Anih pơrang âu đei ah lăm lá 2, hnam trưng mâm non Hoa Lan, tơ̆ thôn Chiềng, xah Ya Lốp, apŭng Ea Súp. Bơngai ƀơm pơrang jĭ âu noh pơlŏ, jĭ dăng hơlŏng, ưh ‘meh sŏng xa, pơtŏk ƀơ̆r păng jơ̆ng ti, kŭl tăng, kơtaih. Dôm hŏk tro ƀơm jĭ noh hnam trưng athei pơdơh hŏk păng pơkăl mĕ ƀă ‘nhăk hơ-ioh năm tơ̆ khăm tơ̆ hnam pơgang.

Đơ̆ng rŏng băt đei hơbuh pơrang, Anih jang pơgang hơmet jĭ jăn apŭng Ea Sup hlôi pơgơ̆r Anih jang pơgang hơmet jĭ jăn Ya Lốp jang atŭm hăm hnam trưng vă hơlen lăng pơrang jĭ đei đơ̆ng tơring yơ; pruih pơgang hoă chơ̆t vă pơlôch sơmach păng pơ-nguaih lăm hŏk, tơmam mă hơ-ioh pơsuh pơchơt, Kiơ̆ kơ ƀok Dương Văn Hải, Phŏ khoa Hơlen pơrang jĭ jăn kơ Anih jang pơgang hơmet jĭ jăn apŭng Ea Súp, truh kơsơ̆ năr  2/4, ‘nguaih kơ 8 ‘nu ƀơm jĭ tơ̆ hnam trưng mâm non Hoa Lan, lơ̆m tơring Ya Lôp đei dơ̆ng 1 ‘nu hơ-ioh nhen lĕ ƀơm pơrang jĭ jơ̆ng ti ƀơ̆r. Tơdrong jang pơkă tơring, tang găn jĭ păng pơtho tang găn jĭ tŏk bŏk đei Anih jang pơgang hơmet Jĭ jăn tơlĕch jang.