Kơsơ̆ năr 20/9, Kơdră Anih jang Trung ương Măt trâ̆n tôh kuôk Việt Nam Đỗ Văn Chiến hlôi sơng iŏk jên tơgŭm đơ̆ng Khul jang kơ Anih tơm jang tơbôl, rim anih jang tang măt ăn anih jang tơbôl păng anih jang mŭk drăm lơ̆m păng ‘nguaih kơ teh đak truh pơjao vă tơgŭm kon pơlei ƀơm ‘mi kial kơsô̆ 3 pơrăm. Thoi noh, jô̆ truh  5 jơ kơsơ̆ năr 20/9, Jơnŭm jang hơvơn tơgop tơgŭm Trung ương hlôi sơng iŏk kơsô̆ jên noh 1.628 tih hlj.

Pơma ah Lêh sơng iŏk, Kơdră Anih jang Trung ương Măt trâ̆n tôh kuôk Việt Nam Đỗ Văn Chiến ƀrơ̆k jơhngơ̆m ah sơng jên tơgŭm đơ̆ng dôm anih jang mŭk drăm, rim jơnŭm jang păng tơ-‘ngla bơngai jang tơgŭm kon pơlei ƀơm ‘mi kial kơsô̆ 3 pơrăm. Pơtruh nơ̆r hmach kăp gĭt hăm Anih jang tang măt ăn teh đak Trung Quốc tơ̆ Việt Nam, Anih jang tang măt ăn teh đak Thái Lan tơ̆ Việt Nam, rim anih jang mŭk drăm kơ Jơnŭm bơngai Việt Nam tơ̆ Thái Lan, Jơnŭm bơngai Việt Nam tơ̆ Ucraina păng kon pơlei bơ̆n tơ̆ teh đak đe, ƀok Đỗ Văn Chiến sơkơ̆t hơdah, iŏk yua kơsô̆ jên tơgŭm pơtruh kơtă ăn tơring ƀơm ‘mi kial yagi pơrăm; iŏk yua trŏ tơdrong, đei jơnei tơnăp, hơdah, chiu đei tơdrong hơlen đơ̆ng kon pơlei păng tơpôl.