VOV4..Bahnar - Đơ̆ng rŏng 1 sơ năm jang ưh kơ jing, apŭng Đắk R’lấp hơ nơ̆ng hơ drin jăl khei mă 2 sơ năm ‘nâu gô jing apŭng tơ ring tơ rang ‘nao mă blŭng kơ dêh chăr Dak Lak. Kŭm hăm tơ drong hơ drin đơ̆ng pơ đĭ khŭl jang chĭnh trĭ, jơ hngơ̆m đon vang jang pơ jing tơ ring tơ rang ‘nao đơ̆ng kon pơ lei tơ̆ apŭng Đắk R’lấp tôch kơ kăl chih iŏk. Lơ̆m noh, đei tơ drong tơ gop ‘lơ̆ng đơ̆ng bơ ngai ời M’Nông tơ̆ xăh Quảng Tín păng xăh Đắk Ru.

Dôm năr hơ tuch sơ năm 2021, tơ̆ trong năm lơ xăh đơ̆ng Trong gre tih 14 năm klĕch xăh Đắk Ru truh tơ̆ xăh tơ ring hơ tăih hơ tŏ Đắk Ngo, apŭng Đắk R’lấp (dêh char Dak Nông) mơ sưt mơ sat gre kŏng nŏng cho tơ mam đơ̆ng choh jang sa. Dôm pơ gar cheh phe 2 păh trong hlôi phĕ đang. Dôm pơ gar tiu oei hơ kriu kơ plei, hơ met ăn lơ̆m pơ yan phĕ. Yă Thị Djrong – Phŏ Kơ dră Khŭl vei lăng drŏ kăn xăh  Dak Ru, apŭng Dak R’lấp tơ băt, trong năm lơ xăh âu yua đơ̆ng khŭl ƀô̆ đô̆i kơ dêh char Dak Nông tơ mơ̆t jên jang lơ̆m kơ plăh pơ jing tơ ring tơ rang ‘nao. Kŭm gơ nang đơ̆ng trong âu, tơ drong choh jang sa đơ̆ng kon pơ lei lơ̆m tơ ring kŭm hiôk ƀiơ̆, tơ gop tơ gŭm xăh Dak Ru jang đang hơ drol pơ jing tơ ring tơ rang ‘nao; dang ei tŏk bŏk hơ drin hơ tŏk ‘lơ̆ng, 1,2 pơ lei pơ jing pơ lei ‘lơ̆ng hơ iă.

            “Gơ nang đơ̆ng đei Đảng, Teh đak bơ ngơ̆t truh, rim pơ lei păng xăh tŏk bŏk pơ jing tơ ring tơ rang ‘nao ‘lơ̆ng hơ iă. Đĭ đăng kon pơ lei 1 jơ hngơ̆m hăm băl mă đơ̆ng mơ mat tat, bơ ngai M’nông nhôn kŭm hơ drin tôch kơ ‘lơ̆ng. Blŭng a tam mă băt pơ tăm ‘long cheh phe, iŏk đơ̆ng đei khŭl pơ trŭt choh jang sa, khŭl kon pơ lei jang chŭn mir pơ hrăm pơ tho khoa hŏk ki thuơ̆t pơ tăm ‘long cheh phe, tiu. Dang ei cheh phe păng rim kơ loăi ‘long adoi đei pơ tho vei lăng ‘long pơ tăm. Sơ năm ‘nâu cheh phe tơ̆ âu kŭm iŏk đei lơ, kơ jă sơ đơ̆ng, bơ ngai M’nông nhôn roi ‘năr roi jang tŏk.”

Tơ̆ plei Bu Bir, xăh Quảng Tín, apŭng Dak R’lấp, Dak Nông, ŭnh hnam Điểu Khuyên kŭm đĭ sơ̆k đang phe che. Đĭ đăng hlôi đei tăh lơ̆m kơ ƀao vă ming hơ met pơ ‘lơ̆ng lơ̆m hơ nih mong răk hơ drol kơ sơng sơ năm ‘nao 2022. Điểu Khuyên tơ roi, cheh phe sơ năm 2021 âu ki đei plei lơ ‘noh kơ jă măk ƀiơ̆ dơ̆ng. Mă loi ‘noh gơ nang đơ̆ng pơm đang hrôih trong năm tơ̆ hơ nih choh jang sa kơ na tơ drong chơ chuĕn tơ mam bơ̆n phŏng kŭm nhen chơ tơ mam vih tơ̆ hnam tôch kơ hiôk.

“Kon pơ lei apĭnh bơ nê kơ Đảng, khŭl kơ dră pơm tơ drong hiôk ming man trong vă kơ chă năm vih vơ̆t lơ̆m pơ lei păng chơ phŏng, tơ mam đơ̆ng choh jang sa đơ̆ng kon pơ lei đơ̆ng mir roh brŏk tơ̆ hnam hiôk. Kŭm hăm Tơ drong jang 135, tơ drong jang tơ ring tơ rang ‘nao, pơm 400 mét trong păng kon pơ lei tơ gop dơ̆ng pơm pơ đĭ trong lơ̆m pơ lei, dang 20 ŭnh hnam vang jang hơ dai teh đak. Trong âu kŭm đei tơ drong plang jơ hngơ̆m vang tơ gop đơ̆ng rim ŭnh hnam kon pơ lei plang song teh, koh ‘long điêu, ‘long cheh phe vă pơm trong ‘nao vă chă năm jang hiôk, kon pơ lei kŭm băt tơ drong đei yua đei trong nơ năm vă hơ tŏk tơ iung mŭk drăm”.

Trong mơ̆t lơ̆m hơ nih chih jang sa tơ̆ xăh Quảng Tín, apŭng Dak R’lấp

Dơ̆ng lăng tơ drong tơ plih đơ̆ng pơ lei pơ la, ƀok Điểu Đum oei tơ̆ plei Bu Bir, xăh Quảng Tín, apŭng Dak R’lấp tơ roi: ưh khan lăp trong nơ năm hiôk, mă trong jang sa kŭm păi hloh; vei sơ đơ̆ng tơ drong arih sa tơ pôl kŭm ‘lơ̆ng. Ƀok Điểu Đum vang tơ roi:

 “Hơ drol sơ̆ mơ mat tat dêh, lăp băt jang ƀa mir jang chŭn plei tŏ sĕt. Dang ei đĭ tơ plih tôch kơ lơ, băt pơ tăm cheh phe, pơ tăm điêu. Teh đak tơ mơ̆t jên jang tơ gŭm, kơ na đĭ đei trong nơ năm truh tơ̆ hơ nih hăm trong man đĭ bơ̆ih. Bơ nê kơ teh đak lơ dêh. Mưh jĭ pơ lŏ tŏ hơ kâu, teh đak kŭm tơ gŭm; đei hnam pơ gang jê̆ pơ lei. Mưh mơ mat tat teh đak kŭm tơ gŭm, nhen phe, ƀoh, ƀôt ngot păng đak măm, tơ gŭm kon pơ lei mơ mat tat lơ̆m pơ lei đei tôm tĕch.”

Kiơ̆ tơ roi tơ băt đơ̆ng Anih vei lăng kon pơ lei xăh Quảng Tín, apŭng Đắk R’Lấp, trong nơ năm tơ ring tơ rang tơ̆ tơ ring hlôi pơm keh đang ‘lơ̆ng, hăm hloh 70km trong man. Tơ drong hơ tŏk tơ iung mŭk drăm lơ̆m dôm sơ năm âu ki adoi hloh 13%. 5 sơ năm hơ drol, iŏk yua jô̆ păh lăp kơ̆l bơ ngai lăp 15 triệu hlak jên, mă lei sơ năm ‘nâu đei dang 45 triệu hlak jên, hloh 3 ‘măng pơ têng hăm khei ‘năr pơ tơm blŭng pơ jing tơ ring tơ rang ‘nao. Ƀok Điểu Minh – Kơ dră Anih jang Mặt trận Tổ quốc Việt Nam xăh Quảng Tín, apŭng Dak R’lấp ƀlŏk dơ̆ng: Xăh pơ tơm tơ lĕch jang Tơ drong jang pơ jing tơ ring tơ rang ‘nao đơ̆ng sơ năm 2012, truh sơ năm 2018 ‘noh iŏk đei ‘lơ̆ng. Dôm sơ năm âu ki, xăh ling lang hơ drin vă pơ vei dôm tơ drong hơ găt hlôi jang đei păng hơ drin vă hơ tŏk ‘lơ̆ng rŏ.

“Kon pơ lei kŭm hăm Đảng, teh đak jang hơ dai hăm băl vă pơ jing tơ ring tơ rang ‘nao ‘lơ̆ng rŏ. Mă loi ‘noh ĭnh jĭ kang ƀô̆ Mặt trận jang hơ dai hăm kon pơ lei hơ nơ̆ng tơ roi tơ băt, mă mônh ‘noh găh jang mŭk drăm păng vei lăng pơ gar kơ su, cheh phe ƀlep trong; săy phŏng vei lăng ‘long pơ tăm, vei rong kơ pô, rơ mo. Pơ tih gia nhen cham char hăm Quảng Tín hrei ‘nâu ‘noh athei ‘yâu - rơ goh - ‘lơ̆ng, nhôn tŏk bŏk tơ roi tơ băt ăn kon pơ lei sir hơ lŭng vă hŭt râm rĕk vă trong nơ năm rơ goh ‘lơ̆ng.”

Khŭl ƀô̆ đô̆i vang tơ gŭm pơm trong tơ ring tơ rang ‘nao tơ̆ xăh Đăk Ru

Apŭng Đắk R'lấp tŏk bŏk hơ drin jing apŭng tơ ring tơ rang ‘nao mă blŭng kơ dêh char Dak Nông lơ̆m sơ năm 2022. Lơ̆m apŭng hlôi đei 8/10 xăh đei ăn tơ ring tơ rang ‘nao, uơ oei dơ̆ng 2 xăh Đắk Sin păng Hưng Bình kŭm hlôi pơm hla ar hồ sơ athei dêh char hơ len lăng. Găh tơ̆ apŭng oei đei Tơ drong hơ găt kơ sô̆ 5 găh joh ayŏ, pơ gang, pơ tho pơ hrăm păng tơ drong hơ găt kơ sô̆ 7 găh cham char. Lăng kiơ̆ lơ̆m tơ drong yan âu păng tơ drong jang kiơ̆ dang ei, tơ chĕng hơ drol lơ̆m jăl khei mă II sơ năm 2022, apŭng Đắk R’lấp gô jang đang dôm tơ drong kăl vă pơm hla ar hô sơ athei Trung ương xet hơ len drơ̆ng ăn apŭng tơ ring tơ rang ‘nao mă blŭng kơ dêh char Dak Nông.

Quốc Học – Y Sưng: Chih

Thuem: Tơ blơ̆