Tơ̆ pơma đam, ƀar ‘nu Kơdră chĕp pơgơ̆r drơ̆ng mĭnh nơ̆r hơnơ̆ng lăng ba kơjăp, pơrô̆ athei rim hơnih bơ̆ jang ƀơm truh ƀar teh đak akŏm tơlĕch jang jơnei dôm tơdrong tơƀơ̆p dih băl ƀar Hơnih tơm Chinh trĭ păng dôm tơdrong drơ̆ng mĭnh nơ̆r kơdră kơpal tơjê̆ ou; kơrŭn iung jang kơtang hơmet ăn ‘Măng hop akŏm mă 47 Hơnih jang hơdoi Khul kơdră chĕp pơgơ̆r teh đak kơ ƀar teh đak truh ou kơnh; atŏk kơtang hơmet pơ ‘lơng dôm tơdrong tơnap tap tơhlăk tơhlĭn kơ mĭnh ƀar tơdrong jang kăl vă hơnhăk jang hơdoi mŭk drăm ƀar teh đak atŏk tơ iung kơjăp ‘lơ̆ng, jơnei. Ƀar ‘nu kơdră teh đak drơ̆ng mĭnh nơ̆r hơnơ̆ng atŏk kơtang pơrô̆ tơbăt, pơtho tơbăt găh chăl sơnăm joăt joe tơgoăt tơgoăl gĭt kăl Việt Nam-Lào, atŏk kơtang tơbăt dih băl kơtơ̆ng ang păng iung jang hơdoi kơjăp, tơgŭm djru dih băl tơ̆ rim ‘măng hop akŏm lơ̆m tơring păng lơ̆m apŭng plĕnh teh.