Đei tơdrong pơjao jang đơ̆ng Anih tơm vei lăng Kŏng an, pơgê 20/9, Đại tá Vũ Hồng Quang, Kơdră vei lăng Kŏng an dêh char Cao Bằng hlôi pơjao kơsô̆ jên 2 ti hlak jên iŏk đơ̆ng Anih mong jên Tơdrong ‘mêm mơnat bôl buăl Kŏng an kon pơlei, tơgŭm kon pơlei đei hiong răm yua đơ̆ng ‘mi kial hơbŭt kơsô̆ 3 pơrăm lơ̆m dêh char.

‘Nâu jĭ dôm tơdrong ‘mêm mơnat đơ̆ng kang ƀô̆, khŭl lĭnh lơ̆m đĭ đăng khŭl lĭnh kŏng an gơih truh kon pơlei tơring ‘mi kial pơrăm, vă tơgop pơlung kon pơlei dă ƀiơ̆ kơ mơmat tat, jăh sơđơ̆ng tơdrong hơrih sa. Tang măt Anih tơm vei lăng Kŏng an, Đại tá Vũ Hồng Quang ‘meh vă hăm hơnăp jang atŭm, Anih jang Mặt trận Tổ quốc Việt Nam dêh char Cao Bằng gô klăih song jên tơgŭm truh ƀlep bơngai, vei sơđơ̆ng tơpăt, rơđăh. Truh dang ei, Anih jang Mặt trận Tổ quốc dêh char Cao Bằng hlôi sơng iŏk lơ kon jên, tơmam tơgŭm lơ̆m păng ‘ngoăih teh đak hloh 134 ti hlak jên, hloh 115 tấn phe păng dang 300 tấn tơmam.