Lăp lơ̆m 2 khei blŭng sơnăm 2024, Krông Pách hlôi đei 3 ‘nu lôch yua đơ̆ng jĭ vơnh, jĭ apŭng đei kơ sô̆ bơngai jĭ vơnh lơ hloh dêh char Dak Lak. Ƀok Y Doãn Niê, phŏ Kơdră Anih vei lăng kon pơlei apŭng Krông Pách akhan, tơdrong jang tang găn jĭ vơnh đơ̆ng tơring tơƀơ̆p lơ mơmat tat yua đơ̆ng lơ ŭnh hnam rong kŏ meo ưh kơ jang hơdai hăm anih jang kơpal lơ̆m tơdrong jang tang găn jĭ:

“Kon pơlei rong kŏ meo lơ̆m apŭng găh lơ hơchăng kư̆ kă tơ̆ chŭn mir, kang ƀô̆ thú y lơ ‘măng truh ƀet mă lei ŭnh hnam ưh kơ kĕ rôp đei păng pơrơ̆ng vă ưh kơ ƀet bơ̆ng vắc xin.”

Tơ̆ pơlei tơm Buôn Ma Thuột dăh mă dôm hơnih tơ̆ yơ lơ̆m tơring Dak Lak đơ̆ng tơring tơrang truh thị trấn, pơlei tơm tă kơ tơƀơ̆p dôm kŏ chă năm kư̆ kă. Tơdrong ‘nâu hơmơt ưh kơ pŭn ai lơ hăm bơngai năm tơ̆ trong. Mŏ Trịnh Thị Hồng Hạnh, oei tơ̆ phường Tân Lợi, pơlei tơm Buôn Ma Thuột oei ƀlŏk hli đĕch yua kơ đĭ đei kŏ kăp bơih:

 “Đunh kơ âu 1 giĕng ĭnh năm jơ̆ng hoh năm tơ̆ kơchơ, oei năm ‘noh ưh kơ ê tơ̆ trong đei 1 pôm kŏ kơdâu lĕch. Ui dêh, kơplăh doh ĭnh tôch kơ hli păng ĭnh kơdâu hloi, mă lei ĭnh roi kơdâu, kŏ roi druh kiơ̆ păng grĕnh hloh dơ̆ng. Lăng ƀôh kŏ hơchăng kư̆ kă ‘noh jĭ tôch kơ hli.”

Jô̆ păh lăp rim sơnămn, Dak Lak đei dang 6.000 ‘nu đei kŏ, meo kăp athei năm hơmet tang găn. Hơdrô̆ đơ̆ng blŭng sơnăm truh dang ei, dêh char đei 4 ‘nu lôch yua đơ̆ng jĭ vơnh.

Ƀok Đỗ Xuân Dũng, Phŏ Kơdră Anih vei lăng găh Choh jang sa păng Hơtŏk tơiung Tơring tơrang dêh char Dak Lak tơbăt, tơdrong tơm đơ̆ng jĭ vơnh roi tŏk ‘noh jĭ yua đơ̆ng tam mă vei lăng đei kŏ, meo; kơsô̆ ƀet bơ̆ng vắc xin jĭ vơnh oei tŏ sĕt, lăp iŏk đei 37%. Tơdrong nai, tơdrong tơmơ̆t yua dôm trong phak pơm glăi tơdrong hơgăt găh vei lăng kŏ rong, ƀet bơ̆ng vắc xin jĭ vơnh ăn kŏ, meo tam mă kơtang:

“Đơ̆ng sơ̆ truh dang ei tam mă ƀôh anih jang kơdih hơ yơ phak tơdrong kŏ meo kăp. Luơ̆t ‘noh đei bơih mă lei bơ̆n tam mă tơmơ̆t yua. Hơdai hăm tơdrong tơroi tơbăt găh tơdrong jang tang găn jĭ vơnh ‘noh kăl kơ pơm kiơ̆ tơ păt trong phak pơm glăi. Dôm bơngai rong kŏ meo mă ưh kơ pơm kiơ̆ ƀlep tơdrong hơgăt đơ̆ng khôi luơ̆t păng pơm ăn jĭ kơtang ‘noh anih jang kơpal gơh tơchă iŏk hơnăp jang sek phak hăm tơ ‘ngla rong kiơ̆ tơdrong hơgăt.”

Kiơ̆ kơ ƀok Nguyễn Thiên Văn, Phŏ Kơdră Anih vei lăng kon pơlei dêh char Dak Lak, vă tang găn hơmơt kơ đei ƀôh jĭ vơnh kŭm nhen tơjur kơsô̆ bơngai lôch yua kơ jĭ vơnh, dôm anih jang kơpal păng khŭl kơdră tơring kăl athei akŏm rim kon jên vă bơ̆jang kiơ̆ tơpăt dôm trong tơlĕch jang tang găn jĭ vơnh mă dêh char hlôi tơlĕch ăn. Lơ̆m noh, athei hơtŏk loi dơ̆ng tơdrong jang vei lăng kŏ; hơtŏk ‘lơ̆ng kơsô̆ ƀet vắc xin bơ̆ng jĭ vơnh, hơdai hăm tŭn pran tơdrong jang tơroi tơbăt vă kon pơlei hlôh hơdăh găh tơdrong krê hơmơt đơ̆ng jĭ vơnh. Ƀok Nguyễn Thiên Văn akhan, đon hlôh vao păng vang jang đơ̆ng tơpôl ‘noh jĭ tơkhoă tơm ăn tơdrong jơnei lơ̆m tơdrong jang tang găn jĭ vơnh:

“Dôm tơring bơngơ̆t truh tơroi tơbăt krao hơvơn lơ̆m tơpôl kon pơlei oei vă hơtŏk ‘lơ̆ng đon hlôh vao đơ̆ng kon pơlei găh tơdrong krê hơmơt đơ̆ng jĭ vơnh hăm bơngai. Bơngai rong kŏ, meo pơm kiơ̆ tơdrong ƀet vắc xin bơ̆ng jĭ vơnh ăn kơ kŏ meo. Mưh đei kŏ meo kăp athei kơchăng truh tơ̆ anih jang pơgang khăm, hơmet tơtom.”

Dak Lak tŏk bŏk lơ̆m khei ‘năr pơyan tŏ dêh, jĭ tơdrong hiôk vă jĭ vơnh tơ̆ kŏ, meo đei ƀôh, pơm krê hơmơt truh hơkâu jăn kon bơngai. Yua thoi noh, kŭm hăm tơdrong mơ̆t jang kơtang đơ̆ng dom anih jang kơpal, kon pơlei kăl kơ hơtŏk ‘lơ̆ng đon hlôh vao lơ̆m tang găn jĭ vă tơ jur jĭ vơnh.