Tŏk bŏk vei lăng kon đei jĭ tơ̆ Khoa Khăm - Hơmet jĭ, Hnam pơgang hơmet jĭ vơnh dêh char Đắk Lắk, mŏ H’Loanh Niê oei tơ̆ xăh Cư Dliê M'nông, apŭng Cư Mgar cho biết, kon mŏ đei jĭ ‘ngok đơ̆ng ‘lơ̆p, gơnang đơ̆ng huch pơgang hơnơ̆ng kơna tơdrong jĭ đơ̆ng mon sơđơ̆ng. Mă lei, dôm năr tơjê̆ âu, tŏ hang pơdui đunh, pơm ăn tơdrong jĭ đơ̆ng mon jing dêh, hơnơ̆ng kơ gơ̆ hơkâu păng pơma kư̆ kă.

“Hmă hmă pơdơh kơ huch pơgang ‘noh jĭ. ‘Măng âu huch pơgang hơnơ̆ng oei jĭ, rŏ lăng yua tŏ hang. Mĭnh năr ƀôh sư gơ̆ hơkâu 1 ‘măng ‘noh ăn huch pơgang, mă ưh kơ dă ƀiơ̆, ƀôh 3-4 ‘măng ‘noh ƀĭch tơ̆ hnam pơgang.”

Ƀĭch hơdai lăm jĭ hăm kon mŏ H’loanh ‘noh bơngai jĭ Nguyễn Đức Lĩnh, rơneh sơnăm 2000, oei tơ̆ xăh Trung Hòa, apŭng Cư Kuin. Kiơ̆ kơ yă Nguyễn Thị Quỳ, mĕ bơngai jĭ, đunh kơ âu 5 sơnăm, yua đơ̆ng tơdrong jang kơhret, Lĩnh đei jĭ hơving păng hlôi đei hơmet. Dôm sơnăm âu ki, Lĩnh oei sa păng bơ̆jjang hmă. Đunh kơ âu 2 khei, Lĩnh ưh kơ huch pơgang kiơ̆ ƀlep athei đơ̆ng ƀak si, akŏm dơ̆ng ‘năr tŏ hang pơm ăn jĭ hơlơ̆k păng athei chơ tơ̆ hnam pơgang vă hơmet:

“‘Năr tŏ hang dêh hnang ‘noh sư gơ̆ 1,2 ‘măng, pơma kư̆ kă lơ ƀiơ̆. Ĭnh ăn mon năm ƀĭch tơ̆ hnam pơgang, ƀôh ƀak si ƀet pơgang ăn kơ mon ƀôh mon tep đei 1 sĕt, dang ei ‘noh tam mă dă ƀiơ̆ ‘mơ̆i, oei ưh kơ băt yă kiơ.”

Kiơ̆ chih jô̆ đơ̆ng Khoa Khăm - Hơmet jĭ, Hnam pơgang Hơmet jĭ vơnh dêh char Đắk Lắk, đơ̆ng khei 3 truh dang ei, jô̆ păh lăp rim năr, Khoa sơng iŏk khăm ăn kơ hloh 100 ‘nu bơngai jĭ, tŏk dang 20% pơting hăm hơdrol ki, kơsô̆ bơngai jĭ ƀĭch tơ̆ hnam pơgang kŭm tŏk. Ƀak si Nguyễn Thị Bé, Kơdră Khoa Khăm - Hơmet jĭ, Hnam pơgang Hơmet jĭ vơnh dêh char Đắk Lắk tơbăt, dôm bơngai jĭ đei jĭ lơ̆m khei ‘năr âu găh lơ ‘noh đei jĭ vơnh tơchĕng lơ, hơving....Lơ bơngai jĭ mơ̆t tơ̆ hnam pơgang ƀơ̆t tơchĕng dêh hnang, phă ngơ̆r, hil ôr... Tơdrong tơm pơm ăn tŏk kơsô̆ bơngai jĭ đei lơ, lơ̆m noh tŏ ‘mi kial tơplih, tŏ hang pơdui đunh ‘noh jĭ tơdrong tơm ƀơm ưh kơ ‘lơ̆ng truh jĭ vơnh, jơhngơ̆m pran kơ rim bơngai, mă loi ‘noh jĭ dôm bơngai jang tôch kơ gleh, bơngai kră đei tơdrong jĭ đơ̆ng hơdrol, drŏ kăn đơ̆ng rŏng kơ rơneh... Vă pơm dă ƀiơ̆ tơdrong jĭ hơlơ̆k dơ̆ng tơ̆ bơngai jĭ vơnh, lơ̆m khei ‘năr âu, bơngai lơ̆m ŭnh hnam kăl kơ hơnơ̆ng bơngơ̆t truh bơngai jĭ. Mưh ƀôh dôm tơdrong jĭ nhen sŏng sa ưh kơ lŭ, ưh kơ gơh tep, ưh kơ hiôk bơngai lơ̆m ŭnh hnam kăl kơ ba bơngai jĭ truh tơ̆ hnam pơgang hơmet hrôih vă veh ver lê̆ jĭ jing dêh gô pơm ăn hơmơt kơ krê hơmơt. Ƀak si Nguyễn Thị Bé pơtho tơtă:

“Tơ̆ hơnăp tơdrong tŏ hang thoi noh ‘noh athei dôm bơngai jĭ kăl kơ huch pơgang tôm, hơnơ̆ng ƀlep pơtho đơ̆ng ƀak si. Lơ̆m khei ‘năr âu nhă đak mă lơ vă tơlĕch hŭt pơgang oei lơ̆m pham. Hăm dôm bơngai jĭ gơh năm jang ‘noh veh ver kơ ‘năr tŏ hang dêh hnang, ‘nĕ kơ ngôi kơtă hăm hơyuh tŏ”.