭt kăl tơ gŭm ăn kon pơ lei tơ plih ming đon tơ chĕng găh trong jang xa păng arih xa, jang tŏk pơ jing tơ drong arih xa phĭ tơ nŏ.

Kră pơ lei Rơ Ông Ha Bang, pơ ma: “Adrol sơ̆, lơ unh hnam tơ nuh tơ pă, dang ei jur lơ bơih, tơ drong arih xa mŭk drăm kơ kon pơ lei roi đunh roi tŏk. Trong anih jang, hnam pơ gang, unh điên đei tĕh đak pơm hơ met ‘lơ̆ng ngăl, um ai tơ ring tơ rang tơ plih ‘lơ̆ng hơ iă. Kon pơ lei tôch hơ iă, lăp đon, tơ gŭm păng vang jang tôch tơ năp lơ̆m tơ drong pơ jing tơ ring tơ rang ‘nao, mă loi trong tôch ‘lơ̆ng, tơ mam đơ̆ng kon pơ lei jang đei ưh pă đei ep kơ jă bơih, kon pơ lei tôch hơ iă.

Đơ̆ng 1 xăh tơ nuh hin, hơ tăih hlŏh kơ apŭng Lạc Dương, đei lơ kon pơ lei ‘nŏh jĭ bơ ngai K’ho. Đơ̆ng rŏng 8 sơ năm pơ jing tơ ring tơ rang ‘nao, truh hơ tuch sơ năm 2021, Đưng K’Nớ jang kĕh đĭ đăng 19 tơ drong hơ găt. Ƀok Thân Văn Hữu, Bí thư Đảng, pơm hloi Kơ dră vei lăng kon pơ lei xăh Đưng K’Nớ ăn tơ băt, vă pơm ‘lơ̆ng ăn mŭk drăm, tơ pôl jang tŏk kơ jăp ‘lơ̆ng, tơ drong arih xa kơ kon pơ lei roi sơ đơ̆ng khŏm bơ̆ jang pơ jing tơ ring ‘nao ‘lơ̆ng hơ iă, tơ ring oei akŏm jơ hngâm tơ lĕch lơ trong jang tơ gŭm ăn kon pơ lei pơm hơ tŏk iŏk yoa lơ̆m 1 pơ gar choh jang xa. Kŭm hăm ‘nŏh, tơ drong jang atŏk tơ iung dôm tơ drong jang xa tơ klep hăm chă tơ mang lăng lơ̆m tơ pôl kŭm đei tơ chĕng truh ‘năi:

“Nhôn oei asong ăn kon pơ lei chih măt vă tơ gŭm ăn kon pơ lei pơ tăm ‘long xa plei păng hơ nơ̆ng pơ tăm hơ met ming ‘long chĕh phe vă pơm ‘lơ̆ng ăn kon pơ lei đei iŏk yoa sơ đơ̆ng. Nhôn oei jang hơ doi hăm Hnam trưng Đăi hŏk Đà Lạt vă tơ lĕch trong choh jang xa, tơ gŭm ki thuơ̆t, pơ tho ki thuơ̆t ăn kon pơ lei choh jang xa, rong kon tơ rong. Nhôn oei jang hơ doi hăm Pơ gar ‘long tĕh đak vă atŏk tơ iung chă tơ mang lăng tơ pôl, pơ jing trong ăn kon pơ lei tĕch đei dôm tơ mam so đơ̆ng tơ ring nhen khăn tanh, tơ drô ge, atŏk tơ iung chă tơ mang lăng, pơm hơ tŏk tơ drong arih xa ăn kon pơ lei ning mônh kơnh”.

Hăm dôm tơ drong jơ nei hlôi iŏk đei kŭm nhen dôm trong vă tơ lĕch jang nhen nơ̆r ƀok Thân Văn Hữu, Bí thư Đảng, Kơ dră vei lăng kon pơ lei xăh xăh Đưng K’Nớ ‘nao pơ ma, ưh jor tơ drong arih xa kơ kon pơ lei bơ ngai K’ho tơ̆ âu roi tŏk hlŏh dơ̆ng iŏk đơ̆ng pơ yan Puih mak âu.

Quang Sáng: Chih

Dơ̆ng: Tơ blơ̆